Go Back

Ezekieli Chapter 47

• 1. O na ningĩ akĩ’hũndũra akĩnginyia mũrango-inĩ wa nyũmba ĩo, na atĩrĩrĩ, ngĩona maĩ megũtherũka moimĩte na ruungu rũa hingĩro ya nyũmba ĩo magatherera na mwena wa irathĩro, nĩ ũndũ nyũmba ĩo yaroretie ũthiũ wayo irathĩro; namo maĩ macio moimaga na kũu ruungu, makoima na mwena wa ũrĩo wa nyũmba ĩo, mwena-inĩ wa gũthini wa kĩgongona.
• 2. Hĩndĩ ĩo agĩcoka akĩnyumĩria njĩra-inĩ ya kĩhingo-inĩ kĩrĩa kĩarorete gathigathini, akĩndigicũra andoretie njĩra-inĩ ya nja, akĩnginyia kĩhingo-inĩ kĩa na nja, tũgerete njĩra ya kĩhingo-inĩ kĩrĩa kĩarorete irathĩro; na atĩrĩrĩ, hau nĩho maĩ maathereragĩra moimĩte na mwena wayo wa ũrĩo.
• 3. Na rĩrĩ, hĩndĩ ĩrĩa mũndũ ũcio aathiire na mbere arorete na mwena ũcio wa irathĩro, anyitĩte rũrigi rũa gũthima na guoko-rĩ, agĩgĩthima mĩkono ngiri ĩmwe, agĩcoka akĩnduĩkanĩria maĩ-inĩ macio, namo makĩnginya o thũrimo.
• 4. Ningĩ agĩthima mĩkono ĩngĩ ngiri ĩmwe, agĩcoka akĩnduĩkanĩria maĩ-inĩ o ro macio, magĩkĩnginya o maru. Ningĩ agĩcoka agĩthima mĩkono ĩngĩ ngiri ĩmwe, akĩnduĩkanĩria maĩ-inĩ o ro macio, magĩkĩnginya o njohero.
• 5. Thutha wa ũguo agĩcoka agĩthima mĩkono ĩngĩ ngiri ĩmwe; naruo rũgĩkorũo nĩ rũũĩ itangĩhota kũringa, nĩ ũndũ maĩ maarĩ maiyũru mũno, makaigana ma gũthambĩrũo, na magatuĩka rũũĩ rũtangĩringĩka.
• 6. Nake akĩnjĩra atĩrĩ, Mũrũ wa mũndũ, nĩwona ũndũ ũcio? Hĩndĩ ĩo ningĩ akĩndwara a’hũndũrĩte, akĩnjokia hũgũrũrũ-inĩ cia rũũĩ rũu.
• 7. Na rĩrĩ, rĩrĩa ndakorirũo njokete kuo-rĩ, ngĩona atĩ kũu hũgũrũrũ-inĩ cia rũũĩ rũu kwarĩ mĩtĩ mĩingĩ mũno mũrĩmo ũyũ waruo, o na mũrĩmo ũrĩa ũngĩ.
• 8. Ningĩ akĩnjĩra atĩrĩ, Maĩ maya megũtherũka marorete bũrũri wa mwena wa irathĩro, magagĩtherera makinye werũ-inĩ wa Araba, nĩguo macoke mathiĩ marorete iria-inĩ; namo maĩ macio megũthiĩ gũitĩrĩra iria-inĩ rĩu, o maya megũtherũka haha; namo maĩ macio ma iria-inĩ nĩmekũhorio ũrũrũ wamo.
• 9. Na nĩgũgakinya atĩrĩ, atĩ kĩũmbe kĩrĩa gĩothe kĩrĩ muoyo kĩrĩa gĩtambaga kũndũ guothe kũrĩa rũũĩ rũu rũkinyĩte-rĩ, nĩgĩgatũũra muoyo, nakuo nĩgũkagĩa rũitũ rũnene rũa ciũngũyũ, nĩ ũndũ maĩ macio nĩmagakinya kuo, na maĩ ma iria-inĩ mahorio ũrũrũ wamo, nakĩo kĩndũ o gĩothe kĩrĩa gĩgakorũo kĩrĩ kũndũ o guothe kũrĩa rũũĩ rũu rũkinyĩte-rĩ, gĩtũũre muoyo.
• 10. Na nĩgũgakinya atĩrĩ, atĩ ategi ciũngũyũ nĩmakarũgama hũgũrũrũ-inĩ ciarĩo, nakuo kuuma Eni-gedi nginya o Eni-egilaimu gũtuĩke gwa gũtambũrũkagĩrio mĩtego ya kũgwatia ciũngũyũ; nacio ciũngũyũ ciakuo igatuĩka o ta ũrĩa mĩthemba ĩrĩa ĩngĩ yacio ĩtariĩ, ituĩke o ta ciũngũyũ cia iria-inĩ rĩrĩa inene, na ciingĩhe mũno mũno.
• 11. No rĩrĩ, njabacabi ciakuo, o na marengeta makuo marĩa me ndaka, matikahoreka ũrũrũ; no magatigwo o ro ũguo matuĩke kũndũ gwĩ cumbĩ.
• 12. Nakuo hũgũrũrũ-inĩ cia rũũĩ rũu mũrĩmo ũyũ o na mũrĩmo ũrĩa ũngĩ, nĩ kũmera gũkamera mĩtĩ ya mĩthemba ĩrĩa yothe ĩciaraga irio, nayo ndĩkoma mathangũ, o na kana maciaro mayo maage; no ĩgaciaraga maciaro ma mũũkano mweri o mweri, nĩ gũkorũo maĩ maruo magatherũkaga moimĩte handũ harĩa hatheru haamũre; namo maciaro mayo nĩmakarĩagwo, o namo mathangũ mayo matuĩke ma kũhonania.
• 13. Ningĩ Mwathani Jehova oigĩte ũũ: Mũhaka nĩguo ũyũ wa ũrĩa mũkagaya bũrũri ũyũ ũtuĩke igai rĩa kũgayanĩrio Isiraeli o ta ũrĩa mĩhĩrĩga ĩrĩa yao ikũmi na ĩĩrĩ ĩtariĩ; Jusufu akaheo icunjĩ igĩrĩ,
• 14. naguo bũrũri ũcio mũkawĩgwatĩra igai, o mũndũ aheo igai rĩake o ta ũrĩa ũngĩ; tondũ nĩndaambararĩirie guoko gwakwa na igũrũ ngiuga atĩ ngaũhe mathoguo; naguo bũrũri ũyũ nĩũkamũgũĩra ũtuĩke igai rĩanyu.
• 15. Naguo ũyũ nĩguo ũgatuĩka mũhaka wa bũrũri ũyũ: mwena wa gathigathini-rĩ, ũkarutio iria-inĩ rĩrĩa inene, ũgere Hethiloni, ũkinye o itonyero-inĩ rĩa Zedadi;
• 16. na ũgere Hamathu, na Berotha, na Sibiraimu, kũrĩa gwĩ gatagatĩ ka mũhaka wa Dameski o na mũhaka wa Hamathu; na Hazeri-hatikoni, kũrĩa gũkuhĩhĩirie mũhaka wa Haurani.
• 17. Naguo ũguo nĩ ta kuuga ũkoima iria-inĩ ũkinye Hazari-enoni, o kũu mũhaka-inĩ wa Dameski, naguo mũhaka wa Hamathu ũkorũo wĩ mwena wa gathigathini, ũrĩa ũrorete na kũu gathigathini. Ũcio nĩguo mũhaka wa mwena wa gathigathini.
• 18. Naguo mũhaka wa mwena wa irathĩro ũtuĩke nĩ Jorodani, naruo rũgayanie bũrũri wa Isiraeli na mabũrũri ma Haurani, na Dameski, na Gileadi; naguo mũhaka ũcio ũthimwo ũrutĩtio o mũhaka-inĩ wa mwena wa gathigathini o nginya iria-inĩ rĩa mwena wa irathĩro. Ũcio nĩguo mũhaka wa mwena wa irathĩro.
• 19. Naguo mũhaka wa mwena wa gũthini ũrĩa ũrorete na kũu gũthini ũkarutio Tamaru ũthiĩ ũkinye maria-inĩ ma Meribathu-kadeshi, ũkinye karũũĩ ka Misiri, ũcoke ũkinye iria-inĩ rĩrĩa inene. Ũcio nĩguo mũhaka wa mwena wa gũthini ũrĩa ũrorete na kũu gũthini.
• 20. Naguo mũhaka wa mwena wa ithũĩro nĩũgatuĩka iria rĩrĩa inene, kuuma o mũhaka-inĩ ũcio wa mwena wa gũthini o nginya itonyero-inĩ rĩa Hamathu. Ũcio nĩguo mũhaka wa mwena wa ithũĩro.
• 21. Ũguo nĩguo mũkegayania bũrũri ũcio o ta ũrĩa mĩhĩrĩga ya Isiraeli ĩtariĩ.
• 22. Na nĩgũgakinya atĩrĩ, atĩ mũkaũgayana ũtuĩke igai rĩanyu na ũndũ wa kũũcukĩra mĩtĩ, mwĩ na ageni arĩa matũũranagia na inyuĩ, o arĩa magaciarĩra ciana thĩinĩ wanyu; naho ha ũhoro wao, magatuĩka o ta marĩ; ciana cia Isiraeli iria iciarĩirũo bũrũri ũcio; acio makagwata igai hamwe na inyuĩ thĩinĩ wa mĩhĩrĩga ya Isiraeli.
• 23. Na nĩgũgakinya atĩrĩ, atĩ mũhĩrĩga-inĩ o wothe ũrĩa mũndũ wa kũngĩ atũũraga e mũgeni-rĩ, mũhĩrĩga-inĩ ũcio noguo mũkamũhe igai rĩake; ũguo nĩguo Mwathani Jehova oigĩte.

Home