Go Back

Ezekieli Chapter 34

1. Na rĩrĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
2. Mũrũ wa mũndũ, rathĩra arĩithi a Isiraeli ũhoro. Marathĩre ũhoro, wĩre arĩithi acio atĩrĩ, Mwathani Jehova oigĩte ũũ: Hĩ! Kaĩ arĩithi a Isiraeli, acio merĩithagia o ene, marĩ na haaro-ĩ! Githĩ arĩithi ti mbũri mangĩrĩithagia?
3. Inyuĩ mũrĩaga maguta ma cio, na mũkehumba nguo cia guoya wacio, na mũgathĩnja iria noru thĩinĩ wacio; no mũtirĩ mbũri mũrĩithagia.
4. Iria hinyaru mũticiĩkagĩra hinya, o na kana mũkahonia iria ndũaru, o na kana iria nyunĩku mũgacioha, o na kana iria ihahũrĩtwo mũgacicokia mũciĩ, o na kana mũgacaria iria ciũrĩte; no rĩrĩ, mũciramataga na hinya mũtarĩ na tha,
5. nacio igakĩhurunjũka nĩ ũndũ itirĩ na mũrĩithi, igagĩtuĩka nyama cia kũrĩo nĩ nyamũ ciothe cia gĩthaka, na ikahurunjũka.
6. Mbũri ciakwa iriũngaga kũndũ guothe irĩma-inĩ, o na ithũngũri-inĩ ciothe iria ndaya; ĩĩ, ti-itherũ mbũri ciakwa ihurunjũkĩire kũndũ guothe thĩ; na gũtirĩ mũndũ o na ũmwe wa kũũrĩrĩria na kũrĩa irĩ, o na kana wa gũcicaria.
7. Tondũ ũcio, inyuĩ arĩithi aya-rĩ, ta iguai ndũmĩrĩri ya Jehova:
8. Mwathani Jehova oigĩte atĩrĩ, O ta ũrĩa niĩ ndũũraga muoyo-rĩ, kuona atĩ mbũri ciakwa nĩituĩkĩte nyamũ cia iguĩma, ningĩ mbũri o ro icio ciakwa igatuĩka nyama cia kũrĩo nĩ nyamũ ciothe cia gĩthaka, nĩ ũndũ wa ũrĩa ciagĩte mũrĩithi, o na ikaaga gũcario nĩ arĩithi acio akwa, no arĩithi acio nĩ kwĩrĩithia merĩithagia o ene, na makarega kũrĩithia ng’ondu ciakwa-rĩ,
9. tondũ wa maũndũ macio, inyuĩ arĩithi aya, ta iguai ndũmĩrĩri ya Jehova;
10. Mwathani Jehova oigĩte ũũ: Atĩrĩrĩ, ndĩ wa kũhũrana na arĩithi acio, na nĩo ngetia mbũri icio ciakwa, njoke ndĩmatigithie kũrĩithia mbũri icio ciakwa, o na kana arĩithi acio macoke kwĩrĩithia o ene o na rĩ; nacio mbũri ciakwa ndĩcihonokie ndĩcirute kanua-inĩ kao, nĩ getha itikae gũtuĩka nyama cia kũrĩo nĩo.
11. Nĩ ũndũ-rĩ, Mwathani Jehova oigĩte ũũ: Atĩrĩrĩ, niĩ, o niĩ mwene-rĩ, nĩ gũcaria ngecarĩria mbũri icio ciakwa, o na ndĩcituĩrie kũrĩa irĩ, na ndĩcione.
12. O ta ũrĩa mũrĩithi athũrimaga mbũri cia rũũru rũake agacicaria mũthenya ũrĩa ikoragwo ihurunjũkĩte-rĩ, ũguo noguo ngathũrima mbũri ciakwa; na nĩngaciruta kũndũ guothe kũrĩa ciahurunjĩirũo mũthenya ũrĩa kwarĩ matu mathimbu o na nduma ndumanu.
13. Nĩ kũgĩra ngacigĩra ndĩcirute ndũrĩrĩ-inĩ, na ndĩcicokanĩrĩrie ciume mabũrũri-inĩ, na ndĩcicokie bũrũri wacio kĩũmbe; nakuo kũu nĩkuo ngacirĩithagia irĩma-inĩ cia Isiraeli igũrũ, o na tũrũũĩ-inĩ, o na kũndũ guothe bũrũri-inĩ ũcio kũrĩa gũtũũrĩtwo nĩ andũ.
14. Ngacirĩithagia kũndũ kũrĩa kũrĩ ũrĩithio mwega, o nacio irĩma-inĩ iria ndaya cia Isiraeli, nĩkuo kiugũ gĩacio gĩgakorũo kĩrĩ ningĩ nĩkuo igakomaga kiugũ kĩega, o na irĩithagio kũndũ kũnoru irĩma-inĩ icio cia Isiraeli.
15. Niĩ mwene nĩ niĩ ngerĩithagĩria mbũri icio ciakwa, na nĩngaciarahagia; ũguo nĩguo Mwathani Jehova oigĩte.
16. Iria ciũrĩte nĩngacicaria, o nacio iria hahũre ndĩcicokithie, ningĩ iria nyunĩku ndĩciohe, o nacio iria ndũaru ndĩciĩkĩre hinya; no iria noru na ikagĩa hinya-rĩ, nĩcio nganina, na ndĩcirĩithie ngĩciherithagia.
17. O naho ha ũhoro wanyu, inyuĩ mbũri cia rũũru rũakwa-rĩ, Mwathani Jehova oigĩte ũũ: Atĩrĩrĩ, nĩ gũteithũrana ngateithũrana ũhiũ, o na ndeithũrane ndũrũme na thenge.
18. Anga mũkuona ta arĩ ũndũ mũnyinyi atĩ mwĩrĩithĩtie ũrĩithio-inĩ ũrĩa mwega, na mũgacoka kũranga na magũrũ nyeki ĩrĩa ndigaru ũrĩithio-inĩ ũcio? O na ningĩ mũkanyua maĩ marĩa makembũku, na mũgacoka kuunjuga na magũrũ manyu marĩa matigarĩte?
19. Naho ha ũhoro wa mbũri ciakwa-rĩ, nĩ kũrĩa irĩaga nyeki ĩrĩa mũrangĩte na makinya manyu, na ikanyua maĩ marĩa muunjugĩte na magũrũ manyu.
20. Tondũ ũcio Mwathani Jehova ekũmera ũũ: Atĩrĩrĩ, niĩ mwene-rĩ, nĩ niĩ ngateithũrana ũhiũ ũrĩa mũnoru na ũrĩa mũhĩnju.
21. Nĩ ũndũ-rĩ, iria hĩnju mũcithinĩkanagia na mwena o na ciande, o nacio iria ndũaru mũgacitindĩka na hĩa, o nginya mũgacihurunja ciothe.
22. Tondũ ũcio, nĩngahonokia mbũri cia rũũru rũakwa, na itigacoka gũtuĩka ta nyamũ cia iguĩma o na rĩ; niĩ nĩ niĩ ngateithũranaga ũhiũ.
23. Na nĩngaciarahũrĩra mũrĩithi ũmwe wa gũcirĩithagia, nake acirĩithagie, nĩwe Daudi, ndungata yakwa; ũcio nĩwe ũgacirĩithagia, na nĩwe ũgatuĩka mũrĩithi wacio.
24. Niĩ na niĩ Jehova nĩ niĩ ngatuĩka Ngai wacio, nayo ndungata yakwa Daudi ĩtuĩke mũnene wacio; niĩ Jehova nĩ niĩ njarĩtie ũhoro ũcio.
25. Na rĩrĩ, nĩ kũrĩkanĩra ngarĩkanĩra nacio atĩ kũgĩe kĩrĩkanĩro gĩa thayũ, nacio nyamũ cia gĩthaka iria njũru nĩngacihukia kũu bũrũri ũcio; nacio igatũũra kũu werũ-inĩ ciĩgangarĩte, na ciarahage mĩtitũ-inĩ.
26. Na nĩngacirathima cio nyene o na ndathime kũndũ kũrĩa gũthiũrũrũkĩirie kĩrĩma gĩakwa; na njoke ndũme mbura yurage mũringo wayo wakinya, kuurage mbura ya kũrehe kĩrathimo.
27. Nayo mĩtĩ ya mũgũnda nĩĩgaciaraga maciaro mayo, o nayo thĩ ĩrute uumithio wayo, nacio nĩigaikara ciĩgangarĩte kũu bũrũri wacio; na imenye atĩ niĩ nĩ niĩ Jehova, hĩndĩ ĩrĩa ngakorũo nyunangĩte mĩtĩ yacio ya ngingo, o na ngorũo ndĩcihonoketie ngaciruta moko-inĩ ma andũ acio maacituĩte ngombo.
28. Nacio itigacoka gũtuwo ta nyamũ cia iguĩma nĩ ndũrĩrĩ iria itetĩkĩtie, o na kana icoke kũrĩo nĩ nyamũ cia gĩthaka cia thĩ ĩno; no rĩrĩ, nĩ gũikara igaikara ciĩgangarĩte, na gũtirĩ mũndũ o na ũmwe ũgaciguoyohia.
29. Na nĩngacithondekera ũrĩithio mũnoru wĩ igweta inene, na itigacoka kũninwo nĩ ng’aragu irĩ kũu bũrũri ũcio, kana iconorithio nĩ ndũrĩrĩ iria itetĩkĩtie o na rĩ.
30. Nacio nĩikamenya atĩ niĩ Jehova Ngai wacio ndĩ hamwe nacio, na atĩ nĩo andũ akwa, o andũ a nyũmba ya Isiraeli; ũguo nĩguo Mwathani Jehova oigĩte.
31. Tondũ-rĩ, inyuĩ mbũri ciakwa, o inyuĩ ndĩĩrĩithagĩria ũrĩithio-inĩ wakwa-rĩ, nĩ inyuĩ andũ akwa, na niĩ ndĩ Ngai wanyu; ũguo nĩguo Mwathani Jehova oigĩte.

Home