Go Back

Jeremia Chapter 24

• 1. ATĨRĨRĨ, nĩ kuonio ndonirio ũhoro nĩ Jehova wa ikabu igĩrĩ cia ngũyũ ciigĩtwo mbere ya hekarũ ya Jehova, thutha wa hĩndĩ ĩrĩa Nebukadirezaru, mũthamaki wa Babuloni, aakorirũo arindũrĩte Jekonia, mũrũ wa Jehoiakimu, mũthamaki wa Juda, o na anene a Juda, akamatwara marĩ ohe, hamwe na abundi o na aturi, amarutĩte Jerusalemu, agakĩmatwara Babuloni.
• 2. Gĩkabu kĩmwe kĩarĩ ngũyũ njega mũno, o ta ngũyũ iria ciambaga kwĩrua; nakĩo gĩkabu kĩrĩa kĩngĩ gĩgĩkorũo kĩrĩ ngũyũ njũru mũno, itangĩrĩĩka nĩ ũndũ wa ũrĩa ithũkĩte.
• 3. Hĩndĩ ĩo Jehova agĩkĩnjũria atĩrĩ, Nĩ kĩ ũrona, Jeremia? Niĩ na niĩ ngiuga atĩrĩ, Nĩ ngũyũ; nacio imwe nĩ ngũyũ njega, ikaagĩra ma, na ingĩ nĩ njũru, igathũka mũno, na itingĩrĩĩka nĩ ũndũ wa ũrĩa ithũkĩte.
• 4. Nayo ndũmĩrĩri ya Jehova ĩkĩnginyĩrĩra ngĩĩrũo atĩrĩ,
• 5. Jehova Ngai wa Isiraeli ekuuga ũũ: O ta ũrĩa ngũyũ icio imwe ikuonwo irĩ njega-rĩ, ũguo noguo ngonaga andũ a Juda arĩa maatahirũo marĩ a kwendeka, ndĩmeke wega, o acio ndatwarithirie bũrũri wa Akalidei moimĩte bũrũri ũyũ.
• 6. Nĩ ũndũ maitho makwa nĩngamaroria kũrĩ o ndĩmeke maũndũ mega, na nĩngamacokia bũrũri ũyũ, njikare ndĩmarũmĩtie, na ndimahomie; ningĩ njikare ta arĩ kũhanda ndĩmahandĩte guo, na ndicoke kũmamunya.
• 7. O na ningĩ ndĩmahe ngoro ya gũtũma ma’menye, atĩ niĩ nĩ niĩ Jehova, nao matuĩke andũ akwa, o na niĩ nduĩke Ngai wao; nĩ gũkorũo nĩmakangarũrũkĩra na ngoro ciao ciothe.
• 8. Naho ha ũhoro wa ngũyũ icio njũru, o icio itangĩrĩĩka nĩ ũndũ wa ũrĩa ithũkĩte mũno-rĩ, ti-itherũ Jehova ekuuga ũũ: Ũguo nĩguo ngarekereria Zedekia, mũthamaki wa Juda, o na anene ake, o na matigari ma andũ a Jerusalemu, o arĩa matigarĩte bũrũri ũyũ, o na arĩa matũũraga bũrũri wa Misiri;
• 9. nĩ kũrekereria ngamarekereria mahũgio, matwarũo kũndũ guothe kũrĩa gũthamakagwo nĩ athamaki a thĩ nĩ ũndũ wa ũũru wao, nĩguo mameneke, o na matuĩke a kuunagwo thimo, o na a gũthekagĩrĩrũo, o na a gũtũũra magwatĩtwo nĩ kĩrumi, o kũndũ guothe kũrĩa ngamatwarithia.
• 10. Na nĩngamatwarithĩria rũhiũ rũa njora, na ng’aragu, o na mũthiro, maikare thĩinĩ wao, o nginya hĩndĩ ĩrĩa makaninũkio mehere bũrũri ũyũ ndamaheire o na ngĩhe maithe mao.

Home