Go Back

Jeremia Chapter 8

• 1. Ningĩ Jehova ekuuga ũũ: Atĩrĩrĩ, ihinda rĩu-rĩ, andũ magathikũria mahĩndĩ ma athamaki a Juda, o na ma atongoria akuo, o na mahĩndĩ ma athĩnjĩri-Ngai, o na ma anabii, o na mahĩndĩ ma andũ arĩa maatũũraga Jerusalemu, mamarute mbĩrĩra-inĩ ciao;
• 2. nĩ getha mamaanĩkĩre riũa o na mweri o na mbũtũ ciothe cia njata iria maatũire mendete na magacitungatĩra, na makarũmĩrĩra kĩrĩra gĩacio, o na magaciragũria, o na magaciinamĩrĩra magacihoya. Mahĩndĩ macio matikonganio, o na kana macoke gũthikwo, amu magatuĩka o ta rũrua rũharaganie gũkũ thĩ guothe.
• 3. Nakĩo gĩkuũ nĩgĩkeriragĩrio gũkĩra gũtũũra muoyo nĩ andũ arĩa magatigara a kĩruka gĩkĩ kĩũru, o arĩa magatigara kũndũ guothe kũrĩa ndamatwarithirie; ũguo nĩguo Jehova Mũnene wa Ita ekuuga.
• 4. O na ningĩ atĩrĩ, wee nĩ kwĩra ũkamera ũũ: Jehova ekuuga atĩrĩ, Anga he mũndũ ũngĩgũa thĩ na ndacoke gũũkĩra? Kana ahĩtie njĩra, na ndacoke kũmĩona?
• 5. Rĩu-rĩ, nĩ kĩ gĩgĩtũmĩte andũ aya matũũre ma’hutatĩire tene na tene? Matũire o marũmĩtie maheni, makarega kũ’hũgũkĩra.
• 6. Ndamathikĩrĩirie ngĩigua ũrĩa moigaga, no rĩrĩ, matiaaragia maũndũ merekereire; gũtirĩ mũndũ o na ũmwe wĩrirĩte nĩ ũndũ wa waganu wake, akoiga atĩrĩ, Hĩ, kaĩ ndagĩĩka atĩa? Andũ acio othe o mũndũ ethiĩrĩire na njĩra yake, o ta ũrĩa mbarathi ĩguthũkaga ĩgatonya ita-inĩ.
• 7. Ti-itherũ mũrũaru wĩ rĩera-inĩ nĩũmenyaga ihinda rĩaguo rĩa gũthama, o nayo ndirahũgĩ, na thũngũrũrũ, o na cũcũ-wa-njoka, ikamenya ihinda rĩacio rĩa gũcoka; no andũ akwa matirũmbũyagia matuĩro ma cira wa Jehova.
• 8. Mwahota atĩa kuuga atĩ, Tũrĩ ogĩ, na watho wa Jehova tũrĩ o naguo? No rĩrĩ, kĩandĩki kĩa maheni kĩa aandĩki-marũa nĩkĩũgarũrĩte gĩkaũtua wa maheni.
• 9. Andũ arĩa metuaga ogĩ nĩ gũconoka maconokete; nĩ agegearu, na makahenererio. Hĩ! Nĩ kũrega maregete ũtaarani wa Jehova. Rĩu ũũgĩ ũrĩa makĩrĩ naguo nĩ ũrĩkũ?
• 10. Tondũ ũcio aka ao ngamahe andũ angĩ, o nayo mĩgũnda yao ndĩmĩhe andũ arĩa makamĩtunyana; nĩ gũkorũo andũ acio othe, o mũndũ ethinĩkĩrĩirie ũcumĩkĩri-inĩ wa indo ciene, kwarũma ũrĩa mũnyinyi nginya ũrĩa mũnene, nao anabii ao o na athĩnjĩri-Ngai ao magekana o maũndũ ma kũhenania.
• 11. Nĩ kũhoreria mahoreretie mwarĩ wa andũ akwa makĩmwĩra atĩrĩ, Gwĩ thayũ, gwĩ thayũ; na nĩ hĩndĩ ĩrĩa gũtarĩ thayũ.
• 12. Hĩndĩ ĩrĩa mekaga maũndũ me thahu-rĩ, anga nĩmaaconokaga? Aca, matiaconokaga o na hanini, o na kana makagĩa rũkobe; na tondũ ũcio makagũanĩra hamwe na andũ arĩa angĩ magũĩte; hĩndĩ yao ya kũherithio-rĩ, nĩguo magathinĩkanio magũe thĩ; ũguo nĩguo Jehova ekuuga.
• 13. Ningĩ Jehova ekuuga ũũ: Nĩ kũnina ngamanina biũ, amu gũtirĩ thabibu ikoneka mũthabibu-inĩ, o na kana ngũyũ cioneke mũkũyũ-inĩ; namo mathangũ mayo no kũhoha makahoha; na rĩrĩ, ngamaneana harĩ thũ iria igatuĩkanĩria bũrũri wao.
• 14. Rĩu tũikarĩte o ro ũguo tũkirĩte ki nĩ ũndũ kĩ? Wĩcokanĩrĩnei hamwe, tũgatonye matũũra marĩa mairigĩtwo, tũgakirĩre kuo ki, nĩ ũndũ Jehova Ngai witũ nĩwe ũtwathĩrĩirie ũhoro ũcio wa gũkira ki, na agatũhe maĩ marũrũ ta ma nyongo tũnyue, nĩ ũndũ nĩtũmwĩhĩtie.
• 15. Tũtũire tũtanyaga atĩ kũgĩe thayũ, no hatirĩ wega o na ũrĩkũ wonekaga; o na tũgatanya ihinda rĩa kũhonanio, na atĩrĩrĩ, no kũgegeara gũtheri kuonekaga.
• 16. Mũtiihĩre wa mbarathi ciake nĩũraiguwo irĩ o Dani, o naguo bũrũri wothe ũrathingitha nĩ ũndũ wa mũgambo wa mbarathi ciake cia njamba ikĩania; nĩmokĩte, na makarĩa bũrũri makaũnina biũ, hamwe na indo ciothe iria irĩ kuo, o na makaananga matũũra hamwe na andũ othe arĩa mamatũũrĩte.
• 17. Nĩ ũndũ atĩrĩ, nĩ ta kũrekia ngarekia nyamũ-cia-thĩ, o na nduĩra, thĩinĩ wanyu, iria itangĩthuuthĩrĩka ihorere, nacio nĩikamũrũma; ũguo nĩguo Jehova ekuuga.
• 18. Hĩ! Na arĩ korũo ndahota kwĩhoreria ’thirũo nĩ kĩeha! Ngoro yakwa nĩ ningĩku thĩinĩ wakwa.
• 19. Atĩrĩrĩ, he mũgambo wa kĩrĩro kĩa mwarĩ wa andũ akwa ũkũiguĩka ituri-inĩ ciothe cia bũrũri ũkĩũria atĩrĩ, Githĩ Jehova ndatũire o kũu Zayuni? O nake mũthamaki wakuo-rĩ, githĩ ndakĩrĩ o kuo? Nĩ kĩ gĩtũmĩte ma’thirĩkie na mĩhianano yao ya gwacũhio, magatũma ndakare, o na makandakaria na maũndũ mao ma tũhũ marĩa matarĩ ma ndũire?
• 20. Ihinda rĩa magetha nĩ ihĩtuku, o nayo hĩndĩ ya ũrugarĩ ĩgathira, na tũtirĩ tũrahonokio o na rĩu.
• 21. Ũrirũ ũrĩa mwarĩ wa andũ akwa onete-rĩ, noguo ũnjokereire o na niĩ, ngathita ngoro nĩ ũndũ wa ũrĩa ngwatĩtwo nĩ kĩmako.
• 22. Kaĩ kũu Gileadi gũtatigarĩte kamũthaiga o na kanini ga kũhonania, o na kana gũkagĩa mũthondekani? Nĩ kĩ gĩkĩgirĩtie mwarĩ wa andũ akwa acokerie?

Home