Go Back

Ezekieli Chapter 40

• 1. NA RĨRĨ, mwaka wa mĩrongo ĩĩrĩ na ĩtano kuuma hĩndĩ ĩrĩa twarindũrirũo, o kĩambĩrĩria-inĩ kĩa mwaka ũcio, mũthenya wa ikũmi wa mweri, naguo nĩ mwaka wa ikũmi na ĩna kuuma hĩndĩ ĩrĩa itũũra rĩahũrirũo-rĩ, mũthenya o ro ũcio, ngĩigua ta njigĩrĩirũo guoko kwa Jehova, agakĩndwara o itũũra-inĩ rĩu;
• 2. ngĩkĩigua na cioneki cia Ngai ta andwarĩte o bũrũri wa Isiraeli, akanjiga thĩ kĩrĩma-inĩ kĩraya mũno na igũrũ, naho hau kĩrĩma-inĩ kĩu ngĩona ta arĩ gĩtũũro kĩrĩa gĩakĩtwo mwena wa gũthini.
• 3. Nake agĩkĩndwara o ho, na atĩrĩrĩ, hagĩgĩkorũo he mũndũ ho, na mũhianĩre wake watariĩ ta wa gĩcango, na agĩkorũo anyitĩte rũrigi rũa ũguta, o na mũrangi wa gũthima naguo, na guoko, agakĩrũgama kĩhingo-inĩ.
• 4. Nake mũndũ ũcio akĩnjĩra atĩrĩ, Mũrũ wa mũndũ, wĩrorere maũndũ na maitho, na ũmeiguĩre na matũ, namo maũndũ mothe marĩa ndĩrĩkuonia, ũmaige ngoro-inĩ yaku; nĩ ũndũ ũrehetwo gũkũ, nĩguo nguonie maũndũ macio; namo marĩa mothe ũrĩona ũmoimbũrĩre nyũmba ya Isiraeli.
• 5. Na atĩrĩrĩ, kwarĩ rũirigo rũakĩtwo na kũu nja ya nyũmba ĩo rũamĩrigicĩirie mbarĩ ciothe, nake mũndũ ũcio aanyitĩte mũrangi wa gũthima na guoko gwake wa mĩkono ĩtandatũ, na mũkono o mũkono waguo ũkaraiharaiha iraata rĩmwe gũkĩra mĩkono ya ndũire; nake agĩgĩthima wariĩ wa rũthingo rũu naguo, ũgĩgĩtuĩka nĩ mũrangi ũmwe; o nakuo kũraiha na igũrũ agĩguthima na gũgĩtuĩka nĩ mũrangi ũmwe o naguo.
• 6. Ningĩ agĩcoka agĩkinya kĩhingo-inĩ kĩrĩa kĩarorete irathĩro, akĩambata na ngathĩ ciakĩo; agĩthima wariĩ wa hingĩro ya kĩhingo kĩu, na ũgĩtuĩka nĩ mũrangi umwe, o naguo wariĩ wa hingĩro ĩrĩa ĩrigĩ akĩũthima, ũgĩtuĩka nĩ mũrangi ũmwe o naguo.
• 7. Naguo ũraihu wa tũnyũmba twa arangĩri o kamwe kamwe warĩ mũrangi ũmwe, o naguo wariĩ watuo o kamwe kamwe warĩ mũrangi ũmwe o naguo; nakuo kũraihanĩrĩria gwa tũnyũmba tũu kwarĩ mĩkono ĩtano; nayo hingĩro ya kĩhingo gĩa gĩthaku-inĩ kĩrĩa kĩrĩ kĩhingo-inĩ gĩa kũng’ethera nyũmba yarĩ ya mũrangi ũmwe.
• 8. O na ningĩ agĩthima gĩthaku kĩu kĩrĩ kĩhingo-inĩ gĩa kũng’ethera nyũmba ĩo, gĩgĩtuĩka nĩ kĩa mũrangi ũmwe.
• 9. Ningĩ agĩthima gĩthaku kĩu kĩrĩ kĩhingo-inĩ kĩu, gĩgĩtuĩka nĩ kĩa mĩkono ĩnana, na itingĩ ciakĩo, mĩkono ĩĩrĩ; nakĩo gĩthaku kĩu kĩrĩ kĩhingo-inĩ kĩu kĩang’etheire nyũmba ĩo.
• 10. Natuo tũnyũmba twa arangĩri twa kĩhingo-inĩ kĩa mwena wa irathĩro-rĩ, tũtatũ twatuo twarĩ mwena ũyũ, o natuo tũrĩa tũngĩ tũtatũ twarĩ mwena ũrĩa ũngĩ; natuo tuothe tũtatũ twarĩ twa mũthimĩre o ro ũmwe; o nacio itingĩ iria ciarĩ mwena ũyũ, o na iria ciarĩ mwena ũrĩa ũngĩ, ciarĩ cia mũthimĩre o ro ũmwe.
• 11. O naguo wariĩ wa mũromo wa kĩhingo akĩũthima, naguo ũgĩtuĩka nĩ wa mĩkono ikũmi; o naguo ũraihu wa kĩhingo kĩu akĩũthima, ũgĩtuĩka nĩ wa mĩkono ikũmi na ĩtatũ;
• 12. na rĩrĩ, itheri rĩrĩa rĩarĩ gatagatĩ-inĩ ga tũnyũmba tũu twa arangĩri mwena ũyũ rĩarĩ rĩa mũkono ũmwe; narĩo itheri rĩa mwena ũrĩa ũngĩ rĩarĩ rĩa mũkono ũmwe o naguo; naguo ũraihu wa tũnyũmba tũu warĩ mĩkono ĩtandatũ mwena ũyũ, o na mĩkono ĩtandatũ mwena ũrĩa ũngĩ.
• 13. Ningĩ agĩthima wariĩ wa kĩhingo kĩu kuuma o mwena wa igũrũ wa kanyũmba kamwe nginya o mwena wa igũrũ wa kanyũmba karĩa kangĩ, naguo wariĩ wakĩo ũgĩtuĩka mĩkono inĩrongo ĩĩrĩ na ĩtano, o mũrango ũkĩringana na ũrĩa ũngĩ.
• 14. O na itingĩ agĩthondeka itingĩ cia mĩkono mĩrongo ĩtandatũ; nayo nja ĩrĩa yarĩ hau kĩhingo-inĩ ĩgĩturuma itingĩ icio, na ĩgĩcithiũrũrũka na ndwere ciothe;
• 15. o na ningĩ kuuma mwena wa na mbere wa itonyero-inĩ rĩa kĩhingo kĩu nginya mwena wa na mbere wa gĩthaku kĩu gĩĩ kĩhingo-inĩ kĩa na thĩinĩ, kwarĩ mĩkono mĩrongo ĩtano.
• 16. Nakuo kũu guothe mwena wa thĩinĩ gwatũrĩkĩtio tũtirica tũceke thingo-inĩ ciothe cia tũnyũmba tũu cia mwena ũcio wa na thĩinĩ, o na itingĩ-inĩ cia kĩhingo-inĩ; o natuo tũthaku twa na kũu thĩinĩ tũgekwo o ta ũguo; nacio itingĩ ciothe ciagemetio igaacũhio mĩhianĩre ya mĩkĩndũ.
• 17. Ningĩ thutha wa ũguo akĩndwara nja ĩrĩa ya nyumĩrĩra, ngĩgĩkora he tũnyũmba tũngĩ, naho hau nja hakaarũo mahiga thĩ maharigicĩirie na ndwere ciothe, natuo tũnyũmba tũu twakĩtwo mahiga-inĩ macio maarĩtwo ho nĩ mĩrongo ĩtatũ.
• 18. Naho handũ hau haarĩtwo mahiga haarĩ mĩena-inĩ ya ihingo, naguo ũraihu waho ũkaiganana na wa kĩhingo kĩu, o kũu kwarĩtwo mahiga thĩ mwena wa mũhuro.
• 19. Hĩndĩ ĩo agĩcoka agĩthima wariĩ kuuma o mwena wa mbere wa kĩhingo kĩrĩa kĩarĩ mwena wa mũhuro, o nginya nyumĩrĩra na nja ya na thĩinĩ, ũgĩtuĩka nĩ mĩkono igana mwena wa irathĩro, o na mwena wa gathigathini o taguo.
• 20. O nakĩo kĩhingo kĩa nja ya nyumĩrĩra kĩrĩa kĩroretie mũromo wakĩo gathigathini agĩgĩthima ũraihu wakĩo o na wariĩ wakĩo.
• 21. Natuo tũnyũmba twakĩo twa arangĩri twarĩ tũtatũ mwena ũyũ, o na tũtatũ mwena ũrĩa ũngĩ; nacio itingĩ ciakĩo, o na tũthaku twakĩo, twaakĩtwo na mũthimĩre o ũmwe na wa kĩhingo kĩu kĩa mbere; ũraihu wakĩo warĩ mĩkono mĩrongo ĩtano, o naguo wariĩ wakĩo mĩkono mĩrongo ĩĩrĩ na ĩtano.
• 22. Natuo tũtirica twakĩo, na tũthaku twakĩo, o na mĩkĩndũ yakĩo, ciarĩ cia mũthimĩre o ũmwe na wa kĩhingo kĩrĩa kĩarorete mwena wa irathĩro; nao andũ magĩkinya harĩ kĩo-rĩ, maahaicaga ngathĩ mũgwanja; natuo tũthaku twakĩo twarĩ mbere yakĩo.
• 23. Ningĩ mwena wa gathigathini o na wa irathĩro kwarĩ mũrango wa gũtonya nja ya na thĩinĩ ũringaine na ũrĩa ũngĩ; nake agĩthima kũraihanĩrĩria kwa mũrango na mũrango ũrĩa ũngĩ, akĩona nĩ mĩkono igana.
• 24. Ningĩ akĩndongoria andoretie mwena wa gũthini, na atĩrĩrĩ, kũu kwarĩ kĩhingo kĩngĩ kĩarorete o na kũu gũthini; nake agĩthima itingĩ ciakĩo, o na tũthaku twakĩo, o ta ũrĩa icio ingĩ ciathimĩtwo.
• 25. Na kwarĩ tũtirica thĩinĩ wakĩo, o na tũthaku-inĩ tũrĩa twakĩrigicĩirie ndwere ciothe, o ta tũtirica tũu tũngĩ; ningĩ kĩaraihĩte mĩkono mĩrongo ĩtano, na gĩkaarama mĩkono mĩrongo ĩĩrĩ na ĩtano.
• 26. Na ningĩ kwarĩ ngathĩ mũgwanja cia kũhaica kuo, na tũthaku twakĩo twarĩ o mbere yakĩo, o na ningĩ kwarĩ mĩkĩndũ yaacũhĩtio itingĩ-inĩ ciakĩo, ũmwe mwena ũyũ, o na ũmwe mwena ũrĩa ũngĩ.
• 27. Na kwarĩ kĩhingo kĩngĩ gĩa gũtonya nja ya na thĩinĩ kĩrorete gũthini; nake agĩthima mĩkono igana rĩmwe kuuma kĩhingo-inĩ kĩmwe nginya o kĩhingo-inĩ kĩrĩa kĩngĩ kĩarorete gũthini.
• 28. Thutha wa ũguo agĩcoka akĩnginyia nja ya na thĩinĩ andonyerie kĩhingo-inĩ kĩrĩa kĩarorete gũthini; agĩgĩthima kĩhingo kĩu o ta ũrĩa iria ingĩ ciathimĩtwo;
• 29. o na tũnyũmba twakĩo twa arangĩri, o na itingĩ ciakĩo, o na tũthaku twakĩo, tũgĩthimwo o ũndũ ũmwe na ũrĩa gwathimĩtwo kũu kũngĩ; na kwarĩ tũtirica thĩinĩ wakĩo, o na tũthaku-inĩ twakĩo tũrĩa twakĩrigicĩirie ndwere ciothe; nakĩo kĩaraihĩte mĩkono mĩrongo ĩtano, na gĩkaarama mĩkono mĩrongo ĩĩrĩ na ĩtano.
• 30. Natuo tũthaku tũu twakĩrigicĩirie mĩena yothe twarĩ twa mĩkono mĩrongo ĩĩrĩ na ĩtano kũraiha, na tũkaarama mĩkono ĩtano.
• 31. Natuo tũthaku tũu twang’etheire nja ĩrĩa ya nyumĩrĩra; nacio itingĩ ciakĩo ciagemetio igaacũhio mĩhianĩre ya mĩkĩndũ; nacio ngathĩ cia gũkinya kuo ciarĩ inyanya.
• 32. Ningĩ akĩndwara nja ya thĩinĩ ya mwena ũrĩa ũrorete irathĩro; nakuo kũu agĩthima kĩhingo gĩakuo o ta ũrĩa iria ingĩ ciathimĩtwo;
• 33. o na tũnyũmba twakĩo twa arangĩri, o na itingĩ ciakĩo, o na tũthaku twakĩo, tũgĩthimwo o ũndũ ũmwe na kũu kũngĩ; na kwarĩ tũtirica thĩinĩ wakĩo o na tũthaku-inĩ twakĩo tũrĩa twakĩrigicĩirie ndwere ciothe; nakĩo kĩaraihĩte mĩkono mĩrongo ĩtano, na gĩkaarama mĩkono mĩrongo ĩĩrĩ na ĩtano.
• 34. Natuo tũthaku tũu twang’etheire nja ĩrĩa ya nyumĩrĩra, nacio itingĩ ciakĩo ciagemetio igaacũhio mĩhianĩre ya mĩkĩndũ mwena ũyũ, o na mwena ũrĩa ũngĩ; nacio ngathĩ cia gũkinya kuo ciarĩ inyanya.
• 35. O na ningĩ akĩnginyia kĩhingo-inĩ kĩrĩa kĩarorete mwena wa gathigathini; nake agĩgĩthima o ta ũrĩa kũu kũngĩ gwathimĩtwo.
• 36. Ningĩ agĩcoka agĩthima tũnyũmba twakĩo twa arangĩri, o na itingĩ ciakĩo, o na tũthaku twakĩo; na kwarĩ tũtirica thĩinĩ wakĩo na ndwere ciothe; nakĩo kĩaraihĩte mĩkono mĩrongo ĩtano, na gĩkaarama mĩkono mĩrongo ĩĩrĩ na ĩtano.
• 37. O nacio itingĩ ciakĩo ciang’etheire nja ĩrĩa ya nyumĩrĩra; nacio itingĩ icio ikagemio igaacũhio mĩhianĩre ya mĩkĩndũ mwena ũyũ, o na mwena ũrĩa ũngĩ; nacio ngathĩ cia gũkinya kuo ciarĩ inyanya.
• 38. Na rĩrĩ, itingĩ-inĩ cia ihingo icio-rĩ, kwarĩ kanyũmba hamwe na mũrango wako; naho hau nĩho maathambagĩria nyamũ cia mahaki ma njino.
• 39. Naho hau gĩthaku-inĩ kĩa ihingo icio haarĩ metha cia gũthĩnjĩrũo, igĩrĩ mwena ũyũ, o na ingĩ igĩrĩ mwena ũrĩa ũngĩ, na igũrũ rĩacio nĩho haathĩnjagĩrũo nyamũ cia mahaki ma njino, o na magongona ma mehia, o na magongona ma mahĩtia.
• 40. Naguo mwena ũmwe wa na nja, ta mũndũ agĩthiĩ kwambatĩrĩra kĩhingo-inĩ kĩrĩa kĩarorete gathigathini, kwarĩ metha igĩrĩ; o naguo mwena ũrĩa ũngĩ wa gĩthaku gĩa kĩhingo-inĩ kwarĩ metha ingĩ igĩrĩ o ro ũguo.
• 41. Mwena ũyũ wa kĩhingo gũgĩkĩgĩa metha inya, o naguo mwena ũrĩa ũngĩ gũkagĩa metha inya o ro ũguo, nacio ciothe inyanya ciarĩ cia gũthĩnjĩrũo magongona igũrũ rĩacio.
• 42. O na ningĩ kwarĩ metha ingĩ inya cia mahiga maicũhie cia mahaki ma njino, nacio ciaraihĩte mũkono ũmwe na nuthu, na ikaarama mũkono ũmwe na nuthu, o na ikaraiha na igũrũ mũkono ũmwe; naho hau nĩho maaigagĩrĩra hiũ iria maathĩnjaga nyamũ cia mahaki ma njino nacio, o na magongona marĩa mangĩ.
• 43. Nakuo kũu thĩinĩ gwathecereirũo tũhocio thingo-inĩ ndwere ciothe; natuo twarĩ twa iraata rĩmwe; nacio nyama cia ũhiũ ũrĩa ũrutĩtwo ciaigagĩrĩrũo metha-inĩ icio igũrũ.
• 44. Naho hau nja ya kĩhingo-inĩ kĩa na thĩinĩ nĩho haarĩ tũnyũmba twa aini arĩa maainaga kũu nja-inĩ ĩo ya na thĩinĩ, o ĩrĩa yaringaine na kĩhingo kĩa mwena wa gathigathini, natuo tũnyũmba tũu twaroretie mĩromo yatuo na gũthini; na kwarĩ kanyũmba kamwe kaaringaine na kĩhingo kĩa mwena wa irathĩro kaaroretie mũromo wako gathigathini.
• 45. Nake akĩnjĩra atĩrĩ, Kanyũmba gaka karoretie mũromo wako gũthini-rĩ, nĩko ga athĩnjĩri-Ngai arĩa matũũraga maikarĩtie nyũmba ĩno.
• 46. O nako kanyũmba karĩa karoretie mũromo wako gathigathini-rĩ, nĩ ga athĩnjĩri-Ngai arĩa matũũraga maikarĩtie kĩgongona; nao nĩo ariũ a Zadoku, nao no-o oiki mathengagĩrĩra Jehova mamũtungatĩre thĩinĩ wa nyũmba ya Lawii.
• 47. Nake agĩgĩthima nja ĩo ũrĩa ĩraihĩte, ĩgĩtuĩka nĩ ya mĩkono igana, o na ĩkaarama mĩkono igana, nayo ĩkarũngara wega ĩĩ thikwea; nakĩo kĩgongona gĩgĩkorũo kĩigĩtwo o mbere ya nyũmba ĩo.
• 48. Ningĩ thutha wa ũguo akĩndwara gĩthaku-inĩ kĩa nyũmba ĩo, agĩthima gĩtingĩ o gĩtingĩ gĩa gĩthaku kĩu, gĩgĩthimwo mĩkono ĩtano mwena ũyũ, o na mĩkono ĩtano mwena ũrĩa ũngĩ; o naguo wariĩ wa kĩhingo warĩ mĩkono ĩtatũ mwena ũyũ, o na mĩkono ĩtatũ mwena ũrĩa ũngĩ.
• 49. O naguo ũraihu wa gĩthaku-rĩ, warĩ mĩkono mĩrongo ĩĩrĩ, o naguo wariĩ wakĩo warĩ mĩkono ikũmi na ũmwe; ningĩ kũu nakuo kwarĩ ngathĩ cia kwambataga nacio kuo; o na gũkagĩa itugĩ hau hakuhĩ na itingĩ icio, kĩmwe mwena ũyũ, na kĩrĩa kĩngĩ mwena ũrĩa ũngĩ.

Home