Go Back

Ezekieli Chapter 36

• 1. ATĨRĨRĨ, wee mũrũ wa mũndũ, ratha mohoro makoniĩ irĩma cia Isiraeli, ũciĩre atĩrĩ, Inyuĩ irĩma ici cia Isiraeli, ta iguai ndũmĩrĩri ya Jehova.
• 2. Mwathani Jehova oigĩte ũũ: Tondũ wa ũrĩa mũmuku amũnyararĩte akoiga, Aha! o na akoiga atĩ, Irĩma icio cia tene tene nĩtũciĩgwatĩire igatuĩka citũ-rĩ,
• 3. tondũ wa ndeto icio ratha ũhoro, uuge atĩrĩ, Mwathani Jehova oigĩte ũũ: Ti-itherũ tondũ wa ũrĩa mamwanangĩte o kũmwananga, na makamũmerũkia na ndwere ciothe, nĩ getha mwĩgwatĩrũo nĩ arĩa matigarĩte a ndũrĩrĩ iria ingĩ, o na mũkaarĩrĩrũo na tũnua twa andũ a mũcang’ang’a, o arĩa mahehenekagĩra andũ a ndũrĩrĩ makĩmũcuka-rĩ,
• 4. tondũ ũcio, inyuĩ irĩma ici cia Isiraeli, ta iguai ndũmĩrĩri ya Mwathani Jehova; Mwathani Jehova aarĩirie irĩma cia Isiraeli o na ithũngũri, o na tũrũũĩ, o na cianda, o na kũndũ kũrĩa kwanangĩtwo gũgakira ihooru, o na matũũra marĩa matigĩtwo ũtheri, o macio megwatĩirũo nĩ andũ arĩa matigarĩte a ndũrĩrĩ iria ingĩ iria imarigicĩirie, na makanyararũo nĩo, agaciĩra ũũ:
• 5. Ti-itherũ nĩnjarĩirie andũ acio matigarĩte a ndũrĩrĩ icio ingĩ, o na Aedomu othe, na mwaki wa ũiru wakwa, tondũ nĩmegwatĩire bũrũri wakwa ũtuĩke wao makĩngenagĩrĩra na ngoro ciao, na makaũirĩra ngoro ta maũthinĩkanĩtie wĩgwatĩrũo o ro ũguo; ũguo nĩguo Mwathani Jehova oigĩte.
• 6. Tondũ ũcio ratha mohoro makoniĩ bũrũri wa Isiraeli, wĩre irĩma, o na ithũngũri, o na tũrũũĩ, o na cianda atĩrĩ, Mwathani Jehova oigĩte ũũ: Atĩrĩrĩ, njarĩtie ndĩ na ũiru o na mathũgũta, nĩ ũndũ wa ũrĩa mũconorithĩtio nĩ ndũrĩrĩ iria itetĩkĩtie;
• 7. tondũ ũcio Mwathani Jehova oigĩte ũũ: Nĩ kuoya njoete guoko gwakwa na igũrũ, ngoiga atĩrĩ, Ti-itherũ ndũrĩrĩ iria itetĩkĩtie, icio imũrigicĩirie, nĩigacokererũo nĩ ũhoro ũcio wacio wa gũconorithania.
• 8. No rĩrĩ, inyuĩ irĩma cia Isiraeli, nĩ kũruta mũkaruta honge, na mũciarĩre andũ akwa a Isiraeli maciaro; nĩ ũndũ makiriĩ gũũka.
• 9. Nĩ ũndũ atĩrĩ, nĩndĩmũrũgamĩrĩire, na nĩngũmũhũgũkĩra, na inyuĩ nĩmũkarĩmwo, o na mũhandwo irio;
• 10. na nĩngamũingĩhĩria andũ kũu kwanyu, ndĩmũingĩhĩrie andũ a nyũmba yothe ya Isiraeli, o yothe biũ; namo matũũra makuo nĩmagacoka gũtũũrũo nĩ andũ, o nakuo kũndũ kũrĩa gũkirĩte ihooru gũcoke gwakwo;
• 11. na nĩngamũingĩhĩria andũ o na ũhiũ mongerereke na maciare mũno; na nĩngatũma mũcoke gũtũũrũo o ta ũrĩa mwatariĩ mbere, o na ndĩmwĩkage maũndũ mega gũkĩra marĩa ndamwĩkaga mbere; na nĩmũkamenya atĩ niĩ nĩ niĩ Jehova.
• 12. Ĩĩ, ti-itherũ nĩ gũtũma ngatũma andũ magere kũu igũrũ rĩanyu, o andũ akwa Isiraeli; nao nĩmakamwĩgwatĩra mũtuĩke ao, mũgĩtuĩke ũgai wao, na inyuĩ gwata rĩu mũtigacoka kũmoragithĩria ciana.
• 13. Ningĩ Mwathani Jehova oigĩte ũũ: O na harĩa mamwĩraga atĩ, Wee wĩ bũrũri mũnini andũ, o na ũkahukia rũrĩrĩ rũakũ-rĩ,
• 14. kuuma rĩu ndũgacoka kũnina andũ o na rĩ, o na kana ũcoke kũhukia ciana cia rũrĩrĩ rũaku o na rĩ; ũguo nĩguo Mwathani Jehova oigĩte.
• 15. O na ningĩ ndikareka ũcoke kũgũũthũkĩrũo nĩ ndũrĩrĩ iria itetĩkĩtie igĩgũconorithia, o na kana ũcoke kũmenererio nĩ ndũrĩrĩ o na rĩ, o na kana ũcoke kũhĩngithia rũrĩrĩ rũaku ruo rũene o na rĩ; ũguo nĩguo Mwathani Jehova oigĩte.
• 16. O na ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 17. Mũrũ wa mũndũ, hĩndĩ ĩrĩa andũ a nyũmba ya Isiraeli maatũũrĩte bũrũri wao kĩũmbe-rĩ, nĩ gũthahia maaũthahirie na mĩthiĩre yao, o na ciĩko ciao; mĩthiĩre yao ĩkĩonwo nĩ niĩ-rĩ, yatariĩ ta thahu ũrĩa mũndũ-wa-nja agĩaga naguo ihinda-inĩ rĩake rĩa mweri.
• 18. Na nĩkĩo ndamaitĩire matũkũya makwa nĩ ũndũ wa thakame ĩrĩa maaitithĩtie bũrũri ũcio, na ũndũ wa ũrĩa maaũthũkĩtie na mĩhianano yao ya kũhoyũo;
• 19. niĩ na niĩ ngĩmaharaganĩria ndũrĩrĩ-inĩ, magĩkĩhurunjĩrũo mabũrũri; na niĩ ngĩmatuĩra ituĩro rĩringaine na mĩthiĩre yao, o na ciĩko ciao.
• 20. Ningĩ hĩndĩ ĩrĩa maakinyire ndũrĩrĩ-inĩ kũu maahurunjũkĩire-rĩ, no gũthahia maathahirie rĩĩtwa rĩakwa itheru, nĩ ũrĩa andũ maaragia ũhoro wao makiuga atĩrĩ, Aya nĩo andũ a Jehova, na nĩ kũrutũrũrũo marutũrũrĩtwo bũrũri wake.
• 21. No rĩrĩ, nĩndacaĩire rĩĩtwa rĩakwa itheru, o rĩu rĩathahĩtio nĩ nyũmba ya Isiraeli ndũrĩrĩ-inĩ, kũu maahurunjũkĩire.
• 22. Tondũ ũcio ĩra nyũmba ya Isiraeli atĩrĩ, Mwathani Jehova oigĩte ũũ: Ũndũ ũyũ ndikũwĩka nĩ ũndũ wanyu, inyuĩ nyũmba ya Isiraeli, no ngũwĩka nĩ ũndũ wa rĩĩtwa rĩakwa itheru, rĩu mũthahĩirie ndũrĩrĩ-inĩ, o kũu mwathiire.
• 23. Narĩo rĩĩtwa rĩu rĩakwa inene-rĩ, nĩ niĩ ngatũma rĩamũrũo, o rĩu rĩthahĩirio ndũrĩrĩ-inĩ, narĩo nĩrĩo inyuĩ mũthahĩirie o kũu thĩinĩ wacio; nacio ndũrĩrĩ nĩikamenya atĩ niĩ nĩ niĩ Jehova, o hĩndĩ ĩrĩa ngatuwo mũtheru thĩinĩ wanyu, ikĩĩonagĩra ũguo na maitho ma cio; ũguo nĩguo Mwathani Jehova oigĩte.
• 24. Nĩ gũkorũo nĩngamuoya ndĩmũrute ndũrĩrĩ-inĩ, ndĩmũcokanĩrĩrie muume mabũrũri-inĩ, ndĩmũhire bũrũri wanyu kĩũmbe.
• 25. Na nĩngamũminjaminjĩria maĩ matheru, mũthere; ndĩmũtherie mũthirũo nĩ gĩko kĩanyu gĩothe, o na mũtigithanio na mĩhianano yanyu ya kũhoyũo.
• 26. O na ningĩ nĩngamũhe ngoro ĩngĩ njerũ, o na ndĩmwĩkĩre roho ũngĩ mwerũ thĩinĩ wanyu, na ndĩmwehererie ngoro ĩrĩa nyũmũ ta ihiga ĩmuume mĩĩrĩ-inĩ yanyu, njoke ndĩmũhe ngoro ĩngĩ njororo ta nyama.
• 27. Nĩ gwĩkĩra ngamwĩkĩra roho wakwa thĩinĩ wanyu, ndũme mũrũmagĩrĩre irĩra cia watho wakwa, na mũmenyagĩrĩre matuĩro makwa ma cira, mũmekage.
• 28. Na nĩmũgatũũra bũrũri ũrĩa ndaheire maithe manyu, na mũtuĩke andũ akwa, niĩ na niĩ nduĩke Ngai wanyu.
• 29. Na nĩngamũhonokia ndĩmũrute maũndũ-inĩ manyu mothe marĩa me thahu; na ngoige kũgĩe ngano, na ndĩmĩingĩhie, na ndikamũrehithĩrie ng’aragu.
• 30. O namo maciaro ma mĩtĩ nĩngamaingĩhia, naguo uumithio wa mĩgũnda ndũme wongerereke mũno, nĩ getha mũtigacoke kũmenererio ndũrĩrĩ-inĩ o na rĩ, nĩ ũndũ wa ũrĩa mũhũtĩte.
• 31. Na hĩndĩ ĩo nĩmũgacoka kũririkana mĩthiĩre yanyu mĩũru, o na ciĩko cianyu itaagĩrĩire, o nginya mwĩthũũre inyuene, mweyona ũrĩa mũthũkĩte nĩ ũndũ wa waganu wanyu, o na ũndũ wa maũndũ manyu ma thahu.
• 32. Ningĩ Mwathani Jehova oigĩte atĩrĩ, Kũromenyeka nĩ inyuĩ, o inyuĩ andũ a nyũmba ya Isiraeli, atĩ ndigwĩka maũndũ macio nĩ ũndũ wanyu; nyararĩkai na mũconoke nĩ ũndũ wa mĩthiĩre yanyu.
• 33. O na ningĩ Mwathani Jehova oigĩte atĩrĩ, Mũthenya ũrĩa ngamũtheria mũthirũo nĩ waganu wanyu wothe-rĩ, mũthenya o ro ũcio nĩguo ngatũma matũũra macoke gũtũũrũo nĩ andũ, o nakuo kũndũ kũrĩa gũkirĩte ihooru gũcoke gwakwo;
• 34. naguo bũrũri ũrĩa watũire wanangĩtwo nĩũgacoka kũrĩmwo, o na harĩa ũronagwo wĩ mwanangĩku nĩ agendi othe arĩa marahĩtũkagĩra kuo.
• 35. Nao nĩmakoiga atĩrĩ, Bũrũri ũyũ watũire wanangĩtwo-rĩ, rĩu nĩũtuĩkĩte o ta mũgũnda wa Edeni; o namo matũũra marĩa maakirĩte ihooru na makaanangwo, o na magathario-rĩ, rĩu nĩ kũirigwo mairigĩtwo o na magatũũrũo nĩ andũ.
• 36. Hĩndĩ ĩo nĩguo ndũrĩrĩ iria itigarĩte imũrigicĩirie na ndwere ciothe ikamenya atĩ niĩ Jehova nĩ niĩ njokete gwakithia kũndũ kũrĩa gwatharĩtio, o na ngahandithia kũrĩa kwanangĩtwo; nĩ niĩ Jehova njarĩtie ũhoro ũcio, na nĩngawĩka.
• 37. Mwathani Jehova oigĩte ũũ: O na hamwe na ũguo, andũ a nyũmba ya Isiraeli o ene nĩmaga’thaitha ndĩmeke ũndũ, na ndĩwĩke, naguo nĩ atĩ ndĩmaingĩhĩrie andũ, maingĩhe o ta rũũru rũa mbũri;
• 38. nao matuĩke o ta rũũru rũgima rũa ngoima cia magongona, o na ta rũũru rũrĩa ruonekaga Jerusalemu hĩndĩ ya ciathĩ; ũguo nĩguo matũũra marĩa maakirĩte ihooru makaiyũrũo nĩ ndũru cia andũ; nao nĩmakamenya atĩ niĩ nĩ niĩ Jehova.

Home