Go Back

Ezekieli Chapter 14

• 1. Hĩndĩ ĩo athuri amwe a Isiraeli magĩũka harĩ niĩ, magĩikara thĩ o mbere yakwa.
• 2. Nayo ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 3. Mũrũ wa mũndũ, andũ aya-rĩ, nĩ kwĩrirĩria meriragĩria mĩhianano yao ya kũhoyũo na ngoro ciao, na makarorania mũno na maũndũ ma waganu wao, marĩa mamahĩngithagia. Hĩ! Anga gwakĩagĩrĩra matuĩrie kaũndũ o na karĩkũ harĩ niĩ?
• 4. Tondũ ũcio aria nao, ũmere atĩrĩ, Mwathani Jehova oigĩte ũũ: Mũndũ o wothe wa nyũmba ya Isiraeli ũrĩa wĩriragĩria mĩhianano yake ya kũhoyũo na ngoro yake, na akarorania na maũndũ ma waganu wake, marĩa mamũhĩngithagia, ũcio angĩgacoka gũthiĩ kwĩ mũnabii-rĩ, niĩ Jehova nĩ niĩ ngamũcokeria ũhoro ũringaine na ũrĩa mĩhianano ĩo yake ĩingĩhĩte,
• 5. nĩ getha nyone ha kũnyitĩra andũ a nyũmba ya Isiraeli na maũndũ marĩa marĩ ngoro-inĩ ciao o ene; nĩ ũndũ othe ma’thiĩte haraya maga’thengera na ũndũ wa mĩhianano ĩo yao ya kũhoyũo.
• 6. Tondũ ũcio ĩra andũ acio a nyũmba ya Isiraeli atĩrĩ, Mwathani Jehova oigĩte ũũ: Hũndũkai, mwĩgarũre mũtigane na mĩhianano ĩo yanyu ya kũhoyũo; na mũhutatĩre maũndũ manyu marĩa mwĩkaga me thahu.
• 7. Nĩ gũkorũo mũndũ o wothe wa nyũmba ya Isiraeli, o na wa ageni arĩa magenete ũgeni kũu Isiraeli, ũkeyamũra athenge harĩ niĩ, na acoke kwĩrirĩria mĩhianano ya kũhoyũo na ngoro yake, na ningĩ aroranie na maũndũ ma waganu wake, o macio mamũhĩngithagia-rĩ, ũcio angĩgacoka gũthiĩ he mũnabii nĩ getha atuĩrie ũhoro wakwa kũrĩ we, niĩ Jehova, niĩ mwene, nĩ niĩ ngamũcokeria ũhoro.
• 8. Na nĩngatũma ũthiũ wakwa ũũmĩre mũndũ ũcio, na ndũme atuĩke o ta ũndũ wa kũgegania wa gũtũma andũ arĩa angĩ memenyerere; ningĩ ndũme mũndũ ũcio oinagwo thimo, na ndĩmũingate ndĩmũthengie thĩinĩ wa andũ akwa; na inyuĩ nĩmũkamenya atĩ niĩ nĩ niĩ Jehova.
• 9. Na rĩrĩ, mũnabii ũcio angĩkahenio, nake aarie ũhoro ũcio wakwa-rĩ, niĩ Jehova nĩ niĩ ngakorũo ’henetie mũnabii ũcio, na nĩngamũtambũrũkĩria guoko, ndĩmũnine ehere thĩinĩ wa andũ akwa Isiraeli.
• 10. Nao nĩmagacoka kũherithĩrio waganu wao, o naguo waganu wa mũnabii ũcio ũtuĩke o ta waganu wa mũndũ ũcio ũtuĩrĩtie ũhoro harĩ we;
• 11. nĩ getha andũ a nyũmba ya Isiraeli matikanacoke gwĩtwarĩrĩria na njĩra ciao o ene, mathenge harĩ niĩ, o na kana kwĩreherere thahu na maũndũ mao mothe ma kwagarara watho, no magĩtuĩke andũ akwa, o na niĩ nduĩke Ngai wao; ũguo nĩguo Mwathani Jehova ekuuga.
• 12. Na rĩrĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 13. Mũrũ wa mũndũ, hĩndĩ ĩrĩa andũ a bũrũri mangĩnjĩhia na ũndũ wa kwagarara watho, na niĩ njoke ndambũrũkĩrie bũrũri ũcio guoko gwakwa, ’nine mwĩhoko wothe wa irio, na ndũme ũgĩe ng’aragu, na ’ninũkie andũ aguo o na ũhiũ waguo-rĩ,
• 14. o na kũngĩkorũo andũ aya atatũ, Nuhu, na Danieli, o na Ayubu, marĩ kuo, no mĩoyo yao o ene mangĩhonokia na ũndũ wa ũthingu wao; ũguo nĩguo Mwathani Jehova oigĩte.
• 15. Ningĩ ingĩtũma nyamũ njũru igere bũrũri ũcio, nacio iũthũkie o nginya ũtigwo ũkirĩte ihooru, wanangĩkĩte, na kwage mũndũ ũngĩũtuĩkania nĩ ũndũ wa nyamũ icio-rĩ,
• 16. o na andũ acio atatũ mangĩkorũo marĩ kuo hĩndĩ ĩo, o ta ũrĩa niĩ ndũũraga muoyo-rĩ, matingĩhonokia ariũ ao, o na kana airĩtu ao; ũguo nĩguo Mwathani Jehova oigĩte; no-o oiki mangĩhonokio, naguo bũrũri ũcio ũtigwo o ũguo wanangĩkĩte.
• 17. O na kana hihi ingĩkarehithie rũhiũ rũa njora kũu bũrũri ũcio, njuge atĩrĩ, Rũhiũ rũrũ rũa njora, gera bũrũri ũyũ wothe, nĩ getha ndĩũnine andũ o na ũhiũ-rĩ,
• 18. o na andũ acio atatũ mangĩkorũo marĩ kuo hĩndĩ ĩo-rĩ, o ta ũrĩa niĩ ndũũraga muoyo, matingĩhonokia ariũ ao, o na kana airĩtu ao; ũguo nĩguo Mwathani Jehova oigĩte no rĩrĩ, no-o oiki mangĩhonokio.
• 19. O na ningĩ-rĩ, ingĩkarehithie mũthiro bũrũri ũcio, na ndĩũguthũkĩre na mathũgũta makwa na ũndũ wa gũitithia thakame, nĩ getha ndĩũnine andũ o na ũhiũ-rĩ,
• 20. o na Nuhu, na Danieli, na Ayubu mangĩkorũo marĩ kuo hĩndĩ ĩo-rĩ, o ta ũrĩa niĩ ndũũraga muoyo, matingĩhonokia ariũ ao, o na kana airĩtu ao; ũguo nĩguo Mwathani Jehova oigĩte; no mĩoyo yao o ene mangĩhonokia na ũndũ wa ũthingu wao.
• 21. Nĩ gũkorũo Mwathani Jehova oigĩte ũũ: Kaĩ ũhoro ũgagĩkĩria atĩa kũneneha hĩndĩ ĩrĩa ngahingĩria Jerusalemu matuĩro makwa manene mana ma cira, namo nĩmo rũhiũ rũa njora, na nga’aragu, na nyamũ njũru, o na mũthiro, nĩguo ’ninũkie andũ arĩo othe o na ũhiũ warĩo?
• 22. No rĩrĩ, thĩinĩ warĩo nĩgũgatigara andũ amwe arĩa magethara, nao macoke kuumagario moime kuo, me gĩkundi kĩa ariũ anyu o na airĩtu anyu; na atĩrĩrĩ, nĩmagoka harĩ inyuĩ, na inyuĩ mwĩonere mĩthiĩre yao o na mĩĩkĩre yao; na nĩmũkahorerio mũthirũo nĩ kĩeha kĩa ũũru ũrĩa ngakorũo ndehithĩtie Jerusalemu, naguo ũguo nĩ ta kuuga maũndũ mothe marĩa ngakorũo ndĩrĩrehithĩirie.
• 23. Nao nĩo makamũhoreria, hĩndĩ ĩrĩa mũkeyonera mĩthiĩre yao o na mĩĩkĩre yao; na nĩmũkamenya atĩ maũndũ mothe marĩa njĩkĩte thĩinĩ warĩo, ndĩmekĩte hatarĩ gĩtũmi; ũguo nĩguo Mwathani Jehova oigĩte.

Home