Go Back

Ezekieli Chapter 38

• 1. NA RĨRĨ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 2. Mũrũ wa mũndũ, ikara ũroretie ũthiũ waku harĩ Gogu wa bũrũri wa Magogu, o ũcio mũnene wa Roshu, na Mesheki, na Tubali, ũmũrathĩre ũhoro,
• 3. ũmwĩre atĩrĩ, Mwathani Jehova ekuuga ũũ: Atĩrĩrĩ, ndĩ wa kũhũrana nawe, wee Gogu, mũnene wa Roshu, na Mesheki, na Tubali;
• 4. na nĩ kũhũgũra ngakũhũgũrania, njoke ngũnyite thĩa na ndwano, nguumagarie uume bũrũri waku, wĩ na mbũtũ ciaku ciothe cia ita, na mbarathi ciaku, o na andũ aku arĩa mathiaga macihaicĩte, nao othe makorũo meohete indo ciao ciothe cia mbaara, marĩ mbũtũ nene ĩrĩ na ndarĩ o na ngo, nao othe makorũo magwete hiũ cia njora,
• 5. me hamwe na andũ a Perisia, na Kushi, na Putu; nao othe makorũo marĩ na ngo na itukũ cia igera;
• 6. na rĩrĩ, ũgakorũo ũtwaranĩte na Gomeri na itungati ciake ciothe cia ita, o na andũ a nyũmba ya Togarima wa kũu ituri-inĩ cia thĩ mwena wa gathigathini, e hamwe na itungati ciake ciothe cia ita, o ndũrĩrĩ nyingĩ mũno.
• 7. Wĩthagathage wega, ĩĩ-ni, wĩhaarĩrie mũno, wee mwene o na mbũtũ ciaku ciothe iria ikũũnganĩire, na ũtuĩke mũtongoria wacio.
• 8. Tondũ matukũ maingĩ maathira nĩũgetwo, o nayo mĩaka ĩo ya kũrigĩrĩria-rĩ, nĩũgatharĩka bũrũri ũrĩa ũgakorũo ũhonoketio haaro-inĩ ya rũhiũ rũa njora, ũgacokanĩrĩrio andũ moimĩte ndũrĩrĩ-inĩ nyingĩ, makonganio kũu irĩma-inĩ cia Isiraeli, iria ciatũire ikirĩte ihooru rĩa kĩrũma, no rĩu igakorũo icokete gũcokanĩrĩrio andũ moimĩte ndũrĩrĩ-inĩ, na magatũũra megangarĩte othe.
• 9. Wee nawe-rĩ, nĩ kwambata ũkaambata kuo, ũguthũkanĩre kuo o ta kĩhuhũkanio kĩa rũhuho, o na ũtuĩke o ta itu ithimbu rĩhumbĩte thĩ, wee mwene, na itungati ciaku ciothe cia ita, mwĩ hamwe na ndũrĩrĩ nyingĩ mũno.
• 10. Nake Mwathani Jehova oigĩte ũũ: Nĩgũgakinya atĩrĩ, mũthenya ũcio, atĩ nĩũkagĩa na meciria ma gũthugunda ũũru,
• 11. na uuge atĩrĩ, Nĩngwambata nginye bũrũri ũcio wĩ tũtũũra tũtairigĩtwo; ’hithũkĩre andũ acio matũire magaacĩire, na makegangara, o acio othe matũũraga matũũra matairigĩtwo, na matekĩrĩtwo igera cia kũmahinga, o na kana ihingo,
• 12. ndĩmahithũkĩre nĩguo ngamatahe indo, ndĩciĩgwatĩre. Nĩũgathugunda ũhoro wa kwerekeria guoko gwaku kũndũ kũrĩa gwatũire gũkirĩte ihooru na rĩu gũgacoka gũtũũrũo nĩ andũ, ũkũhũre, o na ũhũre andũ acio macokanĩrĩirio kuo moimĩte ndũrĩrĩ-inĩ, na makeonera ũhiũ o na indo, nao magagĩtũũra o gatagatĩ ga thĩ.
• 13. Na rĩrĩ, andũ a Sheba, na Dedani, o na onjorithia a Tarishishi, marĩ na nyanake-cia-mĩrũthi ciakuo ciothe, nĩ kũũria magakũũria atĩrĩ, Anga ũũkĩte gũtahana? Anga ũũnganĩtie mbũtũ ciaku cia ita ũũke wĩgwatĩre indo, nĩguo wĩyoere betha na thahabu, na ũtahe ũhiũ o na indo, ũtahe itaha inene mũno?
• 14. Tondũ ũcio, wee mũrũ wa mũndũ, ratha ũhoro, wĩre Gogu atĩrĩ, Mwathani Jehova oigĩte ũũ: Mũthenya ũcio-rĩ, o ũrĩa andũ akwa Isiraeli magakorũo maikaire megangarĩte, githĩ ndũgakorũo ũũmenyete?
• 15. Nawe nĩ kuuma ũkoima kũndũ gwaku o kũu ituri-inĩ cia thĩ mwena wa gathigathini, wee mwene, mwĩ hamwe na ndũrĩrĩ nyingĩ; nao andũ othe a cio makorũo mahaicĩte mbarathi, marĩ mbũtũ nene mũno ya athigari a ita arĩa njamba;
• 16. nawe ũtharĩkĩre andũ akwa Aisiraeli, ũtariĩ o ta itu ithimbu rĩhumbĩte thĩ. Na nĩgũgakinya atĩrĩ, atĩ matukũ macio ma kũrigĩrĩria, nĩngagũtwara bũrũri wakwa ũũtharĩke nĩ getha ndũrĩrĩ i’menye, rĩrĩa ngakorũo nduĩtwo mũtheru nĩ ũndũ waku, wee Gogu, o ikĩĩonagĩra ũndũ ũcio na maitho ma cio.
• 17. Ningĩ Mwathani Jehova oigĩte ũũ: Wee-rĩ, githĩ tiwe ndaaririe ũhoro waku tene o tene na tũnua twa anabii a Isiraeli arĩa maandungatagĩra, na makaratha mohoro mĩaka mĩingĩ makiugaga atĩ nĩngagũtwarithia ũkamokĩrĩre?
• 18. Ningĩ Mwathani Jehova oigĩte ũũ: Nĩgũgakinya atĩrĩ, mũthenya ũcio, o hĩndĩ ĩrĩa Gogu agathiĩ gũtharĩka bũrũri wa Isiraeli-rĩ, atĩ ngahuhia na maniũrũ makwa nĩ ũndũ wa ũrĩa njakanĩtwo nĩ mathũgũta.
• 19. Nĩ gũkorũo njarĩtie ndĩ na ũiru, na ngacinwo nĩ mang’ũrĩka, ngoiga atĩrĩ, Ti-itherũ mũthenya ũcio nĩgũkagĩa gĩtetemo kĩnene bũrũri wa Isiraeli,
• 20. o nginya ciũngũyũ cia iria-inĩ, o na nyamũ cia rĩera-inĩ, o na nyamũ cia gĩthaka, o na nyamũ ciothe ndambi o iria itambaga thĩ, o na andũ othe arĩa marĩ gũkũ thĩ guothe, mainainĩre mbere yakwa, o nacio irĩma igũithio ciigananio na thĩ, o nakuo kũndũ kũrĩa kwĩ iharũrũka kwaraganio biũ, na rũthingo o rũthingo rũmomorũo.
• 21. Ningĩ njomorithie hiũ cia njora itemenganĩre irĩma-inĩ ciakwa ciothe; naruo rũhiũ rũa mũndũ o mũndũ rũtemenge mũrũ wa ithe; ũguo nĩguo Mwathani Jehova oigĩte.
• 22. Ningĩ ndĩmũhũre na mũthiro, o na ũndũ wa kũmũitithia thakame; na kũmuurithĩria mbura ngĩru ya kĩboboto, wee mwene na itungati ciake cia ita, o na ndũrĩrĩ iria nyingĩ mũno igakorũo irĩ hamwe nake, ndĩmoirithĩrie mbura nene ya mbembe, o na mwaki, o na ũbiriti.
• 23. Na nĩngeyonania ũrĩa ndĩ mũkaru, o na ndũme andũ mandue mũtheru, na ngemenyithie harĩ ndũrĩrĩ nyingĩ; nacio nĩikamenya atĩ niĩ nĩ niĩ Jehova.

Home