Go Back

Jeremia Chapter 15

• 1. Ningĩ Jehova akĩnjĩra atĩrĩ, O na Musa na Samueli mangĩkorũo marũgamĩte mbere yakwa-rĩ, ndingĩrũmbũiya ũhoro wa andũ aya. Marutũrũrei mehere mbere yakwa, ndige kũmona, mathenge o gũthenga!
• 2. Na nĩgũgakinya atĩrĩ, atĩ mangĩgakũũria ũũ: Tũgũgĩthenga tũthiĩ na kũ? wee nawe ũkĩmere atĩrĩ, Jehova ekuuga ũũ: Arĩa maathĩrĩirio gĩkuũ-rĩ, nĩ magakue, o nao arĩa maathĩrĩirio kũũragwo na rũhiũ rũa njora, nĩ makoragwo na rũhiũ rũu, o nao arĩa maathĩrĩirio ng’aragu nĩ makagwatwo nĩyo, o nao arĩa maathĩrĩirio gũtahwo, nĩ magatahwo.
• 3. Niĩ na niĩ ngakĩmaathĩrĩria mũthiro wa mĩthemba ĩna; ũguo nĩguo Jehova ekuuga: amwe nĩ rũhiũ rũa njora rũkamakora rũũragane, na angĩ matarũrangwo nĩ magui, na angĩ maneanwo harĩ nyamũ cia rĩera-inĩ, nao angĩ maneanwo harĩ nyamũ cia gĩthaka imarĩe, imanine.
• 4. Na nĩngatũma macangagio kũndũ guothe kũrĩa gũthamakagwo nĩ athamaki a gũkũ thĩ, nĩ ũndũ wa Manase, mũrũ wa Hezekia, mũthamaki wa Juda, nĩ ũndũ wa maũndũ marĩa ekire gũkũ Jerusalemu.
• 5. Nĩ ũndũ-rĩ, mũndũ ũrĩa ũgagĩkũiguĩra tha nũ, wee Jerusalemu? Kana hihi nũ ũgagĩkũrĩrĩra? O na kana hihi nũ ũgagĩkerũra oke amenye ũrĩa ũhoro waku ũtariĩ?
• 6. Jehova ekuuga atĩrĩ, Wee-rĩ, nĩ kũrega wandegire, ũkĩ’hutatĩra, na tondũ ũcio nindambũrũkĩtie guoko gwakwa ngakũninithia; ndĩ mũnogie nĩ ũhoro wa gũtũũra ndĩĩricũkagwo.
• 7. Nĩndĩmahuhĩte ta mahuti mahuhĩtwo na gĩtarũrũ, mehere ihingo-inĩ ciothe cia bũrũri ũyũ marĩ, nangatũma mathirĩrũo nĩ ciana ciao; nao andũ akwa-rĩ, nĩ kũnina ndĩmaninĩte, tondũ matiigana kũhera ma tigane na mĩthiĩre ĩo yao.
• 8. Aka ao a ndigwa nĩmanyingĩhĩire magakĩra mũthanga wa iria-inĩ, na ndĩmarehithĩirie atahani a gũtahana mĩaraho, matharikĩre manyina ma aanake ao; ĩĩ, ti-itherũ, nĩ gũtũma ngĩtũmĩte makorererũo na mbũkĩrĩra nĩ maũndũ me itua-nda, na matuurũo nĩ ngoro.
• 9. O na mũtumia ũrĩa ũciarĩte ciana mũgwanja nĩorĩtwo nĩ hinya, na akoimwo nĩ muoyo ta athũĩirũo nĩ riũa mũthenya barigici; we mwene nĩ mũigu thoni, o na agaconorithio; namo matigari ma andũ ake ngamarekereria ndĩmaneane maninwo na hiũ cia njora nĩ thũ ciao; ũguo nĩguo Jehova ekuuga.
• 10. Wũi-ĩiya-wakwa, maitũ-ĩ, nĩ amu wanjiarire nduĩke o mũtetania na andũ, o na nduĩke mũgiani na andũ a thĩ yothe! Ndiohoranĩire indo atĩ nĩ getha ngaheo uumithio, o na kana andũ makanjohorera nĩguo ngamahe uumithio arĩ o; no rĩrĩ, othe no kũnuma manumaga.
• 11. Jehova oigĩte atĩrĩ, Ti-itherũ nĩngagwĩkĩra hinya nĩguo ũgaacĩre; ĩĩ, ti-itherũ nĩngatũma thũ yaku ĩgũthaithe hĩndĩ ĩrĩa yona ũũru o na hĩndĩ ĩrĩa yanyarirĩka.
• 12. Rĩu-rĩ, anga mũndũ aahota kuuna kĩgera, o kĩgera kĩrĩa kiumĩte gathigathini, o na gĩcango?
• 13. Indo ciaku ciothe ngacirekereria itahwo, hamwe na indo iria ingĩ ciaku cia goro, na ndũrĩ uumithio ũkona harĩ cio; ũguo nĩguo gũgatuĩka nĩ ũndũ wa mehia maku mothe, o marĩa maanekwo bũrũri waku wothe nginya o mĩhaka-inĩ yaguo yothe.
• 14. Niĩ na niĩ-rĩ, ngatũma indo icio itwarũo nĩ thũ ciaku bũrũri ũrĩa wee ũtoĩ, nĩ gũkorũo marakara makwa maakanĩte ta mwaki, namo matirĩ hingo matakamũcina.
• 15. Atĩrĩrĩ, wee Jehova, wee nĩwe ũnjũĩ; ndirikana, na ũndorage, na ũndĩhagĩrie harĩ andũ arĩa ma’nyariraga; tiga kũndekereria ’ninũkio, nĩ ũndũ wa ũrĩa utũire ũkirĩrĩirie ũhoro wao; menya atĩ ndũire ’nyariragwo na ngamenwo nĩ ũndũ waku.
• 16. Rĩrĩa ndeto icio ciaku cionekaga, nĩ kwĩnyitĩra ndaciĩnyitagĩra, ngaciĩkĩra ngoro ta arĩ kũrĩa ndĩcirĩĩte, nacio igatuĩka cia kũngenia, o na cia kũnjiguithia wega ngoro; nĩ gũkorũo njĩtanĩtio na rĩĩtwa rĩaku, wee Jehova Ngai Mũnene wa Ita.
• 17. Ndiigana gũikara gĩtindanio-inĩ kĩa arĩa matũire maringanaga itherũ, o na kana ngĩkenanĩra nao; nĩ kwĩikaria ndeikaririe ndĩ nyiki ndiĩrĩtwo nĩ guoko gwaku, na ngarakara o marakara maku.
• 18. Nĩ kĩ gĩtũmaga ruo rũndũũrĩrĩre, o nayo nguraro yakwa ĩkeha, ĩkarema kũhoneka? Anga ũgũkĩnduĩkĩra o ta karũũĩ karĩa gatangĩtũũra kehokekete, o na ta gĩthima kĩa maĩ kĩrĩa kĩhũaga?
• 19. Tondũ ũcio Jehova ekuuga atĩrĩ, Ũngĩhũndũka-rĩ, hĩndĩ ĩo niĩ o na niĩ ndagũcokia harĩ niĩ, nĩ getha ũrũgamage mbere yakwa; nawe ũkĩaria-rĩ, ũngĩkũũrana maũndũ marĩa me bata na marĩa marĩ magigi, waya gũtuĩka o ta kanua gakwa; andũ acio nĩmakagucĩrĩrio nĩwe, no wee tiwe ũkagucĩrĩrio nĩo.
• 20. Naho ha ũhoro wa andũ acio-rĩ, ngagũtua ta ũirigĩirũo na rũthingo rũa gĩcango, nao nĩmakarũa mbaara nawe, no rĩrĩ, matigagũtoria; nĩ gũkorũo ndĩ hamwe nawe ngũhonokie na ngũteithũre; ũguo nĩguo Jehova ekuuga.
• 21. Na nĩngagũteithũra ngũrute moko-inĩ ma andũ arĩa aaganu, na ngũkũũre uume moko-inĩ ma andũ arĩa me itua-nda.

Home