Go Back

Jeremia Chapter 26

• 1. NA RĨRĨ, ihinda rĩrĩa Jehoiakimu, mũrũ wa Josia, mũthamaki wa Juda, aambĩrĩirie gũthamaka-rĩ, nĩguo ndũmĩrĩri ĩno ya Jehova yanginyĩrĩire, ngĩĩrũo atĩrĩ,
• 2. Jehova ekuuga ũũ: Rũgama nja ya nyũmba ya Jehova, warĩrie andũ othe a matũũra ma Juda, arĩa mathiaga kũinamĩrĩra kũu nyũmba ya Jehova mahoe, ũmahe ũhoro wothe ũrĩa ngũgwatha warie nao; na ndũkae kũhitha o na kiugo kĩmwe.
• 3. Hihi no gũkorũo nĩmegũthikĩrĩria na magarũrũke, mũndũ o mũndũ atigane na mĩthiĩre yake mĩũru; nĩ getha niĩ na niĩ ndĩĩricũkwo ndige gwĩka ũũru ũrĩa njirĩire kũmeka nĩ ũndũ wa ũũru wa ciĩko ciao.
• 4. Nawe ũmere atĩrĩ, Jehova ekuuga ũũ: Mũngĩaga kũnjigua, nĩguo mũthiage na mĩthiĩre ya kũrũmĩrĩra watho wakwa ũrĩa njigĩte mbere yanyu,
• 5. na mũthikagĩrĩrie mohoro ma ndungata ciakwa cia anabii, o icio ndekagia kũrĩ inyuĩ ta arĩ kũroka ndokaga gũũkĩra rũcinĩ tene ndĩcirekie, no mũkaaga gũciigua-rĩ,
• 6. hĩndĩ ĩo nĩngatũma nyũmba ĩno ĩtuĩke o ta Shilo, o narĩo itũũra rĩrĩ rĩtũũre rĩgwetagwo gũkĩrumanwo kĩrumi nĩ andũ a ndũrĩrĩ ciothe cia thĩ.
• 7. Nao athĩnjĩri-Ngai, o na anabii, o na andũ arĩa angĩ othe, makĩigua Jeremia akĩarĩria ũhoro ũcio o kũu thĩinĩ wa nyũmba ya Jehova.
• 8. Na gũgĩkinya atĩrĩ, atĩ hĩndĩ ĩrĩa Jeremia aarĩkirie kwaria maũndũ mothe marĩa Jehova aamwathĩte aarĩrie andũ othe-rĩ, athĩnjĩri-Ngai, o na anabii, o na andũ arĩa angĩ othe, makĩmũnyita, makiugaga atĩrĩ, Wee ti-itherũ ndũrĩ hingo ũtegũkua.
• 9. Nĩ kĩ gĩtũmĩte ũrathe ũhoro ũkĩgwetaga rĩĩtwa rĩa Jehova, ũkiugaga atĩ nyũmba ĩno ĩgatuĩka o ta Shilo, o na atĩ itũũra rĩrĩ nĩrĩgakira ihooru, rĩage andũ marĩtũũrĩte? Nao andũ othe magĩkĩũnganĩra Jeremia kũu thĩinĩ wa nyũmba ya Jehova.
• 10. Na rĩrĩ, anene a Juda maaigua maũndũ macio, makĩambata makiuma kũu nyũmba ya mũthamaki, magĩthiĩ nyũmba ya Jehova; nao magĩgĩikara itonyero-inĩ rĩa nyũmba ya Jehova o kĩhingo-inĩ kĩrĩa kĩa mũthondekano.
• 11. Hĩndĩ ĩo athĩnjĩri-Ngai o na anabii makĩarĩria anene, o na andũ arĩa angĩ othe, makĩmera atĩrĩ, Mũndũ ũyũ nĩaagĩrĩirũo nĩ gũkua; nĩ gũkorũo nĩarathĩte ũhoro wa atĩ itũũra rĩrĩ nĩrĩgakorũo nĩ ũũru, o ta ũrĩa mwĩiguĩrĩire na matũ manyu.
• 12. Hĩndĩ ĩo Jeremia akĩarĩria anene othe, o na andũ othe, akĩmera atĩrĩ, Nĩ Jehova wandekirie ngarathe ũhoro wa atĩ uũru nĩũgakora nyũmba ĩno, o na itũũra rĩrĩ, naguo nĩguo ũcio wothe mũiguĩte.
• 13. Tondũ ũcio agĩriai mĩthiĩre yanyu, o na ciĩko cianyu, na mwathĩkĩre uuge wa Jehova Ngai wanyu; nake Jehova nĩekwĩricũkwo atige gwĩka ũũru ũrĩa amũgweteire.
• 14. No rĩrĩ, ha ũhoro wakwa niĩ mwene-rĩ, ndĩ moko-inĩ manyu; ta njĩkai o ta ũrĩa mũrĩona arĩ wega, o na ta kwagĩrĩire.
• 15. No rĩrĩ, menyai ũndũ ũyũ na ma, atĩ mũngĩnjũraga, nĩ gũtũma mũgũtũma mũcokererũo nĩ thakame ya mũndũ ũtarĩ na ũũru ekĩte, ĩmũcokerere inyuene, o na itũũra rĩrĩ, o na andũ arĩa marĩtũũraga. Nĩ ũndũ ti-itherũ Jehova nĩandeketie kũrĩ inyuĩ ndĩmwarĩrie mohoro macio mothe mũkĩĩiguagĩra.
• 16. Hĩndĩ ĩo anene, o na andũ arĩa angĩ othe, magĩcoka makĩĩra athĩnjĩri-Ngai, o na anabii, atĩrĩ, Mũndũ ũyũ ndaagĩrĩirũo nĩ gũkua; nĩ gũkorũo atwarĩirie ũhoro o akĩgwetaga rĩĩtwa rĩa Jehova Ngai witũ.
• 17. Hĩndĩ ĩo hagĩkĩrũgama athuri amwe a bũrũri ũcio, makĩarĩria ũũngano ũcio wothe wa andũ, makĩtwĩra atĩrĩ,
• 18. Mikaya ũrĩa Mũmorashiti nĩaarathire mohoro matukũ ma Hezekia, mũthamaki wa Juda, agĩkĩarĩria andũ othe a Juda, akiuga atĩrĩ, Jehova Mũnene wa Ita ekuuga ũũ: Zayuni nĩgũkarĩmwo o ta mũgũnda, o narĩo Jerusalemu rĩtuĩke o ta hĩba cia mahuti, o nakĩo kĩrĩma gĩkĩ gĩakĩtwo nyũmba ĩno gĩtuĩke o ta matĩri marĩa maakĩtwo kũndũ gũtũũgĩru mũtitũ-inĩ.
• 19. Rĩu-rĩ, Hezekia, mũthamaki wa Juda, o na andũ othe a Juda, me hĩndĩ maakĩmũũragire? Githĩ ndaagĩĩtigĩrire Jehova, na agĩthaithana atĩ etĩkĩrĩke nĩ Jehova, nake Jehova agĩkĩĩricũkwo agĩtiga gwĩka ũũru ũrĩa aamagweteire? Naho ha ũhoro witũ-rĩ, tũtirĩ hinya tũgĩtũma ũũru mũnene ũtũcokerere ũgwate maroho maitũ ithuene.
• 20. Ningĩ he mũndũ ũngĩ warathire ũhoro akĩgwetaga rĩĩtwa rĩa Jehova, nake nĩ Uria wa Shemaia, wa kũu Kiriathu-jearimu; nake agĩkĩratha ũhoro wa atĩ itũũra rĩrĩ nĩrĩgakorũo nĩ ũũru, o na bũrũri ũyũ, o ta ũrĩa ũhoro ũcio wothe warĩtio nĩ Jeremia ũtariĩ.
• 21. Na rĩrĩ, hĩndĩ ĩrĩa Jehoiakimu, mũthamaki, o na andũ ake othe arĩa njamba, o na anene othe, maaiguire ũhoro ũcio, mũthamaki agĩcaria njĩra ya kũmũũraga; no rĩrĩa Uria aaiguire ũhoro ũcio, agĩĩtigĩra, akĩũra, agĩthiĩ Misiri;
• 22. nake Jehoiakimu, mũthamaki, agĩkĩrekia andũ Misiri, nao nĩ Elinathani wa Akiboru me hamwe na andũ amwe angĩ; magĩthiĩ Misiri,
• 23. na magĩkĩgĩra Uria makĩmũruta kũu Misiri, makĩmũtwara kwĩ Jehoiakimu, mũthamaki; nake agĩkĩmũũragithia na rũhiũ rũa njora, nakĩo kĩimba gĩake agĩgĩthikithia mbĩrĩra-inĩ cia andũ arĩa matarĩ itarĩri.
• 24. No rĩrĩ, guoko kwa Ahikamu wa Shafani nĩ ta kwagitĩire Jeremia, nĩ getha matikamũnenganĩre moko-inĩ ma andũ acio mamũũrage.

Home