Go Back

Ezekieli Chapter 4

• 1. Ningĩ wee o nawe, mũrũ wa mũndũ, wĩyoere itubarĩ ũrĩige mbere yaku, ũcoke ũrĩkurure igũrũ mũhianĩre wa ũrĩa itũũra rĩtariĩ, narĩo nĩrĩo o itũũra rĩrĩa rĩa Jerusalemu,
• 2. na ũrĩtharĩke, na wakithie inyamũ ndaya na igũrũ cia mũtharĩko cia kũrĩũkĩrĩra, nĩngĩ ũitithie kĩhumbu gĩa tĩri rũirigo-inĩ rũarĩo, o na ũrĩakĩrĩre iraaro ũrĩĩhotorere, na ũigithie mĩgogo mĩtungu ya kũmomora rũirigo rũarĩo mbarĩ ciarĩo ciothe.
• 3. Thutha wa ũguo ũcoke wĩmathĩre thani ya kĩgera, ũkĩhande gĩtuĩke ta ngerekano ya rũirigo rũa kĩgera rũĩ gatagatĩ-inĩ gaku na itũũra rĩu; ũcoke ũrĩng’ethere nĩ getha rĩtharĩkwo, na nĩwe ũkarĩtharĩka. Ũndũ ũcio nĩguo ũgatuĩka kĩmenyithia harĩ nyũmba ya Isiraeli.
• 4. O na ningĩ atĩrĩ, ũkome na mwena waku wa ũmotho, ũcoke ũũigĩrĩre waganu wa nyũmba ya Isiraeli; na rĩrĩ, o ta ũrĩa matukũ maigana marĩa ũgakoma na mwena ũcio-rĩ, ũguo noguo ũgakuua waganu wa andũ ayo.
• 5. Nĩ gũkorũo nĩnduĩte atĩ ũkome ũguo matukũ magana matatũ ma mĩrongo kenda, namo matukũ macio nĩmo ũtuĩrĩirũo ma gũkuua waganu wa andũ a nyũmba ya Isiraeli.
• 6. Na ningĩ, wahingia matukũ macio, ũkome mwena waku wa ũrĩo, ũkuue waganu wa nyũmba ya Juda matukũ mĩrongo ĩna; ningĩ mũthenya o mũthenya ũtuĩke ta arĩ mwaka ũmwe; ũguo nĩguo ngũtuĩrĩire.
• 7. Nawe ũikare werekeirie ũthiũ waku harĩ ũhoro ũcio wa gũtharĩka Jerusalemu, nakuo guoko gwaku gũkorũo gũtarĩ kũhumbe; o na ũrathe mohoro ma atĩ rĩũkĩrĩrũo.
• 8. Na atĩrĩrĩ, nĩ kuoha ngũkuoha na mĩhĩndo ndũkegarũre na mwena ũyũ o na kana ũrĩa ũngĩ, o nginya hĩndĩ ĩrĩa ũkahingia matukũ maku ma gũtharĩkanĩra.
• 9. Ningĩ wĩyoere ngano, na cairi, na mboco, na ndengũ, na mwere, na ngano njirũ, ũciĩkĩre kĩnya-inĩ kĩmwe, ũcoke wĩthondekere mũgate nacio; naguo mũgate ũcio ũkaũrĩa matukũ mothe marĩa ũgakoma na mwena, naguo ũguo nĩ ta kuuga matukũ magana matatũ ma mĩrongo kenda.
• 10. Nacio irio ciaku iria ũkarĩaga-rĩ, nĩ gũthimwo igathimagwo na ratiri, o mũthenya ũmwe cekeri mĩrongo ĩĩrĩ; nacio irio icio ũcirĩangage na mathaa.
• 11. O namo maĩ marĩa ũkanyuaga-rĩ, nĩ gũthimwo magathimagwo, o gĩcunjĩ gĩa ithathatũ kĩa hini ĩmwe; namo maĩ macio ũmakundage na thaa.
• 12. Nacio irio icio ciaku nĩũgacirĩaga irugĩtwo ta ndumbuya cia cairi, na ũkorũo ũcirugĩte na mwaki wakĩtio na mai momũ ma andũ, na ũcirĩe ũkĩonagwo nĩ andũ.
• 13. Nake Jehova agĩkĩnjĩra atĩrĩ, Ũguo nĩguo ciana cia Isiraeli ikarĩaga irio ciacio ii na thahu, irĩ thĩinĩ wa ndũrĩrĩ kũndũ kũrĩa ngaciharaganithia.
• 14. Hĩndĩ ĩo niĩ na niĩ ngĩkiuga atĩrĩ, Hĩ! Mwathani Jehova, atĩrĩrĩ, ndirĩ ndegwatia thahu ũguo; nĩ ũndũ kuuma ndĩ o mũnyinyi o nginya rĩu ndirĩ ndarĩa nyama ya nyamũ ĩyũragĩte kana kĩrembuĩ; o na kana ngĩkinyia nyama irĩ mũgiro kanua gakwa.
• 15. Nake hĩndĩ ĩo akĩnjĩra atĩrĩ, Ũguo noguo, na tondũ ũcio nĩndagwĩtĩkĩria rũrua rũa ng’ombe ithenya rĩa mai ma andũ, nĩguo ũkĩruge irio ciaku naruo.
• 16. O na ningĩ akĩnjĩra ũũ: Atĩrĩrĩ, mũrũ wa mũndũ, nĩnganina mwĩhoko wothe wa irio kũu Jerusalemu; nao marĩage irio cia gũthimanĩrũo matangĩkĩte; o namo maĩ makamanyuaga ma gũthimanĩrũo o ro ũguo, magwatĩtwo nĩ icanjama;
• 17. nĩ getha maikarage maagithĩtio irio cia kũmaigana o na maĩ, nao mũndũ o mũndũ abare ũrĩa ũngĩ amakĩte, na mahwererekere mathire marĩ o na waganu wao.

Home