Go Back

Jeremia Chapter 32

• 1. NINGĨ ĩno nĩyo ndũmĩrĩri ĩrĩa yakinyĩrĩire Jeremia yumĩte he Jehova mwaka wa ikũmi ĩrĩa Zedekia, mũthamaki wa Juda, aakorirũo athamakĩte, naguo nĩguo warĩ mwaka wa ikũmi na ĩnana ĩrĩa Nebukadirezaru aakorirũo athamakĩte.
• 2. Na rĩrĩ, ihinda rĩu mbũtũ cia ita cia mũthamaki wa Babuloni igĩgĩkorũo irigicĩirie Jerusalemu irĩtunyane, nake Jeremia ũcio mũnabii agĩkorũo ohetwo kĩhingo-inĩ kĩa arangĩri gĩa kũu nyũmba ya mũthamaki wa Juda.
• 3. Nĩ gũkorũo Zedekia, mũthamaki wa Juda, nĩaamuohithĩtie, akoiga atĩrĩ, Nĩ kĩ gĩgũtũma ũrathe maũndũ ũkoiga atĩ Jehova ekuuga ũũ: Itũũra rĩrĩ-rĩ, nĩngarĩneana moko-inĩ ma mũthamaki wa Babuloni, nake arĩĩgwatĩre,
• 4. na atĩ Zedekia, mũthamaki wa Juda, ndakahonoka aage kũnyitwo nĩ Akalidei, no atĩ ti-itherũ nĩakaneanwo moko-inĩ ma mũthamaki wa Babuloni, maaranĩrie magĩcokanagĩria na tũnua, na makũũranĩire maitho na mũthamaki ũcio wa Babuloni;
• 5. nake nĩakarindũra Zedekia amũtware Babuloni, nakuo kũu nokuo agatũũra, o nginya hĩndĩ ĩrĩa ngathiĩ kũmũrora? Ũguo nĩguo Jehova ekuuga. Ningĩ atĩ, o na mwarũa mbaara na Akalidei-rĩ, mũtikona mũnyaka?
• 6. Nake Jeremia akiuga ũũ: Ndũmĩrĩri ya Jehova nĩyanginyĩrĩire, ngĩĩrũo ũũ:
• 7. Atĩrĩ, Hanameli, mũrũ wa Shalumu mamaguo, nĩegũũka kũrĩ wee, akwĩre atĩrĩ, Wĩgũrĩre mũgũnda wakwa ũrĩa ũrĩ Anathothu; nĩ ũndũ wee nĩwe wĩ na kĩhooto gĩa kũũkũũra ũũgũre.
• 8. Nake Hanameli, mũrũ wa mama, agĩgĩũka akĩngora kũu kĩhingo-inĩ kĩu kĩa arangĩri, o ta ũrĩa ndũmĩrĩri ya Jehova yatariĩ, akĩnjĩra atĩrĩ, Gũra mũgũnda wakwa, ndagũthaitha, o ũcio ũrĩ Anathothu, kũu bũrũri wa Benjamini, nĩ ũndũ kĩhooto gĩa kũũgaya nĩ gĩaku, o naguo ũhoro wa gũgĩkũũra no waku. Tondũ ũcio ta kĩwĩgũrĩre wee mwene. Hĩndĩ ĩo ngĩmenya atĩ ndũmĩrĩri ĩo yumĩte he Jehova.
• 9. Na niĩ ngĩkĩgũra mũgũnda ũcio wa kũu Ahathothu, o ũcio wa Hanameli mũrũ wa mama, ngĩmũthimĩra mbia, nacio ciarĩ cekeri ikũmi na mũgwanja cia betha.
• 10. Ningĩ ngĩcoka ngĩĩkĩra thaĩri marũa ma ũgũri wa gĩthaka kĩu na ngĩmacinĩrĩra rũũri rũakwa, ningĩ ngĩĩta aira a ũhoro ũcio, o na ngĩkĩmũthimĩra mbia icio na ratiri.
• 11. Ngĩcoka ngĩoya marũa ma ũgũri, o macio maacinĩrĩirũo rũũri maandĩkĩtwo ũrĩa kĩrĩkanĩro kĩu gĩatariĩ, o na mangĩ mataarĩ makũnje;
• 12. namo marũa macio ma ũgũri ngĩmaneana harĩ Baruku, mũrũ wa Neria wa Maaseia, Haaameli, mũrũ wa mama, akĩĩonagĩra, o na arĩa mekĩrĩte thaĩri ciao marũa-inĩ macio ma ũgũri makĩĩonagĩra, o na Ayahudi arĩa maaikaraga kĩhingo-inĩ kĩu kĩa arangĩri makĩĩonagĩra o nao.
• 13. Na niĩ ngĩgĩtaara Baruku, andũ acio marĩ ho, ngĩmwĩra atĩrĩ,
• 14. Jehova Mũnene wa Ita, o we Ngai wa Isiraeli, ekuuga ũũ: Oya marũa maya ma ũgũri wa gĩthaka, o maya maandĩkĩtwo ma ũgũri wakĩo magacinĩrĩrũo rũũri rũakwa, o na maya mangĩ matarĩ makũnje, ũmekĩre ndigithũ-inĩ nĩ getha matũũre matukũ maingĩ.
• 15. Nĩ gũkorũo Jehova Mũnene wa Ita, o we Ngai wa Isiraeli, ekuuga ũũ: Nyũmba, o na mĩgũnda, o na mĩgũnda ya mĩthabibu, itirĩ hingo itagacoka kũgũrũo rĩngĩ bũrũri ũyũ.
• 16. Na rĩrĩ, ndarĩkia kũnengera Baruku wa Neria marũa macio ma ũgũri wa gĩthaka, ngĩcoka ngĩhoya Jehova, ngiuga ũũ:
• 17. Atĩrĩrĩ, Mwathani Jehova, wee nĩwe wombire igũrũ na thĩ na ũndũ wa hinya waku mũnene, o na undũ wa gũtambũrũkia guoko gwaku; wee-rĩ, ndũrĩ ũndũ ũngĩkũgĩtĩra hinya.
• 18. Ũiguagĩra andũ ngiri na ngiri tha, naguo waganu wa maithe ũkaũcokereria ciana ciao thutha wao, o ithũri-inĩ cia ciana icio. Mũrungu ũrĩa mũnene na mwene hinya-rĩ, Jehova Mũnene wa Ita nĩrĩo rĩĩtwa rĩake.
• 19. Wee nĩwe mũnene ũheani-inĩ wa kĩrĩra, na nĩwe ũrutaga mawĩra ma hinya, na nĩwe ũikaraga ũracũrĩirie mĩthiĩre yothe ya ciana cia kĩrĩndĩ maitho, nĩ getha ũhe mũndũ o mũndũ maũndũ maringaine na mĩthiĩre yake, o marĩa moimanĩte na ciĩko ciake.
• 20. Wee nĩwe waringire ciama o na ũkĩonania morirũ kũu bũrũri wa Misiri, o na ningĩ no wĩkaga maũndũ ta macio bũrũri wa Isiraeli, o na thĩinĩ wa andũ arĩa angĩ, o na ũmũthĩ; nawe ũgĩgĩĩka maũndũ ma gũtũma ũgĩe igweta, o ta ũrĩa gũtariĩ ũmũthĩ.
• 21. Ningĩ ũkĩruta andũ aku bũrũri wa Misiri na ũndũ wa kũringa ciama o na kuonania morirũ, o na ũndũ wa guoko kwĩ hinya, o kũrĩa ũgũtambũrũkĩtie, o na ũndũ wa maũndũ manene ma kũguoyohanaa;
• 22. nawe ũgĩkĩmahe bũrũri ũyũ, o ũyũ wehĩtire ũkĩĩra maithe mao atĩ nĩũkamahe, naguo nĩ bũrũri wĩ bũthi wa iria o na ũũkĩ;
• 23. nao magĩtonya kuo, makĩwĩgwatĩra ũgĩtuĩka wao; no matiigana kũigua mũgambo waku, o na kana magĩthiĩ na mĩthiĩre ya kũrũmĩrĩra watho waku. Matirĩ meka ũndũ o na ũmwe wa maũndũ marĩa wamaathire mekage; naguo ũndũ ũcio nĩguo ũtũmĩte maũũru maya mothe mamakore.
• 24. Ta rora ihumbu cia tĩri iria ciũmbĩtwo nĩ andũ arĩa mokĩte itũũra-inĩ rĩrĩ marĩĩgwatĩre; ti-therũ itũũra rĩrĩ nĩrĩrekereirio rĩkaneanwo moko-inĩ ma Akalidei arĩa mekũrũa mbaara narĩo, na ũndũ wa hiũ cia njora, o na ng’aragu, o na mũthiro. Ti-itherũ ũudũ ũrĩa waaririe nĩ mũhingie, na atĩrĩrĩ, wee mwene nĩũrawĩyonera ũkĩhingio.
• 25. Wee nawe Mwathani Ngai ũnjĩrĩte ũũ: Wĩgũrĩre mũgũnda ũyũ na mbia, na wĩte aira; no rĩrĩ, itũũra rĩrĩ nĩrĩneanĩtwo moko-inĩ ma Akalidei o na rĩu.
• 26. Hĩndĩ ĩo ndũmĩrĩri ya Jehova ĩgĩkinyĩrĩra Jeremia, akĩĩrũo ũũ:
• 27. Atĩrĩrĩ, niĩ nĩ niĩ Jehova, Ngai wa andũ arĩa othe marĩ muoyo; nĩkũrĩ ũndũ o na ũrĩkũ hihi ũngĩngĩtĩra hinya?
• 28. Tondũ ũcio Jehova ekuuga ũũ: Atĩrĩrĩ, nĩngũrekereria itũũra rĩrĩ ndĩrĩneane moko-inĩ ma Akalidei, o na moko-inĩ ma Nebukadirezaru, mũthamaki wa Babuloni, arĩĩgwatĩre,
• 29. nao Akalidei arĩa mekũrũa mbaara na itũũra rĩrĩ nĩmagoka marĩikie mwaki, marĩcine hamwe na nyũmba ciarĩo iria itũire icinagĩrũo Baali ũbumba igũrũ rĩacio, o nacio indo cia kũnyuwo igaitagĩrũo ngai ingĩ kuo, nĩ getha ’thirĩkio ndakare.
• 30. Nĩ gũkorũo ciana cia Isiraeli, o na cia Juda, itũire ciĩkaga maũndũ marĩa nyonaga me moru gwata o ũnyinyi-inĩ wacio nĩ ũndũ ciana icio cia Isiraeli itũire i’thirĩkagia igatũma ndakare na ũndũ wa mawĩra marĩa irutaga na moko ma cio; ũguo nĩguo Jehova ekuuga.
• 31. Nĩ gũkorũo itũũra rĩrĩ rĩtũire rĩhaana ũndũ wa gũ’thirĩkia ndakare, o na rĩgatũma njinwo nĩ mathũgũta, gwata mũthenya ũrĩa maarĩakire nginya o ũmũthĩ, o nginya ngenda kũrĩeheria riume ũthiũ-inĩ wakwa,
• 32. nĩ ũndũ wa ũũru wothe wa ciana cia Isiraeli, o na wa ciana cia Juda, ũrĩa cianeka wa gũ’thirĩkia ndakare, cio nyene, na athamaki a cio, na anene a cio, na athĩnjĩri-Ngai a cio, na anabii a cio, na andũ a Juda, o na andũ arĩa matũũraga Jerusalemu.
• 33. Nacio nĩ kũhutata i’hutatĩire ithenya rĩa kũ’hũgũkĩria ũthiũ; ningĩ o na harĩa ndũire ndĩcimenyithagia maũndũ ta arĩ kũroka ndokaga gũũkĩra rũcinĩ tene nĩguo ndĩcimenyithie-rĩ, cianarega kũnjigua atĩ nĩguo itaarĩke.
• 34. No rĩrĩ, indo ciacio iria irĩ thahu nĩ gwĩkĩra iciekĩrire nyũmba-inĩ ĩrĩa ĩĩtanĩtio na rĩĩtwa rĩakwa, nĩguo imĩthahie.
• 35. Ningĩ igĩakĩra Baali matĩri ma kũndũ gũtũũgĩru o kũu gĩtuamba-inĩ kĩa mũrũ wa Hinomu, nĩ getha itũme ihĩĩ ciacio, o na airĩtu a cio mahĩtũkagĩrio mwaki-inĩ marutĩrũo Moleku; na nĩ ũndũ ũrĩa itaaciathire ũhoro waguo, o na kana ũkĩngĩa meciria-inĩ makwa, atĩ ciĩke ũndũ ũcio wĩ thahu wa gũtũma andũ a Juda mehie.
• 36. Tondũ ũcio, Jehova, o we Ngai wa Isiraeli, araaria ũhoro wa itũũra rĩrĩ mwaragia ũhoro warĩo mũkoiga atĩ nĩrĩneanĩtwo moko-inĩ ma mũthamaki wa Babuloni, na ũndũ wa ũrĩa arĩtharĩkĩire na hiũ cia njora, o na ũndũ wa ng’aragu, na mũthiro,
• 37. akoiga ũũ: Atĩrĩrĩ, nĩngamacokereria moime mabũrũri mothe, o kũrĩa ndamatwarithirie nĩ ũndũ wa marakara makwa, na mang’ũrĩka, o na mathũgũta manene mũno, ndĩmacokie kũndũ gũkũ, ndũme maikare kuo megangarĩte;
• 38. nao nĩmagatuĩka andũ akwa, na niĩ nduĩke Ngai wao,
• 39. na ndũme magĩe rũmwe maũndũ-inĩ ma ngoro ciao o na mĩthiĩre-inĩ yao, nĩ getha matũũre meĩndigĩrĩte tene na tene; nĩguo matũũre monaga wega o ene, o na ciana ciao iria igoka thutha wao.
• 40. Na nĩngarĩkanĩra nao kĩrĩkanĩro gĩa gũtũũra tene na tene, gĩa atĩ ndigacoka kũmahutatĩra ndige kũmeka maũndũ mega; na nĩngatũma magĩe na ngoro cia kwĩĩndigĩra, nĩ getha matikanatigane na iiiĩ.
• 41. Ĩĩ, ti-itherũ nĩngekenagĩra nĩo ngĩmekaga maũndũ mega, na njikare ta ndĩmahandĩte bũrũri ũyũ kũna, ngwatĩirie ũhoro ũcio na ngoro yakwa yothe, o na muoyo wakwa wothe.
• 42. Nĩ ũndũ Jehova ekuuga ũũ: O ta ũrĩa ndarehithirie ũũru ũyũ wothe ũkore andũ aya-rĩ, ũguo noguo ngamarehithĩrie maũndũ mothe mega marĩa ndĩmerĩire.
• 43. Nayo mĩgũnda ĩkagũragwo bũrũri ũyũ, o ũyũ muugaga atĩ nĩ mũkiru ihooru, na ũgatigwo ũtarĩ mũndũ o na ũmwe o na kana nyamũ; na atĩ nĩũneanĩtwo moko-inĩ ma Akalidei.
• 44. Andũ no magacoka kũgũraga mĩgũnda na mbia, na maandĩkanagĩre marũa ma ũgũri, na mamacinagĩrĩre marũũri mao, na metage aira, o kũu bũrũri wa Benjamini, o na kũndũ kũingĩ ndere-inĩ cia Jerusalemu, o na matũũra-inĩ ma Juda, o na ma bũrũri ũrĩa wĩ ĩrĩma nyingĩ, o na ma bũrũri ũrĩa mũgũu, o na ma mwena wa Gũthini; nĩ ũndũ nĩngatũma atĩ andũ ao arĩa maatahirũo macoke kuo; ũguo nĩguo Jehova ekuuga.

Home