Go Back

Ezekieli Chapter 22

1. O na ningĩ ndũmĩrĩri ya Jehova ĩkĩnginyĩrĩra ngĩĩrũo atĩrĩ,
2. Wee nawe mũrũ wa mũndũ-rĩ, ĩ hihi nĩũgũcirithania? Githĩ tiwe ũgũcirithia itũũra rĩrĩa rĩitithagia thakame? Kĩrĩmenyithie maũndũ marĩo mothe ma thahu marĩa rĩaneka.
3. Nawe ũgĩcoke uuge atĩrĩ, Mwathani Jehova oigĩte ũũ: Rĩrĩ nĩrĩo itũũra rĩrĩa rĩitithagia thakame o kũu thĩinĩ warĩo, nĩ getha ĩhinda rĩarĩo rĩkinye, na nĩrĩo rĩĩthondekagĩra mĩhianano ya kũhoyũo nĩguo rĩĩgwatie thahu.
4. Wee-rĩ, nĩwonetwo wĩ mwĩhia nĩ ũndũ wa thakame yaku ĩo ũitĩte, na ũgathũkio nĩ mĩhianano ya kũhoyũo ĩo wĩthondekeire; ningĩ nĩũtũmĩte matukũ maku makuhĩhĩrie, nayo mĩaka yaku ĩkiriĩ gũthira. Nĩkĩo ngũmenithĩtie harĩ ndũrĩrĩ, na ngatũma ũthekererũo nĩ andũ a mabũrũri mothe.
5. Arĩa matũire gũkuhĩ nawe, o nao arĩa matũire kũraya nawe, nĩmagagũthekerera nĩ gũkũmena, wee wĩ igweta rĩũru na ũkaiyũrũo nĩ ngũĩ.
6. Atĩrĩrĩ, atongoria a Isiraeli matũire thĩinĩ waku maitithie thakame, mũndũ o mũndũ o ta ũrĩa hinya wake ũtariĩ.
7. Maithe ma ciana, o na manyina, nĩmaagithĩtio gĩtĩo thĩinĩ waku, na kũu thĩinĩ waku nĩkuo andũ mahinyĩrĩirie ageni; ningĩ o kũu thĩinĩ waku nĩkuo manyarirĩire ũrĩa ũkuĩrĩirũo nĩ ithe, o na mũka wa ndigwa.
8. Wee-rĩ, nĩ kũmena ũmenete maũndũ makwa marĩa maamũre, na ũgathahia thabatũ ciakwa.
9. Andũ a njukũ nĩ gũkorũo makoragwo o thĩinĩ waku nĩguo maitithie thakame; ningĩ thĩinĩ waku gũgakorũo andũ arĩa marĩagĩra irio cia magongona irĩma-inĩ igũrũ; o na thĩinĩ waku gũtũire gwĩkagwo maũndũ ma waga-thoni.
10. Ningĩ o kũu thĩinĩ waku nĩkuo andũ monanagĩra na atumia a maithe, na thĩinĩ waku makagwata andũ-a-nja na hinya rĩrĩa maikarĩte me mũgiro marĩ na maũndũ ma ihinda rĩao rĩa mweri.
11. Ũyũ ũmwe nĩethũkĩtie na mũka wene, o nake ũyũ ũngĩ agethũkia na mũka wa mũriũ; o nake ũyũ ũngĩ akagwata mũirĩtu wao, o mwarĩ wa ithe.
12. Ningĩ thĩinĩ waku-rĩ, andũ mahakagwo nĩguo maitithie thakame, o na ũgetagia uumithio na wongereri ũtarĩ wa kĩhooto wa indo iria wohoranĩire, na ũkeguna na ũhahanyi wa indo ciene, na ũndũ wa kũhinyanĩrĩria, na ũkariganĩrũo nĩ niĩ; ũguo nĩguo Mwathani Jehova oigĩte.
13. Atĩrĩrĩ, tondũ wa maũndũ macio nĩ’hũrĩte hĩ nĩ ũndũ wa indo icio wĩgunĩte nacio na njĩra ĩtarĩ ya kĩhooto, o na ũndũ wa thakame yaku o ĩo ĩitĩtwo thĩinĩ waku.
14. Rĩu-rĩ, anga ngoro yaku yakĩhota gũkirĩrĩria, o na kana moko maku magĩe na hinya, matukũ marĩa ngaitĩka gũkũherithia? Niĩ Jehova, nĩ niĩ njarĩtie ũhoro ũcio, na nĩngawĩka.
15. Ngakũharaganĩria ndũrĩrĩ-inĩ ngũhurunjĩre mabũrũri; o namo maũndũ marĩa wĩ namo marĩ magigi nĩngamanina o kũmanina biũ wehererũo nĩmo.
16. Nawe, wee mwene, nĩũgathahio, ũkĩonagwo nĩ ndũrĩrĩ iria ingĩ; nawe nĩũkamenya atĩ nĩ niĩ Jehova.
17. Ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
18. Mũrũ wa mũndũ, harĩ niĩ-rĩ, nyũmba ya Isiraeli nĩĩtuĩkĩte o ta nganga theri cia ũturi; andũ ayo othe matariĩ o ta gĩcango, na kĩgera, na kĩgera kĩa ibaba, o na ngocorai, marĩ mwaki-inĩ wa ũturi; ningĩ matariĩ o ta nganga cia ũturi wa betha.
19. Tondũ ũcio Mwathani Jehova oigĩte ũũ: Atĩrĩrĩ, tondũ inyuothe nĩmũgĩtuĩkĩte o ta nganga theri cia ũturi-rĩ, nĩngũmũcokanĩrĩria o kũu Jerusalemu thĩinĩ.
20. O ta ũrĩa andũ macokanagĩrĩria betha, na gĩcango, na kĩgera, na ngocorai, o na kĩgera kĩa ibaba, magaciĩkĩra mwaki-inĩ wa ũturi, nĩguo ihuhĩrĩrio na mwaki, itweke, ũguo nĩguo ngamũcokanĩrĩria ndĩmũguthũkĩire na marakara makwa o na mathũgũta, naho hau nĩho ngamũiga, ndĩmũtwekerie ho.
21. Ĩĩ, ti-itherũ ngamũcokanĩrĩria njoke ndĩmũhũmũkĩre mĩhũmũ ya matũkũya makwa ta ĩrĩ mwaki; na nĩmũgatwekerio o kũu thĩinĩ warĩo.
22. O ta ũrĩa betha ĩtwekagĩrio mwaki-inĩ wa ũturi-rĩ, ũguo noguo mũgatwekerio o kũu thĩinĩ warĩo; na nĩmũkamenya atĩ niĩ Jehova, nĩ niĩ ndĩmũitĩire mathũgũta makwa.
23. Na rĩrĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
24. Mũrũ wa mũndũ, ĩra bũrũri ũcio atĩrĩ, Wee wĩ bũrũri ũtarĩ mũtherie, o na kana ũkoirĩrio mbura, mũthenya ũrĩa wa marakara.
25. He ndundu ya njũkanĩrĩro ya anabii ĩrĩ thĩinĩ waguo, nayo ĩtariĩ o ta mũrũthi ũkũrarama ũgĩtambura nyamũ ĩrĩa ũnyitĩte; nĩ kũrĩa marĩĩte mĩoyo ya andũ makamĩng’aria biũ, na makenyitĩra indo iria ciigĩtwo cia bata, na magathiĩ na indo cia goro. Nĩmatũmĩte aka a ndigwa maingĩhe mũno o kũu thĩinĩ waguo.
26. Athĩnjĩri-Ngai akuo maregaga watho wakwa biũ, na magathahia maũndũ makwa marĩa maamũre; matiigana gũthurania indo iria ciamũrĩirũo wĩra mũtheru na iria itarĩ nyamũre, o na kana magatũma andũ makũũrane indo iria irĩ thahu na iria itarĩ thahu, na nĩmahingĩirie thabatũ ciakwa maitho. Niĩ na niĩ ndĩ mũnungie thĩinĩ wao.
27. Anene arĩa marĩ kũu bũrũri ũcio-rĩ, matariĩ o ta njũĩ igĩtambura nyamũ iria inyitĩte, nĩ getha maitithie thakame, o na monũhithie mĩoyo ya andũ, nĩguo meyonere uumithio ũtarĩ wa kĩhooto.
28. Nao anabii akuo nĩmatenderetie ngoro na mũũnyũ ũtoirugĩtwo wega, na makona cioneki cia tũhũ, na makaragũranĩra maũndũ ma maheni, makiugaga atĩrĩ, Mwathani Jehova oigĩte ũna na ũna, o hĩndĩ ĩrĩa Jehova atarĩ ũndũ oigĩte.
29. Andũ a bũrũri ũcio nĩ kũhinyanĩrĩria mahinyanĩrĩirie, o na magatunyana indo; ĩĩ, ti-itherũ nĩmanyarirĩte athĩni, o na ngĩa, o nake mũndũ wa kũngĩ makamũhinyĩrĩria na maũndũ moru.
30. Niĩ na niĩ ngĩcaria thĩinĩ wao ndore kana hihi ndona mũndũ ũngĩcokereria rũirigo, na arũgame harĩa he mwanya mbere yakwa agitĩre bũrũri ũcio, nĩ getha ndikaũnine; no ndiigana kuona o na ũmwe.
31. Tondũ ũcio nĩndĩmaitĩire marakara makwa, na ngamanina na matũkũya makwa maakanĩte ta mwaki, na nĩndũmĩte macokererũo nĩ ũũru wa mĩthiĩre yao o ene; ũguo nĩguo Mwathani Jehova oigĩte.

Home