Go Back

Jeremia Chapter 33

• 1. Ningĩ ndũmĩrĩri ya Jehova ĩgĩkinyĩrĩra Jeremia ihinda rĩa kerĩ arĩ o muohe kũu kĩhingo-inĩ kĩa arangĩri, akĩĩrũo atĩrĩ,
• 2. Ũguo nĩguo Jehova ekuuga, o we ũrĩa wĩkaga maũndũ, agakĩmatua o na akamahingia; narĩo rĩĩtwa rĩake rĩrĩa etagwo nĩ Jehova; egũkiuga ũũ:
• 3. Ta kĩngaĩre, na nĩngũgwĩtĩka nguonie maũndũ manene na marĩ hinya, marĩa ũtoĩ.
• 4. Nĩ gũkorũo Jehova, Ngai wa Isiraeli, nĩaarĩtie ũhoro wa nyũmba cia itũũra rĩrĩ, o na nyũmba cia athamaki a Juda, iria itharĩtio nĩguo gũthondekwo kũndũ gwa kwĩgitĩra harĩ mũtharĩko ũrĩa wa ihumbu cia tĩri, o na harĩ mũtharĩko ũrĩa wa hiũ cia njora, akoiga atĩrĩ,
• 5. Tondũ wa ũrĩa kũrahũranwo na Akalidei, nĩikaiyũra ciimba cia andũ arĩa ngakorũo njũragithĩtie nĩ ũndũ wa marakara makwa, o na mang’ũrĩka makwa, o arĩa maatũmire ’hithe itũũra rĩrĩ ũthiũ wakwa nĩ ũndũ wa waganu wao wothe.
• 6. No rĩrĩ, nĩngarĩonera kĩhonia, rĩhorerũo, na ’honie andũ arĩo na ndĩmaguũrĩrie maũndũ maingĩ mũno ma gũtũma matũũre na thayũ, o na ndeto cia ma.
• 7. Na nĩngatũma andũ arĩa maatahirũo a Juda o na a Isiraeli macoke, na njikare ta ndĩmaakĩte wega, o ta ũrĩa maatariĩ mbere.
• 8. Na nĩngamatheria mathirũo nĩ ũmaramari wao wothe ũrĩa maananjĩka; o ũmaramari wao wothe ũrĩa maananjĩka ndĩmohere, o ũcio wa kwagarara watho wakwa.
• 9. Narĩo rĩĩtwa rĩa itũũra rĩrĩ nĩrĩgatũma ndũũre ngenete, o na rĩtũme ngathagwo ngĩikagĩrĩrũo nĩ andũ a ndũrĩrĩ ciothe cia thĩ, iria ikaigua ũhoro wa maũndũ mothe mega marĩa ndĩmekaga, macoke maguoyohe makĩinainaga nĩ ũndũ wa maũndũ macio mothe mega, o na ũhoro wothe wa thayũ ũrĩa ndũmĩte woneke thĩinĩ warĩo.
• 10. O na ningĩ Jehova ekuuga ũũ: Kũndũ gũkũ kwaragio ũhoro wakuo atĩ nĩ kwanangĩku na gũgatigwo gũtarĩ mũndũ o na ũmwe o na kana nyamũ, o gũkũ matũũra-inĩ ma Juda, o na njĩra-inĩ cia Jerusalemu, kũrĩa gũkirĩte ihooru na gũgatigwo gũtarĩ mũndũ ũgũkũgera, kana ũgũgũtũũra, o na kana nyamũ-rĩ, gũkũ guothe nĩgũgacoka kũiguwo
• 11. mũgambo wa gĩkeno na wa arĩa macaũkĩte ngoro, o na wa mũhikania, na wa mũhiki, o na mĩgambo ya andũ arĩa moigaga atĩrĩ, Gathagai Jehova Mũnene wa Ita, nĩ ũndũ Jehova nĩ mwega, nĩ gũkorũo tha ciake itũũraga tene na tene; o na ningĩ kũiguwo mũgambo wa arĩa mamũtwaragĩra magongona ma gũcokia ngatho o nyũmba ya Jehova thĩinĩ. Nĩ gũkorũo andũ a bũrũri ũyũ arĩa maatahirũo nĩngatũma maũcoke na gũtuĩke o ta ũrĩa gwatariĩ mbere; ũguo nĩguo Jehova ekuuga.
• 12. O na ningĩ Jehova Mũnene wa Ita ekuuga ũũ: Kũndũ kũu kwanangĩkĩte, gũgatigwo gũtarĩ mũndũ kana nyamũ, o na matũũra makuo mothe-rĩ, nĩgũgacoka gũtũũrũo nĩ arĩithi makĩarahagia ndũru ciao cia mbũri kuo.
• 13. O na ningĩ Jehova ekuuga atĩrĩ, atĩ o kũu matũũra-inĩ ma bũrũri ũrĩa wĩ irĩma nyingĩ, o na ma bũrũri ũrĩa mũgũu, o na matũũra-inĩ ma mwena wa Gũthini, o na bũrũri wa Benjamini, o na kũndũ kũrĩa kũrigicĩirie Jerusalemu, o na matũũra-inĩ ma Juda-rĩ, nĩkuo ndũru cia mbũri igacoka kuonwo ikĩhĩtũkĩra harĩ mũndũ ũrĩa ũcitaraga.
• 14. Atĩrĩrĩ, Jehova ekuuga atĩrĩ, atĩ matukũ nĩmagoka marĩa ngahingia ũhoro ũcio mwega njarĩtie ũkoniĩ nyũmba ya Isiraeli, o na nyũmba ya Juda.
• 15. Matukũ-inĩ macio, o na ihinda-inĩ rĩu-rĩ, nĩngaarahũrĩra Daudi mũndũ mũthingu ũgerekanĩtio na Thuuna ya mũtĩ, nake nĩagatuanĩra cira na kĩhooto, o na ekanage maũndũ ma ũthingu gũkũ bũrũri ũyũ.
• 16. Matukũ-inĩ macio-rĩ, Juda nĩgũkahonokanio, o narĩo Jerusalemu rĩtũũre rĩĩgangarĩtwo; narĩo rĩĩtwa rĩrĩa rĩgetagwo nĩrĩo rĩrĩ, Jehova-Ũthingu-Witũ.
• 17. Nĩ ũndũ Jehova ekuuga atĩrĩ, Daudi ndarĩ hĩndĩ akaaga mũndũ wa gũikarĩra gĩtĩ kĩa ũnene kĩa nyũmba ya Isiraeli;
• 18. o na kana athĩnjĩri-Ngai arĩa Alawii maage mũndũ wa gũikara mbere yakwa arutage mahaki ma njino, o na acinage indo iria irutagwo cia igongona rĩa mũtu, o na wa kũrutaga magongona marĩa ma mũthenya o mũthenya.
• 19. Ningĩ ndũmĩrĩri ya Jehova ĩgĩkinyĩrĩra Jeremia, akĩĩrũo atĩrĩ,
• 20. Jehova ekuuga ũũ: Mũngĩkorũo mwahota gũthahia kĩrĩkanĩro gĩakwa kĩa mũthenya, o na kĩrĩa gĩa ũtukũ, kwage kũgĩe mũthenya na ũtukũ o mahinda mamo-rĩ,
• 21. hĩndĩ ĩo o nakĩo kĩrĩkanĩro gĩakwa kĩrĩa ndarĩkanĩire na Daudi ndungata yakwa kĩahota gũthahio, o nginya akaaga mũriũ wa gũthamaka aikarĩire gĩtĩ gĩake kĩa ũnene; o nakĩo kĩrĩkanĩro kĩrĩa ndarĩkanĩire na athĩnjĩri-Ngai arĩa Alawii, ndungata ciakwa, kĩhote gũthahio o nakĩo.
• 22. Na rĩrĩ, o ta ũrĩa mbũtũ cia njata cia igũrũ itangĩtarĩka, o na kana mũthanga ũrĩa ũrĩ hũgũrũrũ-inĩ cia iria ũthimĩke-rĩ, ũguo noguo ngaingĩhia rũciaro rũa Daudi ndungata yakwa, o na Alawii arĩa mandungatagĩra.
• 23. Ningĩ ndũmĩrĩri ya Jehova ĩgĩkinyĩrĩra Jeremia, akĩĩrũo atĩrĩ,
• 24. Kaĩ ũtecũranagia ũhoro ũrĩa andũ aya maarĩtie, makoiga atĩrĩ, Mĩhĩrĩga ĩno yerĩ yathurirũo nĩ Jehova-rĩ, nĩamĩteete? Ũguo nĩguo mamenaga andũ akwa, monete ta matangĩcoka gũtuwo rũrĩrĩ rĩngĩ.
• 25. No rĩrĩ, Jehova ekuuga ũũ: Atĩrĩrĩ, kĩrĩkanĩro gĩakwa gĩa atĩ mũthenya o na ũtukũ cionekage kĩngĩaga gũikara kĩrũmĩte-rĩ, ningĩ ingĩkorũo ti niĩ ndatuire atĩ kũgĩe mawatho ma irĩra cia igũrũ o na cia gũkũ thĩ-rĩ,
• 26. hĩndĩ ĩo noguo niĩ na niĩ ngagĩte rũciaro rũa Jakubu, o na rũa Daudi ndungata yakwa, na gũtuĩke atĩ ndikoya andũ a rũciaro rũake matuĩke aathani a gwathaga rũciaro rũa aa Iburahimu, na Isaaka, na Jakubu; amu ndirĩ hingo itagatũma andũ ao arĩa maatahirũo macoke kũndũ kwao, na ndĩmaiguĩre tha.

Home