Go Back

Jeremia Chapter 12

• 1. Atĩrĩrĩ, wee Jehova, rĩrĩa rĩothe ngoragwo ngĩteta harĩ wee, ũtũire o ũnduagĩra cira na kĩhooto; no rĩrĩ, o na gwatuĩka nĩ ũguo-rĩ, ndĩrenda tũteretange ũhoro ũyũ. Rĩu-rĩ, nĩ kĩ gĩtũmaga mũndũ ũrĩa mwaganu aikare agaacĩire mĩthiĩre-inĩ yake? Ningĩ nĩ kĩ gĩtũmaga andũ othe arĩa magarũkaga andũ arĩa angĩ na ũrĩa-ng’ũũrũ matũũre megangarĩte?
• 2. Nĩ ta kũmahanda ũmahandĩte, nao magaikara makindĩirie ta magwatĩte mĩri; ningĩ nĩ gũkũra marakũra, na magaciara maciaro. Wee no kũgwetwo ũgwetagwo na tũnua twao, ĩndĩ meciria ma ngoro ciao me haraya nawe.
• 3. No rĩrĩ, wee Jehova nĩũnjũĩ; nĩũnyonaga, na ũkoiruria ngoro yakwa ũkamenya ũrĩa ndĩmĩroretie harĩ wee. Magucũrũrie ta mbũri igũthiĩ gũthĩnjwo, na ũmaamũrĩre mũthenya wao wa kũũragwo.
• 4. Hĩ! Ĩ thĩ ĩgũtũũra na kĩrĩro nginya hĩndĩ ĩ, o natuo tũmĩtĩ tũrĩa tũmeraga bũrũri wothe tũikare tũhohete? Amu nyamũ ciothe ciakuo, o na nyoni, nĩ kũninwo ininĩtwo nĩ ũndũ wa waganu wa andũ arĩa matũũraga kuo, nĩ gũkorũo andũ acio moigaga atĩrĩ, Maũndũ maitũ ma kũrigĩrĩria ndarĩ hingo akamona.
• 5. Rĩu-rĩ, ũngĩgĩkorũo nĩũteng’eranĩtie na andũ magĩthiĩ na magũrũ, nao magakũnogia-rĩ, wakĩhota atĩa gũcindana na mbarathi? Ningĩ-rĩ, o na harĩa ũikaraga ũtarĩ na ũgwati bũrũri ũrĩa ũrĩ thayũ-rĩ, ũgagĩĩka atĩa rĩrĩa ũgakorũo nĩ mũiyũro wa Jorodani?
• 6. Nĩ ũndũ ariũ a nyũkwa o nao, o na andũ a nyũmba ya thoguo, nĩmakũgarũkĩte na ũrĩa-ng’ũũrũ, magacoka gũgwathamĩria kanua makuumĩte thutha. Menya ũmehoke o na mangĩkwarĩria ndeto njega ta kĩ!
• 7. Niĩ Jehova nĩ’thamĩte nyũmba yakwa, naguo ũgai ũrĩa ndarathimĩirũo nĩ gũte ndĩũteete, o nake mwendwa wa ngoro yakwa ngamũneana moko-inĩ ma thũ ciake.
• 8. Amu ũgai wakwa nĩũ’thũkĩire ũkanduĩkĩra ta mũrũthi wĩ mũtitũ-inĩ; nĩ kũrarama ũndaramĩire, na tondũ ũcio ngaũthũũra.
• 9. Kaĩ ũgai wakwa ũkĩnduĩkĩire o ta nderi ĩĩ marooro? nayo ĩgacoka kũrererũo nĩ nderi iria ingĩ? Thiĩi mũkonganie nyamũ ciothe cia gĩthaka mũcirehe imĩrĩe, imĩninũkie.
• 10. Arĩithi aingĩ nĩmaanangithĩtie mũgũnda wakwa wa mĩthabibu, o naguo ũgai wakwa makaũrangĩrĩria thĩ, o nakĩo gĩthaka kĩrĩa kĩega ndagaĩirũo magagĩtua o ta baraganya wa werũ wĩ mũkiru ihooru.
• 11. Ĩĩ, ti-itherũ nĩmatũmĩte gĩkire ihooru, nakĩo kĩnjĩkĩrĩte kĩeha nĩ ũndũ wa ũrĩa gĩkirĩte ihooru ũguo; bũrũri wothe no gũkira ũkirĩte ihooru o ro ũguo, nĩ gũkorũo hatirĩ mũndũ ũrũmbũyagia ũhoro waguo.
• 12. Atahani-rĩ, macangaga irĩma-inĩ ciothe iria ndaya na igũrũ werũ-inĩ, nĩ ũndũ rũhiũ rũa njora rũa Jehova rũkũninana kũndũ guothe ruumĩte gĩturi kĩmwe gĩa thĩ o nginya gĩturi kĩrĩa kĩngĩ kĩayo; na gũtirĩ mũndũ o na ũmwe wonaga thayũ.
• 13. Mahandĩte ngano, magacoka kũgetha mĩigua; meheete ruo na mĩhang’o mĩingĩ, na makaaga kuona kĩguni; nĩ gũconorithio mũgaconorithio nĩ maũndũ marĩa mũgethaga, nĩ ũndũ wa marakara marĩa meĩ mũno ma Jehova.
• 14. Ningĩ Jehova ekuuga ũũ: Ha ũhoro wa ndũrĩrĩ ciothe njaganu iria indigicĩirie, o icio ithoronjaga ũgai ũrĩa ndarathimĩire andũ akwa Isiraeli-rĩ, atĩrĩ, nĩ kũrindũra ngacirindũra ndĩcirute bũrũri wacio, nayo nyũmba ya Juda ndĩmĩhurie yehere thĩinĩ wacio.
• 15. Na nĩgũgakinya atĩrĩ, atĩ thutha wa ndarĩkia gũcihuria ũguo, nĩngacoka ndĩciiguĩre tha, ndĩcicokie gwacio, mũndũ o mũndũ acokerere ũgai wake ũrĩa aarathimĩirũo, agĩcoke gĩthaka gĩake.
• 16. Na nĩgũgakinya atĩrĩ, atĩ mangĩkeruta mĩthiĩre ya andũ akwa na kĩyo mũno, na mehĩtage makĩgwetaga rĩĩtwa rĩakwa, makiugaga atĩrĩ, O ta ũrĩa Jehova atũũraga muoyo, o ta ũrĩa nao maarutire andũ akwa kwĩhĩta makĩgwetaga rĩĩtwa rĩa Baali-rĩ, hĩndĩ ĩo nĩguo magaciarithanio na andũ akwa.
• 17. No rĩrĩ, mangĩkaaga kũnjigua-rĩ, hĩndĩ ĩo nĩngarindũra rũrĩrĩ rũu rũhurio biũ; ĩĩ, ti-itherũ, rũhurio, ndĩrũninũkie o kũrũninũkia; ũguo nĩguo Jehova ekuuga.

Home