Go Back

Ezekieli Chapter 27

• 1. Na rĩrĩ, ndũmĩrĩri ya Jehova ĩkĩnginyĩrĩra rĩngĩ, ngĩĩrũo atĩrĩ,
• 2. Wee, mũrũ wa mũndũ, itĩkana na macakaya ũcakaĩre Turo;
• 3. wĩre Turo atĩrĩ, Hĩ! Wee ũikaraga itobokero-inĩ rĩa iria, o wee ũgĩraga thũgũrĩ wa ndũrĩrĩ ithama-inĩ nyingĩ-rĩ, Mwathani Jehova oigĩte ũũ: Wee, o wee Turo, uugĩte atĩrĩ, Niĩ ndĩ mũkinyanĩru ngathakara biũ.
• 4. Mĩhaka yaku ĩrĩ o ndĩra-inĩ cia maria; nao agwaki aku nĩo maatũmire gũthakara gwaku gũkinyanĩre.
• 5. Mbaũ ciaku ciothe iria ndungu maacithondekire cia mĩthengera ĩrutĩtwo Seniru; ningĩ makĩoya mĩtarakwa mamĩrutĩte Lebanoni nĩguo magũthondekere mũtĩ ũrĩa mũraya wa kĩbebero.
• 6. O nayo mĩtĩ yaku ya gũtwara marikabu maamĩthondekire na mĩgandi ya Bashani; o nacio mbaũ ciaku magĩcithondeka na mĩguongo ĩhumbĩrĩte mĩtĩ ĩrĩa ĩĩtagwo mĩhugu ĩrutĩtwo ithama-inĩ cia Kitimu.
• 7. O naguo tama waku ũrĩa ũtwaraga marikabu warĩ wa gatani ĩrĩa njega ĩtirihĩtwo wega ĩrutĩtwo Misiri, nĩ getha ũtuĩke kĩbebero gĩaku, nakĩo kĩandarũa gĩa gũkũhumbĩra, kĩĩ na rangi wa bururu o na wa zambarau, kĩoimĩte ithama-inĩ cia Elisha.
• 8. Andũ arĩa matũũraga Zidoni na Arivadi nĩo maatindĩkaga marikabu ciaku na mĩtĩ; ningĩ andũ aku arĩa ogĩ nĩo maarĩ thĩinĩ waku, wee Turo, na nĩo maarĩ atwari marikabu ciaku.
• 9. Athuri a Gebali, o na andũ akuo arĩa ogĩ, nĩo maakũrutagĩra wĩra wa gũtuma mĩanya ya mbaũ cia marikabu cianyu; ningĩ marikabu ciothe cia iria-inĩ hamwe na aruti wĩra wacio maakoragwo harĩ wee nĩ getha mũthogorane nao.
• 10. Andũ a Perisia na Ludu na Putu maarĩ mbũtũ-inĩ ciaku cia athigari, na nĩo maarĩ andũ aku a ita; nao maahocagia ngo ciao o kũu thĩinĩ waku, o na itukũ ciao cia igera; noguo maatũmaga ũthaka waku ũkinyanĩre.
• 11. Andũ a Arivadi, hamwe na mbũtũ ciaku cia athigari, maarĩ thingo-inĩ ciaku igũrũ kũrigicĩria mbarĩ ciothe, nao Agamadi maarĩ mĩthiringo-inĩ yaku ya nyũmba iria ndaya na igũrũ, nao maahocagia ngo ciao njirigo-inĩ ciaku ciothe igũrũ kũrigicĩria mbarĩ ciothe; nao nĩo maatũmaga ũthaka waku ũkinyanĩre.
• 12. Tarishishi nĩkuo wathũgũraga indo nĩ ũndũ wa ũrĩa kwarĩ ũtonga wa mĩthemba yothe, na ũgakũũrania indo ciaku wee mwene na ciao cia betha, na kĩgera, na kĩgera kĩa ibaba, o na ngocorai.
• 13. Javani, na Tubali, na Mesheki nĩo mwonjorithagia nao, na mũgakũũrania thũgũrĩ waku na ngombo ciao o na indo ciao cia gĩcango.
• 14. Andũ a nyũmba ya Togarima maakũũranagia indo ciaku cia wonjorithia na mbarathi ciao, o na mbarathi ciao cia ita, o na nyũmbũ ciao.
• 15. Ningĩ andũ a Dedani o nao mwonjorithanagĩria nao ithama-inĩ nyingĩ ta irĩ ing’ang’a, na nĩkuo maakũrehagĩre hĩa cia mĩguongo, o na mĩbĩngũ, ya gũkũũranio na indo ciaku.
• 16. Suriata nakuo nĩkuo wagĩraga thũgũrĩ na indo ciaku cia wĩra wa moko maku iria waingĩhĩtie mũno, nacio igakũũranio na tũhiga twa thumarati, na zambarau, o na nguo ndirihe wega, na gatani ĩrĩa njega, na maricani, o na tũhiga twa goro tũrĩa tũtune.
• 17. Ningĩ andũ a Juda o na a bũrũri wa Isiraeli nĩo mwonjorithagia nao, nao maakũũranagia indo ciaku na ngano ciao cia Minithu, na theremende, na ũũkĩ, na maguta, na ubani.
• 18. Ningĩ Dameski nĩkuo wagĩraga thũgũrĩ wa indo ciaku cia wĩra wa moko maku iria waingĩhĩtie mũno, o na ũtonga waku ũrĩa waingĩhĩtie wa mĩthemba mĩingĩ; nacio igakũũranio na ndibei ya Helibona, o na guoya mwerũ wa ng’ondu.
• 19. O na ningĩ Vedani na Javani nĩo maagĩraga indo ciaku cia wonjorithia mokĩte na ciohe cia ndigi; ningĩ igera iria ndure, na mahuti marĩa manungi wega ma mũtĩ mũtarathini o na mahuti ma rũũĩ-inĩ ma mũthemba wĩ mũrĩo, nĩciakoragwo thũgũrĩ-inĩ waku.
• 20. Dedani nĩwe mwonjorithagia nake na nguo iria irĩ goro cia matandĩko ma mbarathi.
• 21. Andũ a bũrũri wa Arabia, o na anene othe a Kedari, nĩo mokaga harĩ wee nĩ getha makũrehere tũgondu, na ndũrũme, na mbũri, nĩguo monjorithagie nacio harĩ wee.
• 22. Onjorithia a Sheba o na Raama-rĩ, nĩo mwonjorithagia nao; nacio indo ciaku cia wonjorithia ciakũũranagio na mahuti mao marĩa manungaga wega mĩthemba ĩrĩa mĩega makĩria, na mĩthemba yao yothe ya tũhiga twa goro, o na thahabu yao.
• 23. Andũ a Harani, na Kane, na Edeni, me hamwe na onjorithia a Sheba, na Ashuri, na Kilimadi, nĩo mwonjorithagia nao.
• 24. Acio nĩo mwonjorithagia nao indo cia bata mũno, na ciohe nene cia nguo cia rangi wa bururu, na nguo iria ndirihe wega, o na nguo cia matonyo njega mũno, ciiyũrĩte mathandũkũ ma mĩtarakwa mohetwo na mĩhĩndo, nĩciakoragwo thũgũrĩ-inĩ waku.
• 25. Marikabu cia Tarishishi nĩcio ciakũrehagĩre thũgũrĩ waku; nawe ũkĩongerereka ũkĩingĩha mũno, na ũgĩĩkĩrĩrũo mũno o nginya ndĩra-inĩ cia maria.
• 26. No rĩrĩ, atwari aku a marikabu magũtwarĩte kũndũ kũrĩa kũriku mũno, naruo rũhuho rũa mwena wa irathĩro-inĩ rũgakuunangĩra kũu ndĩra-inĩ icio cia maria.
• 27. Na nĩgũgakinya atĩrĩ, atĩ mũthenya ũrĩa ũhoro waku wa kũninwo ũgakinya, ũtonga waku, na indo ciaku cia kwendia, o na thũgũrĩ waku, na aruti wĩra aku a marikabu, na atwari marikabu ciaku, na andũ arĩa makũrutagĩra wĩra wa gũtuma mĩanya ya mbaũ cia marikabu icio cianyu, na agĩri a thũgũrĩ waku, o na andũ aku othe a ita, o arĩa magakorũo marĩ thĩinĩ waku, o na kĩrĩndĩ gĩaku gĩothe kĩrĩa gĩgakorũo kĩrĩ thĩinĩ waku-rĩ, ciothe nĩikagũa irike o kũu rũrĩra-inĩ rũa iria, ciũrĩre kuo.
• 28. Na rĩrĩ, makũmbĩ ma iria nĩmarathũngũthio nĩ kayũ ka mbu ya atwari marikabu ciaku;
• 29. nao atindĩki marikabu na mĩtĩ, na aruti wĩra wacio wothe, o na atwari othe a marikabu kũu iria-inĩ, makaharũrũka othe moime marikabu-inĩ ciao, marũgame hũgũrũrũ-inĩ,
• 30. maanĩrĩre nĩ ũndũ waku, na makũrĩrĩre na kĩgi, na meitĩrĩrie rũkũngũ mĩtwe, na megaragarie mũhu-inĩ;
• 31. na metue ihara mũtwe nĩ ũndũ waku, na meohe tama wa ikũnia, na makũrĩrĩre maiguĩte ũũru mũno mũno na ngoro ciao, o na kĩeha.
• 32. Na hĩndĩ ĩo mekũrĩra ũguo-rĩ, magwate gũgũcakaĩra, na makũrĩrĩre makiugaga atĩrĩ, Hĩ! Nĩ itũũra rĩrĩkũ rĩtariĩ ta Turo, o na rĩkahaana ta itũũra rĩu rĩkirĩtio ngiria kũu iria-inĩ?
• 33. Hĩndĩ ĩrĩa indo ciaku cia wonjorithia ciatwaragwo hũgũrũrũ-inĩ iria ingĩ cia iria-inĩ, nĩwaciyũragia ndũrĩrĩ nyingĩ, na ũgatongia athamaki a thĩ na ũndũ wa ũrĩa waingĩhĩtie ũtonga o na thũgũrĩ.
• 34. No rĩrĩ, rĩu nĩ gũthario ũtharĩtio nĩ maria o kũu maĩ marikĩire mũno, naguo thũgũrĩ waku, o na kĩrĩndĩ gĩaku gĩothe, nĩ kũgũa igũĩte o kũu thĩinĩ waku.
• 35. Nao andũ othe arĩa matũũraga ithama-inĩ nĩ kũmaka mamakĩte nĩ ũndũ waku, nao athamaki akuo nĩ etigĩru mũno mũno, nacio ithiithi ciao ikonwo ta irĩ na gĩtangĩko kĩnene.
• 36. Onjorithia a ndũrĩrĩ nĩ kuuga moigaga hi-i-i! nĩ ũndũ waku, nawe ũgatuĩka ũndũ wa kũguoyohania, na ndũgacoka kuonwo o na rĩ.

Home