Go Back

Ezekieli Chapter 42

• 1. Ningĩ thutha wa ũguo akĩnyumia akĩndwara o nja ĩrĩa ya nyumĩrĩra, andongoretie na njĩra ĩrĩa ĩrorete gathigathini; agĩcoka akĩndonyia kanyũmba karĩa kaang’ethanĩire na handũ harĩa haatigĩtwo mwanya, na noko kaang’ethanĩire na nyũmba ĩo harĩa harorete na kũu gathigathini.
• 2. Na mbere ya kĩhingo kĩrĩa kĩarorete mwena wa gathigathini-rĩ, handũ hau haatigĩtwo mwanya haaraihĩte mĩkono igana rĩmwe, na hakaarama mĩkono mĩrongo ĩtano.
• 3. Ningĩ harĩa haaringaine na mĩkono ĩo mĩrongo ĩĩrĩ ya nja ĩrĩa ya na thĩinĩ hagaakwo ithaku, o na harĩa haaringaine na handũ harĩa haarĩtwo mahiga nja ĩrĩa ya nyumĩrĩra; nacio ithaku icio ciarĩ ithatũ, tondũ kĩmwe nĩgĩaakĩrĩirũo ithaku ingĩ igĩrĩ, o kĩmwe igũrũ rĩa kĩrĩa kĩngĩ.
• 4. Na ningĩ hau mbere ya tũnyũmba tũu haarĩ njĩra yaaramĩte mĩkono ikũmi, o na ĩkaraiha mĩkono igana rĩmwe; nayo mĩrango yatuo yarorete gathigathini.
• 5. Na rĩrĩ, tũnyũmba tũu twa igũrũ twarĩ tũcekaceke, nĩ ũndũ nĩtuo twanyihanyihĩtio nĩ getha handũ ha gwakwo gĩthaku honeke, natuo tũgacekehio gũkĩra tũnyũmba tũrĩa twa thĩ, o na gũkĩra tũu twa gatagatĩ;
• 6. tondũ tũnyũmba tũu twaakĩtwo mĩhari ĩtatũ, o mũhari igũrũ rĩa mũhari ũrĩa ũngĩ, no tũtiarĩ na itugĩ ta itugĩ iria cia nja; na nĩkĩo tũnyũmba tũu twa na igũrũ mũno twakunderete gũkĩra twa na mũhuro, o na twa gatagatĩ-inĩ.
• 7. Na rĩrĩ, rũthingo rũrĩa rũarĩ na nja mwena-inĩ wa tũnyũmba tũu, o rũu rũang’etheire nja ya nyumĩrĩra mbere ya tũnyũmba tũu-rĩ, ũraihu waruo warĩ mĩkono mĩrongo ĩtano.
• 8. Nĩ gũkorũo ũraihu wa tũnyũmba tũrĩa twarĩ na nja ya nyumĩrĩra warĩ mĩkono mĩrongo ĩtano o ro ũguo; o na ningĩ mwena wa na mbere wa hekarũ warĩ mĩkono igana rĩmwe.
• 9. Ningĩ mũhuro wa tũnyũmba tũu mwena wa irathĩro, kwarĩ itonyero rĩa gũtonya kuo mũndũ oimĩte nja ĩrĩa ya nyumĩrĩra.
• 10. Ningĩ kwarĩ tũnyũmba twakĩtwo rũthingo-inĩ rũa na nja mwena wa irathĩro kũrĩa rũatunguhĩire, na rũkang’ethera handũ harĩa haatigĩtwo mwanya nyũmba-inĩ ĩo.
• 11. Nayo njĩra ĩrĩa yarĩ mbere yatuo yonagwo ĩhaana o ta njĩra ĩrĩa yarĩ mbere ya tũnyũmba tũrĩa twarorete mwena wa gathigathini; ningĩ o ta ũrĩa ũraihu watuo watariĩ-rĩ, ũguo noguo wariĩ watuo o naguo watariĩ; nacio nyumĩrĩra ciatuo ciothe ciaringaine na ũrĩa tũnyũmba tũu twathondeketwo, ningĩ o ĩmwe ĩmwe ĩkaringana na mũrango wa kanyũmba o kanyũmba.
• 12. Ningĩ gĩturi-inĩ kĩa njĩra ĩo, o ĩo yegiritanĩtie na rũthingo rũa mwena wa irathĩro, nĩho haarĩ mũromo wa gũthiĩ na kũu mĩrango-inĩ ya tũnyũmba tũrĩa twarorete mwena wa gũthini.
• 13. Ningĩ agĩcoka akĩnjĩra atĩrĩ, Tũnyũmba twa mwena wa gathigathini, o na tũnyũmba twa mwena wa gũthini, o tũu twĩ mbere ya handũ harĩa hatigĩtwo mwanya-rĩ, tũu nĩtuo tũnyũmba tũrĩa twamũre, na nĩkuo athĩnjĩri-Ngai arĩa makuhagĩrĩria Jehova makarĩagĩra indo iria nyamũre mũno; ningĩ nĩkuo makaigaga indo iria nyamũre mũno, nacio nĩcio mũtu ũrĩa ũrutagwo wa magongona, o na indo cia magongona ma mehia, o na cia magongona ma ihĩtia; nĩ ũndũ handũ hau nĩ haamũre.
• 14. Na rĩrĩ, hĩndĩ ĩrĩa athĩnjĩri-Ngai maatonya nja ya thĩinĩ-rĩ, matirĩ hingo mangĩcoka kuuma na nja ĩrĩa ya nyumĩrĩra mataambĩte kũruta nguo ciao iria makoragwo mehumbĩte magĩtungata, nĩ ũndũ nĩ nyamũre; no rĩrĩ, nĩ kwĩhumba makehumbaga nguo ingĩ matanacoka kuumĩra harĩa hakoniĩ kĩrĩndĩ.
• 15. Na rĩrĩ, hĩndĩ ĩrĩa aakorirũo arĩkĩtie gũthima nyũmba ya na thĩinĩ akĩnyumagaria akĩndwara na njĩra ya kĩhingo-inĩ kĩrĩa kĩaroretie mũromo wakĩo irathĩro, agĩthima handũ hau na mĩena yothe.
• 16. Naguo mwena wa irathĩro akĩũthima na mũrangi ũcio wa gũthima naguo, agĩthima mwena ũcio wothe mĩrangi magana matano.
• 17. Ningĩ agĩthima mwena wa gathigathini na mũrangi ũcio wa gũthima naguo, agĩthima mwena ũcio wothe mĩrangi magana matano.
• 18. O na agĩthima mwena wa gũthini na mũrangi ũcio wa gũthima naguo mĩrangi magana matano;
• 19. ningĩ akĩhũndũka arorete na mwena wa ithũĩro, akĩũthima na mũrangi ũcio wa gũthima naguo mĩrangi magana inatano.
• 20. Ũguo nĩguo aathimire handũ hau na mĩena ĩrĩa ĩna; naho hau haarĩ rũthingo rũaharigicĩirie na ndwere ciothe, rũaraihĩte mĩrangi magana matano na mwena ũmwe, na rũkaarama mĩrangi magana matano na mwena ũrĩa ũngĩ, naruo rũarĩ rũa kũhakania handũ harĩa haamũre heikarie mwanya na harĩa hataarĩ haamũre.

Home