Go Back

Ezekieli Chapter 12

• 1. Ningĩ ndũmĩrĩri ya Jehova ĩgĩcoka ĩkĩnginyĩrĩra, ngĩĩrũo atĩrĩ,
• 2. Mũrũ wa mũndũ, ũtũũranagia na andũ a kĩruka kĩremu, arĩa me na maitho ma kuona, no mationaga, na me na matũ ma kũigua, no matiiguaga; nĩ ũndũ nĩ kĩruka kĩremu.
• 3. Tondũ ũcio-rĩ, wee mũrũ wa mũndũ, thagathaga indo ciaku cia thama ta he muunĩko, uumie indo ciaku nja mũthenya barigici magĩkwĩonagĩra na maitho mao; nawe ũgĩthame uume gwaku ũthiĩ kũndũ kũngĩ o magĩkwĩonagĩra; no gũkorũo hihi nĩmageciria, o na harĩa marĩ a kĩruka kĩremu.
• 4. Indo ciaku-rĩ, nĩũgaciruta na nja mũthenya barigici magĩkuonaga, ta irĩ cia thama; ũcoke uumagare hwaĩ-inĩ wee mwene, o ta ũrĩa gwĩkagwo rĩrĩa he muunĩko.
• 5. Tũrĩkia rũthingo magĩkuonaga na maitho mao, ũcoke uumagarĩrie indo ciaku ho.
• 6. Ningĩ ũgĩcikuue na ciande magĩkuonaga, ũgĩthiĩ ũcikuuĩte na nduma. Ningĩ wĩhumbe ũthiũ, ndũkone thĩ, nĩ ũndũ nĩngũtuĩte kĩmenyithia harĩ nyũmba ya Isiraeli.
• 7. Niĩ na niĩ ngĩgĩĩka o ta ũguo ndaathirũo, ngĩkiumia indo ciakwa na nja mũthenya barigici o ta arĩ indo cia thama, na hwaĩ-inĩ ngĩtũrĩkia rũthingo na guoko gwakwa; nacio indo icio ngĩciruta na nja kwĩ nduma, ngĩcikuua na ciande, o makĩonaga.
• 8. Na rĩrĩ, kwaroka gũkĩa-rĩ, ngĩkinyĩrĩrũo nĩ ndũmĩrĩri ya Jehova, ngĩĩrũo atĩrĩ,
• 9. Mũrũ wa mũndũ, githĩ nyũmba ya Isiraeli, o nyũmba ĩno nemu, ndĩkũũrĩtie ũũ: Nĩ atĩa ũreka?
• 10. Ĩra andũ ayo atĩrĩ, Mwathani Jehova oigĩte ũũ: Ũhoro ũcio mũritũ-rĩ, ũkoniĩ mũtongoria ũrĩa ũtũire Jerusalemu, o na andũ othe a nyũmba ya Isiraeli arĩa maikaranĩtie nake.
• 11. Uga atĩrĩ, Niĩ nĩ niĩ nduĩkĩte kĩmũmenyithia; o ta ũguo njĩkĩte-rĩ, noguo magekwo; nĩ kũrindũrũo makarindũrũo matwarũo ndaho-inĩ.
• 12. Nake mũtongoria ũcio ũtũũranĩtie nao agakuua mũrigo wake na ciande kwĩ nduma, oimagare; nĩ gũtũrĩkia magatũrĩkia rũthingo moimagarĩrie indo ciao ho. Nake nĩ kwĩhumba akehumba ũthiũ, ndakone thĩ na maitho.
• 13. Ningĩ ngamũtambũrũkĩria mũtego wakwa, nake anyitwo nĩguo; na ndĩmũtwarithie Babuloni, o kũu bũrũri wa Akalidei; no rĩrĩ, ndakawona, o na harĩa agakuĩra kuo.
• 14. Nao andũ othe arĩa mamũrigicĩirie atĩ nĩguo mamũteithie, o na itungati ciake ciothe, ngamahurunjĩra huho-inĩ ciothe, njoke njomorithie rũhiũ rũa njora rũmoime thutha.
• 15. Nao nĩmakamenya atĩ niĩ nĩ niĩ Jehova hĩndĩ ĩrĩa ngamahurunjĩra ndũrĩrĩ-inĩ ciothe, o na ndĩmaharaganĩrie mabũrũri-inĩ.
• 16. No rĩrĩ, nĩngahonokia andũ ao matarĩ aingĩ, matikoragwo na rũhiũ rũa njora, kana maninũkio nĩ ng’aragu o na kana mũthiro; nĩ getha makoimbũranĩra maũndũ mao mothe marĩa maaneka me thahu ndũrĩrĩ-inĩ cia kũndũ kũrĩa magathiĩ; nao nĩmakamenya atĩ niĩ nĩ niĩ Jehova.
• 17. O na ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 18. Mũrũ wa mũndũ, wĩrĩĩre mũgate waku ũgĩthingithaga, o namo maĩ maku ũmanyue ũnyegenyete na ũgatangĩka mũno;
• 19. o nao andũ a bũrũri wanyu ũmere atĩrĩ, Mwathani Jehova nĩaarĩtie ũhoro ũkoniĩ andũ arĩa matũũraga Jerusalemu, o na bũrũri wa Isiraeli, akoiga ũũ: Makarĩaga irio ciao matangĩkĩte mũno, na manyuage maĩ mao magwatĩtwo nĩ icanjama, tondũ bũrũri wao nĩũkaanangĩka ũninũke indo ciothe iria irĩ kuo; ũguo nĩguo gũgatuĩka nĩ ũndũ wa maũndũ ma ũhinya ma andũ othe arĩa matũũraga kuo.
• 20. O namo matũũra marĩa matũũrĩtwo nĩ andũ nĩmagakira ihooru, o naguo bũrũri ũcio wanangĩke o kwanangĩka; na nĩmũkamenya atĩ niĩ nĩ niĩ Jehova.
• 21. Na rĩrĩ, ndũmĩrĩri ya Jehova ĩkĩnginyĩrĩra, ngĩũrio atĩrĩ,
• 22. Mũrũ wa mũndũ, thimo ĩno mwĩ nayo kũu bũrũri wa Isiraeli, mũkiuga ũũ: Matukũ no mathiraga, no maũndũ ma cioneki matihingagio o na ũmwe-rĩ, nĩ ya kĩ?
• 23. Tondũ ũcio mere atĩrĩ, Mwathani Jehova oigĩte ũũ: Thimo ĩo nĩngatũma ĩtige kũgwetwo, na matigacoka kwaria ũhoro wayo ta arĩ thimo kũu Isiraeli; no ũmere atĩrĩ, Matukũ nĩ makuhĩhĩru, na cioneki ciothe ikiriĩ kũhingio.
• 24. Nĩ ũndũ-rĩ, gũtigacoka kuonwo cioneki cia tũhũ, o na kana ũragũri wa kũhenanĩrĩria thĩinĩ wa nyũmba ya Isiraeli.
• 25. Nĩ gũkorũo niĩ nĩ niĩ Jehova; kwaria nĩngaaria, naguo ũhoro ũrĩa ngaaria ũhingio, na ndũcoke gũtĩrio; nĩ ũndũ-rĩ, inyuĩ andũ a kĩruka gĩkĩ kĩremu, matukũ-inĩ manyu nĩngaaria ũhoro, na ndĩũhingie. Ũguo nĩguo Mwathani Jehova oigĩte.
• 26. Ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 27. Mũrũ wa mũndũ, atĩrĩrĩ, andũ acio a nyũmba ya Isiraeli moigĩte atĩrĩ, Kĩoneki kĩrĩa onaga-rĩ, nĩgĩkũnina matukũ maingĩ gĩgĩkahingio, na arathaga ũhoro wa ihinda iraya mũno ũgĩgakinya.
• 28. Tondũ ũcio mere atĩrĩ, Mwathani Jehova oigĩte ũũ: Hatirĩ kiugo o na kĩmwe kĩa ũhoro wakwa gĩgacoka gũtĩrio o na atĩa, no rĩrĩ, ũhoro ũrĩa ngaaria nĩ kũhingio ũkahingio. Ũguo nĩguo Mwathani Jehova oigĩte.

Home