Go Back

Ezekieli Chapter 25

• 1. NA RĨRĨ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 2. Mũrũ wa mũndũ, ikara ũroretie ũthiũ waku harĩ ciana cia Amoni, ũcirathĩre ũhoro,
• 3. wĩre ciana icio cia Amoni atĩrĩ, Ta iguai ũhoro wa Mwathani Jehova. Mwathani Jehova oigĩte ũũ: Tondũ wa ũrĩa woigire, Aha! nĩ ũndũ wa handũ hakwa harĩa haamũre, hĩndĩ ĩrĩa haathahirio, o na ũgĩkenera bũrũri wa Isiraeli hĩndĩ ĩrĩa waanangĩkire, o na nyũmba ya Juda hĩndĩ ĩrĩa andũ ayo maatahirũo-rĩ,
• 4. atĩrĩrĩ, tondũ wa ũhoro ũcio nĩngakũrekereria ngũneane wĩgwatĩrũo nĩ ciana cia mwena wa irathĩro, nacio nĩikaamba hema thĩinĩ waku, na ciake matũũra ma cio thĩinĩ waku; nacio nĩikarĩa maciaro ma mĩgũnda yaku, na inyue iria rĩa ũhiũ waku.
• 5. Nakuo Raba ngagũtua kiugũ kĩa ngamĩra, nakuo gwa ciana cia Amoni ndĩgũtue gwa gũkomagwo nĩ ndũru cia ũhiũ; na nĩmũkamenya atĩ niĩ nĩ niĩ Jehova.
• 6. Nĩ ũndũ Mwathani Jehova oigĩte ũũ: Tondũ nĩ kũhũra ũhũrĩte hĩ, na ũkarumia thĩ na makinya maku ũgĩkenagĩrĩra bũrũri wa Isiraeli ũũirĩire ngoro-rĩ,
• 7. atĩrĩrĩ, tondũ ũcio nĩngũtambũrũkĩirie guoko gwakwa, na nĩngũkũrekereria ngũneane ũtahwo nĩ ndũrĩrĩ, na nĩngakũhukia biũ ũthire ndũrĩrĩ-inĩ, na ndũme ũũre biũ, wehere mabũrũri-inĩ; nĩ kũnina ngakũnina; na nĩũkamenya atĩ niĩ nĩ niĩ Jehova.
• 8. Mwathani Jehova oigĩte atĩrĩ, Kuona atĩ Moabi na Seiru moigĩte ũũ: Atĩrĩrĩ, nyũmba ya Juda ĩtariĩ o ta ndũrĩrĩ iria ingĩ ciothe-rĩ,
• 9. atĩrĩrĩ, tondũ ũcio, nĩngaagithia bũrũri wa Moabi kĩgitĩri kĩa matũũra maguo ma hinya, o marĩa maakĩtwo mũhaka-inĩ waguo, na nĩmo monagwo ta marĩ mwĩhoko wa bũrũri ũcio, namo nĩmo Bethi-jeshimothu, na Baali-meoni, na Kiriathaimu,
• 10. ndĩũhingũrithĩrie ciana cia mwena wa irathĩro, nĩguo itharĩkĩre ciana iria cia Amoni, na nĩngacineana ciĩgwatĩrũo nĩcio, nĩ getha ciana icio cia Amoni itikanacoke kũririkanwo thĩinĩ wa ndũrĩrĩ o na rĩ;
• 11. niĩ na niĩ nĩngahingĩria Moabi matuĩro ma cira wakuo; nao andũ akuo nĩmakamenya atĩ niĩ nĩ niĩ Jehova.
• 12. Mwathani Jehova oigĩte atĩrĩ, Tondũ Edomu nĩagerete nyũmba ya Juda ngero njũru cia kwĩrĩhĩria, na nĩehĩtie mũno, na akerĩhĩria harĩ o-rĩ,
• 13. tondũ ũcio Mwathani Jehova oigĩte ũũ: Nĩ gũtambũrũkia ngatambũrũkĩria Edomu guoko gwakwa, na nĩngahukia mũndũ o wothe ũrĩa ũrĩ kuo o na ũhiũ wothe ũrĩa ũrĩ kuo, ũthire biũ; na nĩngatũma kwanangĩke kuuma o Temani; ningĩ makagũa moragĩtwo na rũhiũ rũa njora o nginya Dedani.
• 14. Na niĩ nĩngerĩhĩria harĩ Edomu na guoko kwa andũ akwa Isiraeli; nao nĩmageka Edomu maũndũ maringaine na marakara makwa, o na mathũgũta makwa, nao nĩmakamenya ũrĩa ndĩĩrĩhagĩria; ũguo nĩguo Mwathani Jehova oigĩte.
• 15. Ningĩ Mwathani Jehova oigĩte ũũ: Tondũ Afilisiti nĩmekĩte maũndũ ma kwĩrĩhĩria, na makerĩhĩria mairĩte ngoro, na makaanangana na rũmena rũtarĩ ihaki-rĩ,
• 16. tondũ ũcio Mwathani Jehova oigĩte ũũ: Atĩrĩrĩ, nĩngatambũrũkĩria Afilisiti guoko gwakwa, nao Akerethi ndĩmahukie biũ, o na ’ninũkie matigari ma andũ arĩa matũũraga hũgũrũrũ-inĩ cia iria.
• 17. Na nĩngerĩhĩria rĩĩrĩhĩria inene harĩ o, na ndĩmarũithie na mathũgũta manene ma ngũmano; nao nĩmakamenya atĩ niĩ nĩ niĩ Jehova, hĩndĩ ĩrĩa ngerĩhĩria harĩ o.

Home