Go Back

Ezekieli Chapter 3

• 1. Nake akĩnjĩra atĩrĩ, Wee mũrũ wa mũndũ, wĩrĩĩre kĩrĩa wona; wĩrĩĩre ibuku rĩrĩ, ũcoke ũthiĩ, ũkaarie na nyũmba ya Isiraeli.
• 2. Tondũ ũcio ngĩgĩathamia kanua, nake agĩtũma ndĩĩrĩĩre ibuku rĩu.
• 3. Ningĩ akĩnjĩra atĩrĩ, Mũrũ wa mũndũ, hũnia nda yaku, na ũiyũrie ngoro yaku mohoro marĩa marĩ ibuku-inĩ rĩu ngũheete. Hĩndĩ ĩo ngĩgĩcoka ngĩrĩrĩa; narĩo rĩacamaga ta ũũkĩ rĩĩ kanua gakwa nĩ ũndũ wa ũrĩa rĩarĩ mũrĩo.
• 4. Ningĩ akĩnjĩra atĩrĩ, Mũrũ wa mũndũ, thiĩ ũkinye kũrĩ andũ a nyũmba ya Isiraeli, ũmahe ũhoro wakwa ũrĩa ngũheete.
• 5. Nĩ gũkorũo ndũreketio kũrĩ andũ a mwarĩrie wa kũngĩ, o na kana a rũthiomi rũĩ hinya, tiga o harĩ andũ a nyũmba ya Isiraeli;
• 6. ningĩ ti harĩ andũ a ndũrĩrĩ nyingĩ arĩa maaragia na mĩarĩrie ya kũngĩ, kana magathioma thiomi irĩ hinya, o arĩa ũtangĩhota kũigua ũhoro wao. Korũo ngũkũrekia kũrĩ o-rĩ, ti-itherũ maakũigua.
• 7. No rĩrĩ, andũ a nyũmba ya Isiraeli matigakũigua, nĩ ũndũ o na niĩ matinjiguaga nĩ gũkorũo andũ othe a nyũmba ya Isiraeli nĩmahetete gĩthiithi na makoma ngoro.
• 8. Atĩrĩrĩ, niĩ o na niĩ-rĩ, nĩndũmĩte ũthiũ waku ũũmĩrie mothiũ mao, o naguo thiithi waku ũũmĩrie mathiithi mao.
• 9. Nĩndũmĩte ũmomĩrie thiithi o ta ũrĩa ihiga rĩa arimathi rĩũmĩte gũkĩra ihiga rĩa nyaigĩ. Menya ũmetigĩre o na kana ũirio ngoro nĩ mĩrorere yao, o na harĩa kĩruka kĩu kĩao kĩrĩ kĩremu o na rĩu.
• 10. O na ningĩ akĩnjĩra atĩrĩ, Mũrũ wa mũndũ, mohoro makwa mothe marĩa ngũkũhe, maigue na matũ maku, na ũmekĩre ngoro-inĩ yaku thĩinĩ.
• 11. Na rĩrĩ, thiĩ, ũkinye harĩ andũ arĩa matũire marĩ atahe, o ciana cia andũ aku, warie nao, ũmere atĩrĩ, Mwathani Jehova oigĩte ũna na ũna, o na mangĩkorũo nĩmekũigua, o na kana marege kũigua.
• 12. Hĩndĩ ĩo Roho agĩkĩnjoya na igũrũ, ngĩigua mũgambo na thutha wakwa ta wa mũgũũthũko mũnene ũkiuga atĩrĩ, Kũgoocwo-rĩ, nĩ Jehova, nĩ ũndũ wa riri wake, o ũcio wonagwo uumĩte kũndũ gwake.
• 13. Ningĩ ngĩigua mathagu ma ciũmbe icio irĩ muoyo makĩgamba makĩhutahutania, na ngĩigua mũgambo wa magũrũ macio maathiaga me mĩena-inĩ yacio, ngĩcoka ngĩigua ta arĩ mũrurumo wa mũgũũthũko mũnene.
• 14. Ũguo nĩguo Roho aanjoire na igũrũ. Na rĩrĩ, akĩnjeheria hau; na niĩ ngĩthiĩ njiguĩte ruo mũno ngoro, na ng’ũrĩkĩte; na ngĩigua ta ’nyitĩtwo nĩ guoko kwa Jehova na hinya mũno.
• 15. Na atĩrĩrĩ, hĩndĩ ĩo ngĩgĩthiĩ ngĩkinya kũrĩ andũ acio maatahĩtwo o kũu Teli-abibu, o acio maatũũrĩte gũkuhĩ na rũũĩ rũa Kebari, ngĩkinya o kũu maatũũraga; ngĩgĩikara ta matukũ mũgwanja hamwe nao ’makĩte.
• 16. Na gũgĩkinya atĩrĩ, atĩ matukũ macio mũgwanja maathira, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 17. Mũrũ wa mũndũ, nĩngũtuĩte mũrangĩri wa nyũmba ya Isiraeli. Tondũ ũcio igua ũhoro ũrĩa ũkuuma kanua gakwa, na ũmahe ũhoro uumĩte kũrĩ niĩ wa atĩ memenyerere.
• 18. Hĩndĩ ĩrĩa ngwĩra mũndũ mwaganu ũũ: Wee ti-itherũ nĩũgũkua, nawe wage kũmũhe ũhoro wa atĩ emenyerere, o na kana warĩrie mũndũ ũcio mwaganu nĩguo emenyerere atigane na waganu ũcio wake ahonokie muoyo wake-rĩ, mũndũ ũcio mwaganu nĩagakua arĩ o mwaganu; no rĩrĩ, wee nĩwe ngacokereria gĩkuũ kĩu gĩake.
• 19. No rĩrĩ, ũngĩĩra mũndũ ũcio mwaganu emenyerere waganu ũcio wake, nake aage kũgarũrũka atigane naguo, o na kana atigane na mĩthiĩre ĩo yake ya waganu-rĩ, ti-itherũ nĩagakua arĩ o mwaganu; no wee nĩwahonokia muoyo waku arĩ wee.
• 20. Ningĩ-rĩ, hĩndĩ ĩrĩa mũndũ mũthingu angĩthingũka, eke maũndũ ma waganu, na niĩ ndĩmũigĩre ũndũ wa kũmũhĩngithia mbere yake, nĩagakua; na rĩrĩ, ũngĩkorũo ndũigana kũmũhe ũhoro wa gũtũma emenyerere, agakua arĩ o na mehia make, namo maũndũ make marĩa ekĩte ma ũthingu matikaririkanwo; no rĩrĩ, wee nĩwe ngacokereria gĩkuũ kĩu gĩake.
• 21. No rĩrĩ, ũngĩhe mũndũ ũcio mũthingu ũhoro wa atĩ emenyerere, nĩguo aage kwĩhia, nake aage kwĩhia-rĩ, ti-itherũ nĩagatũũra muoyo nĩ ũndũ wa ũrĩa aaiguire ũhoro ũcio wamwĩrire wa atĩ emenyerere; wee nawe nĩwahonokia muoyo waku.
• 22. Na rĩrĩ, ngĩcoka ngĩigua ta njigĩrĩirũo guoko kwa Jehova ndĩ o kũu, nake akĩnjĩra atĩrĩ, Ũkĩra ũthiĩ ũrorete werũ ũrĩa mwaraganu, nakuo kũu nĩkuo ngaarĩria nawe.
• 23. Hĩndĩ ĩo ngĩgĩũkĩra, ngĩthiĩ na kũu werũ ũcio mwaraganu; na rĩrĩ, riri wa Jehova ũkĩoneka ũrũgamĩte kuo, o ta ũrĩa ndawonete kũu rũũĩ-inĩ rũa Kebari; niĩ na niĩ ngĩĩgũithia ngĩturumithia ũthiũ thĩ.
• 24. Hĩndĩ ĩo Roho wa Ngai akĩndonya thĩinĩ, nake agĩcoka akĩndũgamia na magũrũ; nake akĩaria na niĩ, akĩnjĩra atĩrĩ, Thiĩ ũkehingĩre gwaku nyũmba.
• 25. No rĩrĩ, wee, mũrũ wa mũndũ, menya atĩ andũ acio nĩmagakuoha na mĩhĩndo, na ndũgacoka gũcangacanga thĩinĩ wao.
• 26. Niĩ na niĩ nĩngatũma rũrĩmĩ rũaku rũnyitane na karakara wa kanua gaku, nawe nĩũkahingara kanua ũtuĩke ta kĩrimũ gĩtaaragia, nĩguo ndũkamarũithie. Tondũ kĩruka gĩkĩ nĩ kĩremu o na rĩu.
• 27. No rĩrĩ, rĩrĩa ngacoka gũkwarĩria-rĩ, nĩ gũtumũra ngagũtumũra kanua, nĩ getha ũmere atĩrĩ, Mwathani Jehova oigĩte ũũ: Mũndũ ũrĩa ũkũigua nĩakĩigue; nake ũrĩa ũkũrega kũigua nĩakĩrege; nĩ gũkorũo o nĩ kĩruka kĩremu o na rĩu.

Home