Go Back

Ezekieli Chapter 24

• 1. O na ningĩ mwaka wa kenda na mweri wa ikũmi, mũthenya wa ikũmi wa mweri ũcio-rĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 2. Mũrũ wa mũndũ, wĩandĩkĩre rĩĩtwa rĩa mũthenya ũyũ, o ũyũ wa ũmũthĩ kĩũmbe; tondũ mũthenya o ro ũyũ wa ũmũthĩ kĩũmbe nĩguo mũthamaki wa Babuloni athengereire Jerusalemu.
• 3. Arĩria kĩruka gĩkĩ kĩremu na ngerekano, ũkĩĩre atĩrĩ, Mwathani Jehova oigĩte ũũ: Hagĩra gĩteng’ũ kĩa nyũngũ; kĩhagĩre, o na ũkĩonorerie maĩ,
• 4. ũkĩũnganĩrie mĩnuku, o na icunjĩ iria njega ciothe, ta kĩero, o na kĩande; ũkĩiyũrie mahĩndĩ marĩa mega.
• 5. Ningĩ ũnyite ndũrũme ĩrĩa noru rũũru-inĩ, namo mahĩndĩ ũmaige hĩba ruungu rũayo ta arĩ mo ngũ, ũreke ĩtherũke wega; ĩĩ, ti-itherũ reke mahĩndĩ mahĩĩre mũno o kũu thĩinĩ wayo.
• 6. Tondũ ũcio Mwathani Jehova oigĩte ũũ: Kaĩ itũũra rĩrĩa rĩitithagia thakame rĩĩ na haaro-ĩ! Narĩo nĩrĩo rĩtuĩkĩte ta nyũngũ ĩrotete, o ĩrĩa ĩtathirĩtwo nĩ ũrotu ũrĩa wĩ thĩinĩ wayo. Mĩrute tũnuku tuothe, o kamwe kamwe ũtegũthurania.
• 7. Nĩ gũkorũo thakame ĩrĩa rĩitithĩtie ĩrĩ o kũu thĩinĩ warĩo; rĩamĩitire o kũu rũaro-inĩ rũa ihiga ĩgũrũ, na rĩtiamĩitire thĩ, nĩguo ĩthikwo nĩ tĩri.
• 8. Niĩ o na niĩ njitĩte thakame yarĩo rĩo rĩene rũaro-inĩ rũa ihiga igũrũ, na ndĩkahithĩka, nĩ getha ĩtũme mathũgũta ma kwĩrĩhĩria moneke.
• 9. Tondũ ũcio Mwathani Jehova oigĩte ũũ: Kaĩ itũũra rĩrĩa rĩitithagĩrio thakame rĩĩ na haaro-ĩ! Niĩ na niĩ-rĩ, nĩ niĩ ngatũma hĩba ĩo ya ngũ ĩnenehe.
• 10. Ũmbĩrĩra ngũ nyingĩ nĩguo mwaki wakane mũno, ũruge nyama icio ihĩe wega, na ũmatie thathi, na ũreke mahĩndĩ macinwo.
• 11. Ningĩ ũmĩige ĩrĩ theri makara-inĩ, nĩguo ĩhiũhe mũno, na gĩcango kĩayo kĩhĩe, nĩ getha gĩko kĩayo gĩtweke o nakuo kũrota kũrĩa ĩrotete gũthire biũ.
• 12. Ti-itherũ rĩĩnogetie rĩkĩruta wĩra wa tũhũ; no rĩrĩ, ũrotu ũrĩa mũnene warĩo ndũthiraga; ũrotu ũcio warĩo ndũninagwo nĩ mwaki.
• 13. Waga-thoni waku wĩ magigi: nĩ ũndũ nĩngũtheretie na ũkaaga gũthera, nawe ndũgacoka gũtherio gĩko gĩaku o na atĩa, o nginya hĩndĩ ĩrĩa ngehũnĩrĩria mathũgũta makwa nawe.
• 14. Niĩ Jehova nĩ niĩ njarĩtie ũhoro ũcio, naguo ndũrĩ hingo ũtakahingio, na nĩ niĩ ngawĩka; na ndikaũtiga, o na kana njayanĩre, o na kana ndĩĩricũkwo. O ta ũrĩa mĩthiĩre yaku ĩtariĩ, o na ta ũrĩa ciĩko ciaku itariĩ, noguo magagũtuĩra cira, ũguo nĩguo Mwathani Jehova oigĩte.
• 15. Ningĩ ndũmĩrĩri ya Jehova ĩkĩnginyĩrĩra, ngĩĩrũo ũũ:
• 16. Atĩrĩrĩ, mũrũ wa mũndũ, nĩngakwehereria mũndũ ũrĩa ũkenagĩra na ngoro yaku ũkĩmwĩonagĩra na maitho na mbũkĩrĩra o ro ũguo; no rĩrĩ, ndũkamũcaĩre o na kana ũmũrĩrĩre, o na kana ũite maithori.
• 17. Ta ĩthikĩre, no ndũkaanĩrĩre; tiga gũcakaya nĩ ũndũ wa mũndũ ũcio ũkuĩte, no wĩohe kĩremba mũtwe, na wĩkĩre iratũ magũrũ, na ndũkehumbe mĩromo, na ndũkagĩe na gĩathĩ kĩa mũthenya wa mũtĩĩro.
• 18. Niĩ ngĩkĩroka kũhe andũ ũhoro ũcio rũcinĩ; na hwaĩ-inĩ mũtumia wakwa agĩkua; na niĩ ngĩroka gwĩka o ta ũrĩa ndaathĩtwo.
• 19. Nao andũ makĩnjũria atĩrĩ, Kaĩ ũtangĩtwĩra ũrĩa maũndũ maya makonainie na ithuĩ, o maya ũreka?
• 20. Hĩndĩ ĩo ngĩkĩmera atĩrĩ, Nĩ ndũmĩrĩri ya Jehova yanginyĩrĩire ngĩĩrũo atĩrĩ,
• 21. Aria na andũ a nyũmba ya Isiraeli, ũmere atĩrĩ, Mwathani Jehova oigĩte ũũ: Atĩrĩrĩ, handũ hakwa harĩa haamũre, o harĩa mwĩtĩagĩra nĩ ũndũ wa ũkaru wanyu, nĩngahathahia, na nĩho mũkenagĩra na ngoro cianyu mwahona na maitho, na nĩho mwĩriragĩria na ngoro cianyu, na nĩho mũiguagĩra tha; nao ariũ anyu na airĩtu anyu arĩa mwatigire na thutha, makagũa moragĩtwo na hiũ cia njora.
• 22. Na inyuĩ mũgeka o ta ũguo njĩkĩte niĩ. Mũtikehumba mĩromo, o na kana mũgĩe na gĩathĩ kĩa mũthenya wa mũtĩĩro.
• 23. Nacio iremba cianyu mũgakorũo mũciĩyohete mĩtwe na mũgekĩra iratũ magũrũ; mũtigacaya o na kana mũrĩre, no rĩrĩ, mũkahwererekera o ũũru-inĩ wanyu mũthire, na mũcakayanagĩre mũndũ na mũndũ ũrĩa ũngĩ.
• 24. Ũguo nĩguo Ezekieli agatuĩka kĩmenyithia harĩ inyuĩ; o ta ũguo maũndũ mothe matariĩ marĩa ekĩte-rĩ, noguo mũgeka. Na rĩrĩa maũndũ macio makahingio nĩguo mũkamenya atĩ niĩ nĩ niĩ Mwathani Jehova.
• 25. Wee nawe, mũrũ wa mũndũ-rĩ, githĩ maũndũ macio matikahingio mũthenya ũrĩa ngamehereria kĩhingo kĩao kĩa hinya, o na gĩkeno kĩa riri wao, na ndĩmehererie handũ harĩa ngoro ciao ciĩkenagĩra nĩho maahona na maitho, o harĩa meriragĩria mũno na ngoro ciao, na ndĩmaninĩre ariũ ao o na airĩtu ao?
• 26. Naguo mũthenya ũcio-rĩ, githĩ ũrĩa ũkahonoka ndagoka harĩ wee, akũiguithie ũhoro ũcio ũwĩiguĩre na matũ maku?
• 27. Mũthenya ũcio-rĩ, kanua gaku nĩgagatumũrĩrũo ũcio ũhonokete, na ũmwarĩrie, na ndũcoke kũhingara kanua ta kĩrimũ. Ũguo nĩguo ũgatuĩka kĩmenyithia harĩ o; nao nĩmakamenya atĩ niĩ nĩ niĩ Jehova.

Home