Go Back

Jeremia Chapter 1

• 1. ATĨRĨRĨ, maya nĩmo maũndũ marĩa maaririo nĩ Jeremia, mũrũ wa Hilikia, mũndũ ũmwe wa athĩnjĩri-Ngai arĩa maatũire Anathothu, o kũu bũrũri wa Benjamini;
• 2. o we ũrĩa wakinyĩrĩirũo nĩ ndũmĩrĩri ya Jehova matukũ ma Josia, mũrũ wa Amoni, mũthamaki wa Juda, mwaka wa ikũmi na ĩtatũ ĩrĩa aakorirũo athamakĩte.
• 3. O na ningĩ agĩkinyĩrĩrũo nĩyo matukũ-inĩ marĩa Jehoiakimu, mũrũ wa Josia, aathamakaga kũu Juda, o nginya mũthia-inĩ wa mwaka wa ikũmi na ũmwe ĩrĩa Zedekia, mũrũ wa Josia, mũthamaki wa Juda, o nake aakorirũo athamakĩte, o mweri wa ĩtano wa mwaka ũcio, rĩrĩa andũ a Jerusalemu maarindũrirũo.
• 4. Atĩrĩrĩ, nĩ ndũmĩrĩri ya Jehova yanginyĩrĩire ngĩĩrũo ũũ:
• 5. O na mbere ya itaanakũũmba nda ya nyũkwa-rĩ, no ndakũũĩ, ningĩ o na mbere ya ũtaanoima kũu nda-rĩ, noguo ndakwamũrire ngĩgũtheria; nĩ gũtua ngũtuĩte mũnabii wa kũrathĩra ndũrĩrĩ maũndũ.
• 6. Hĩndĩ ĩo niĩ na niĩ ngĩcokia atĩrĩ, Hĩ! Wũi, Mwahani Jehova! Ta rora wone atĩ ndingĩhota kwaria nĩ ũndũ ndĩ mũnyinyi mũno.
• 7. No Jehova akĩnjĩra atĩrĩ, Tiga kuuga ũguo, atĩ wĩ mũnyinyi mũno, nĩ ũndũ ũgũthiĩ harĩ mũndũ o wothe ũrĩa ngakũrekia harĩ we, o naguo ũndũ o wothe ũrĩa ngagwatha noguo ũkaaria.
• 8. Menya ũmetigĩre, nĩ gũkorũo ndĩ hamwe nawe, ngũhonokie; ũguo nĩguo Jehova ekuuga.
• 9. Hĩndĩ ĩo Jehova agĩgĩtambũrũkia guoko, akĩ’hutia kanua; ningĩ Jehova akĩnjĩra ũũ: Atĩrĩrĩ, nĩ gwĩkĩra ndagwĩkĩra ndũmĩrĩri yakwa kanua.
• 10. One, ũmũthĩ nĩguo ndagũtua mũnene wa ndũrĩrĩ, o na wa kũndũ kũrĩa gũthamakagwo nĩ athamaki, nĩ getha ũharaganagie, na ũhehenjanage, na ũninanage, na ũng’aũranagie; ningĩ ũcokage gũtiiranĩrĩra, o na kũũmanĩrĩria.
• 11. O na ningĩ ndũmĩrĩri ya Jehova ĩkĩnginyĩrĩra ngĩũrio atĩrĩ, Jeremia, nĩ kĩ ũrona? Na niĩ ngiuga atĩrĩ, Nĩ rũthanju ndĩrona rũa mũtĩ ũhĩkaga kũruta kĩro, o ũcio wĩtagwo mũrothi.
• 12. Nake Jehova agĩcoka akĩnjĩra atĩrĩ, Ĩĩ, ti-itherũ nĩwona wega; nĩ ũndũ niĩ o na niĩ-rĩ, ndũire njetereire ihinda rĩkinye rĩrĩa ngahĩka kũhingia kĩĩranĩro gĩakwa.
• 13. Ningĩ ndũmĩrĩri ya Jehova ĩgĩcoka ĩkĩnginyĩrĩra ihinda rĩa kerĩ, ngĩũrio atĩrĩ, Nĩ kĩ ũrona rĩu? Na niĩ ngiuga atĩrĩ, Nĩ nyũngũ ndĩrona ĩgũtherũkio nĩ mwaki ũkũhuhwo ũrutĩtio na mwena wa gathigathini.
• 14. Nake Jehova akĩnjĩra atĩrĩ, O ũguo taguo ũũru ũrĩa ũgakora andũ othe arĩa matũũraga bũrũri ũyũ-rĩ, ũkoima na mwena ũcio wa gathigathini.
• 15. Nĩ ũndũ Jehova ekuuga atĩrĩ, Nĩ gwĩta ngeta mĩhĩrĩga yothe ya kũndũ kũrĩa gũthamakagwo nĩ athamaki a na kũu gathigathini, nao mũndũ o mũndũ oke aige gĩtĩ gĩake kĩa ũnene itonyero-inĩ rĩa ihingo cia Jerusalemu, o na maciige ing’ethanĩre na thingo ciarĩo ciothe cia ndwere ciothe, o na maciige ing’ethanĩre na matũũra mothe ma Juda.
• 16. Niĩ na niĩ ndĩgĩcoke ndĩmatuĩre matuĩro maringaine na waganu wao wothe ũrĩa maaneka; nĩ ũndũ nĩmandirikĩte, magacoka gũcinĩra ngai ingĩ ũbumba, o na makainamĩrĩra indo iria methondekeire na moko mao magacihoya.
• 17. Tondũ ũcio wee nawe-rĩ, wĩhotore, ũũkĩre mwaranĩrie nao, ũmere maũndũ mothe marĩa ngũgwatha. Menya ũmakio nĩo, nĩ getha hihi ndigagũconorithie harĩ o.
• 18. Nĩ ũndũ ũmũthĩ nĩ kũgitĩra ngũgitĩire ũgatuĩka ta itũũra rĩirige, o na ũgatuĩka ta gĩtugĩ gĩa kĩgera, o na thingo cia gĩcango, nĩ getha wĩũmie harĩ andũ a bũrũri ũyũ wothe, o na wĩũmie harĩ athamaki a Juda, o na anene akuo, o na athĩnjĩri-Ngai akuo, o na andũ a bũrũri wothe.
• 19. Nao nĩmagacoka kũrũa mbaara nawe, no matigagũtoria, nĩ ũndũ ndĩ hamwe nawe ngũhonokie; ũguo nĩguo Jehova ekuuga.

Home