Go Back

Ezekieli Chapter 29

• 1. Na rĩrĩ, mwaka wa ikũmi, o mweri wa ikũmi, mũthenya wa ikũmi na ĩĩrĩ wa mweri ũcio-rĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 2. Mũrũ wa mũndũ, ikara ũroretie ũthiũ waku kwĩ Firauni, mũthamaki wa Misiri, ũrathe ũhoro wake, o na wa bũrũri wothe wa Misiri,
• 3. warie, uuge atĩrĩ, Mwathani Jehova oigĩte ũũ: Atĩrĩrĩ, ndĩ wa kũhũrana nawe, wee Firauni, mũthamaki wa Misiri, o wee ũhaana ta kĩng’ang’i kĩnene kĩrĩa kĩmamaga njũĩ-inĩ ciakĩo thĩinĩ, nakĩo nĩkĩo kiugĩte atĩrĩ, Rũũĩ rũrũ rũakwa nĩ rũakwa kĩũmbe, na nĩ niĩ ndatũmire rũtherere na hinya wakwa kĩũmbe.
• 4. Niĩ-rĩ, nĩ gwĩkĩra ngagwĩkĩra ndwano thĩa-inĩ ciaku, njoke ndũme ciũngũyũ cia njũĩ ciaku ikwĩnyitĩrĩre mũng’ũng’ũtũ-inĩ; na thutha wa ũguo ngwambatie ngũrute kũu njũĩ-inĩ ciaku thĩinĩ, hamwe na ciũngũyũ ciothe cia njũĩ ciaku iria ikwĩnyitĩrĩire mũng’ũng’ũtũ-inĩ.
• 5. Ngagũtiga waikio werũ-inĩ, wee mwene o na ciũngũyũ icio ciothe cia njũĩ ciaku; nawe ũkagũa kũu baraganya-inĩ, na ndũkoererũo, o na kana ũcokererio; nĩ kũneana ngũneanĩte ũtuĩke nyama cia kũrĩo nĩ nyamũ cia gĩthaka cia gũkũ thĩ, o na nyamũ cia rĩera-inĩ.
• 6. Nao andũ othe arĩa matũũraga Misiri nĩmakamenya atĩ niĩ nĩ niĩ Jehova, nĩ ũndũ nĩo matiirĩte nyũmba ya Isiraeli na kamũrangi ta arĩ ko mũthĩgi,
• 7. tondũ hĩndĩ ĩrĩa maakwĩnyitĩire na guoko-rĩ, nĩ kuunĩka woinĩkire na ũgĩkĩmatarũranga ciande ciao othe; na rĩrĩa metiiranirie nawe, ũkiunĩka, na ũgĩtũma njuthĩ ciao ciinaine.
• 8. Tondũ ũcio Mwathani Jehova oigĩte ũũ: Atĩrĩrĩ, nĩngagũcomorithĩria rũhiũ rũa njora, ’ninithie andũ aku o na ũhiũ waku biũ,
• 9. na ndũme bũrũri wa Misiri wanangwo ũkire ihooru; nao nĩmakamenya atĩ niĩ nĩ niĩ Jehova, tondũ nĩ kuuga oigire atĩrĩ, Rũũĩ rũrũ nĩ rũakwa kĩũmbe, na nĩ niĩ ndatũmire rũtherere na hinya wakwa.
• 10. Atĩrĩrĩ, tondũ wa ũhoro ũcio ndĩ wa kũhũrana nawe, mwĩ na njũĩ ciaku, na nĩngagĩtũma bũrũri wa Misiri wanangwo, ũkire ihooru, kuuma o Migidoli o nginya Sevene, o na nginya o mũhaka-inĩ wa Kushi.
• 11. Gũtirĩ ikinya rĩa mũndũ rĩgacoka gũtuĩkania kuo, o na kana kũgũrũ kwa nyamũ gũtuĩkanie kuo, o na kana gũcoke gũtũũrũo nĩ andũ ihinda rĩa mĩaka mĩrongo ĩna.
• 12. Na nĩngatũma bũrũri wa Misiri ũikare wanangĩkĩte wĩ hamwe na mabũrũri marĩa mangĩ maanangĩku, o namo matũũra maguo marĩa maanangĩkĩte makiranĩre ihooru hamwe na matũũra marĩa mangĩ maanangĩkĩte ũguo, ihinda rĩa mĩaka mĩrongo ĩna; nao Amisiri ndĩmahurunjĩre ndũrĩrĩ-inĩ na ndĩmaharaganĩrie mabũrũri.
• 13. Amu Mwathani Jehova oigĩte ũũ: Mĩaka mĩrongo ĩna yathira-rĩ, nĩngacokanĩrĩria Amisiri ndĩmarute ndũrĩrĩ-inĩ iria maahurunjĩirũo;
• 14. nao andũ arĩa maatahĩtwo a Misiri nĩngatũma macoke bũrũri wa Pathirosi, o bũrũri ũcio maaciarĩirũo; nao maikare kuo manyihĩirũo nĩ hinya wa gwathana,
• 15. naguo ũthamaki ũcio ũnyihe gũkĩra mothamaki marĩa mangĩ mothe, na ndũcoke kwĩneneheria ndũrĩrĩ iria ingĩ. Na rĩrĩ, niĩ nĩ niĩ ngamanyihia nĩ getha matikanacoke gũthamakĩra ndũrĩrĩ iria ingĩ o na rĩ.
• 16. Na matigacoka kwĩhokerũo ũteithio nĩ nyũmba ya Isiraeli, kana matũme waganu wayo ũririkanwo rĩrĩa ĩmahũgũkĩire; nao nĩmakamenya atĩ niĩ nĩ niĩ Mwathani Jehova.
• 17. Na gũgĩkinya atĩrĩ, atĩ mwaka wa mĩrongo ĩĩrĩ na mũgwanja, o mweri wa mbere, mũthenya wa mbere wa mweri ũcio-rĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 18. Mũrũ wa mũndũ, Nebukadirezaru, mũthamaki wa Babuloni, nĩaatũmire mbũtũ ciake cia ita imũtungatĩre ũtungati mũnene wa kũhũra Turo, o nginya mĩtwe yothe ĩkĩmunyũka njuĩrĩ, o nacio ciande ciothe ikĩũnũka; no rĩrĩ, ndaigana kuona mũcara wa wĩra ũcio wake aarutire Turo, we mwene o na kana mbũtũ ciake cia ita.
• 19. Tondũ ũcio Mwathani Jehova oigĩte ũũ: Atĩrĩrĩ, bũrũri wa Misiri nĩguo ngũhe Nebukadirezaru, mũthamaki wa Babuloni, nĩguo arindũre kĩrĩndĩ kĩingĩ kĩaguo, na atahe indo ciaguo, na athiĩ na indo ciaguo iria atunyanĩte kuo; nacio nĩcio igatuĩka mũcara wa mbũtũ ciake cia ita.
• 20. Niĩ nĩ niĩ ndĩmũheete bũrũri wa Misiri; ũtuĩke irĩhi rĩake rĩa wĩra ũrĩa aarutire, nĩ ũndũ nĩ niĩ maarutĩire wĩra ũcio; ũguo nĩguo Mwathani Jehova oigĩte.
• 21. Mũthenya ũcio-rĩ, nĩngatũma rũhĩa rũthundũke thĩinĩ wa nyũmba ya Isiraeli; ningĩ ndũme wee ũgĩe na mĩaramano ya gũtumũrĩra kanua o kũu thĩinĩ wayo; nao andũ ayo nĩmakamenya atĩ niĩ nĩ niĩ Jehova.

Home