Go Back

Isaia Chapter 66

1. Ningĩ Jehova ekuuga ũũ: Igũrũ nĩrĩo gĩtĩ gĩakwa kĩa ũnene, nayo thĩ nĩyo gĩturũa gĩakwa kĩa magũrũ; hihi mũgakĩnjakĩra nyũmba ĩtariĩ atĩa? Kana hihi nĩ ta ha hangĩtuĩka hakwa ha kũhurũka?
2. Nĩ ũndũ-rĩ, indo icio ciothe ciathondekirũo nĩ guoko gwakwa, nĩkĩo ciagĩire igagĩtũũra o kuo; ũguo nĩguo Jehova ekuuga. No rĩrĩ, mũndũ ũyũ nowe ngũiguĩra tha, o we ũrĩa ũikaraga enyihĩtie, na akagĩa na ngoro ĩherete, na akainainio ngoro akĩĩrutanĩria nĩ gũtĩa ũhoro wakwa.
3. Mũthĩnji ng’ombe ya igongona nowe ũcokaga kũũraga mũndũ, nake mũruti igongona rĩa gatũrũme nowe ũcokaga kuuna ngui ngingo, nake ũrĩa ũrutaga igongona rĩa mũtu, nowe ũcokaga gũitanga thakame ya ngũrũe; ningĩ ũrĩa ũcinaga ũbumba nowe ũcokaga kũgoocithia mũhianano wa tũhũ. Atĩrĩrĩ, andũ acio nĩ mĩthiĩre ya mwĩatho wao o ene methurĩire, o nacio ngoro ciao igakenera maũndũ macio mekaga me thahu.
4. Niĩ o na niĩ-rĩ, ngamaathĩrĩria kũnyararũo, na ndũme macokererũo nĩ maũndũ marĩa mamaguoyohagia, nĩ gũkorũo hĩndĩ ĩrĩa ndetanire, hatirĩ mũndũ o na ũmwe wao wanjĩtĩkire, ningĩ hĩndĩ ĩrĩa ndamaarĩirie, matiigana gũ’thikĩrĩria; no rĩrĩ, nĩ gwĩka mekaga maũndũ marĩa ndonaga me moru, na magĩĩthurĩra maũndũ marĩa matangenagia.
5. Atĩrĩrĩ, inyuĩ mũinainaga nĩ gũtĩa ũhoro wa Jehova, ta thikĩrĩriai ndũmĩrĩri yake. Atĩrĩrĩ, ariũ a ithe wanyu arĩa mamũthũire, o acio maramũingata nĩ ũndũ wa rĩĩtwa rĩakwa, moigaga na kĩnyaka atĩrĩ, Jehova ta nĩakĩrekwo onanie riri wake wa ũrĩa ekagĩrĩrũo, tũkĩone gĩkeno kĩanyu harĩa kĩrĩ! No rĩrĩ, o nĩ gũconorithio magaconorithio.
6. Harĩ inegene rĩa ngũĩ rĩroima itũũra-inĩ, o na mũgambo ũkoima hekarũ-inĩ, naguo nĩ mũgambo wa Jehova akĩĩrĩhĩria harĩ thũ ciake.
7. Itũũra rĩu rĩa Zayuni rĩhaana ta mũndũ-wa-nja ũrĩa wohokete atagwatĩtwo nĩ ruo rũa kũrũmwo, agagĩciara mwana wa kahĩĩ o mbere atanarũmwo.
8. Nũ ũrĩ waigua ũndũ ta ũcio? Nũ ũrĩ wona maũndũ ta macio? Anga bũrũri wakĩhota gũciarĩrũo andũ aguo mũthenya o ro ũmwe? O na kana rũrĩrĩ rũĩthugunde o ro rĩmwe? Amu hĩndĩ ĩrĩa Zayuni yagwatirũo nĩ ruo-rĩ, hĩndĩ o ĩo nĩguo yaciarire ciana ciayo o rĩmwe.
9. Kwĩ hĩndĩ ingĩkiumĩria mwana, na nditũme aciarũo? Ũguo nĩguo Jehova ekũũria. Ningĩ-rĩ, kwĩ hĩndĩ ngakĩhingana nda, o niĩ ndũmaga gũciarũo? Ũguo nĩguo Ngai waku ekũũria.
10. Atĩrĩrĩ-i, inyuothe mwendaga Jerusalemu, kenanĩrai hamwe narĩo, na mũcanjamũke ngoro nĩ ũndũ warĩo. Kenanĩrai hamwe narĩo inyuothe arĩa mũtũire mũrĩiguagĩra kĩeha;
11. nĩ getha mũikare ta mũkuonga maũndũ marĩa mega marĩo, mũkahũnio nĩ maũndũ ma ũhoreri marĩa monagwo ta moimĩte nyondo-inĩ ciarĩo. Rekei nyondo ciarĩo igaithie, nĩguo mũkenio nĩ riri warĩo mũingĩ wa ũrĩa rĩĩkĩrĩirũo.
12. Tondũ Jehova ekuuga ũũ: Atĩrĩrĩ, ngarĩrehithĩrie thayũ o ta arĩ maĩ riunithĩirio, na ndũme riri wa ndũrĩrĩ ũtuĩke ta arĩ rũũĩ rũiyũru mũno rũrĩtherereire, namo maũndũ macio nĩmo mũrĩongaga. Ĩĩ, ti-itherũ, nĩmũgaikara mũhoreire ta mũkuuĩtwo na ngoi, o na kana ta mũgũcũũgacũũgio mwĩ ciero-inĩ.
13. O ta ũrĩa mwana ahoragĩrio nĩ nyina, ũguo noguo ngamũhoreria inyuĩ; na nĩmũkahorerio kũu Jerusalemu o kũhorerio.
14. Na nĩmũkeonera ũhoro ũcio, nacio ngoro cianyu icanjamũke, namo mahĩndĩ manyu metiire wega o ta ũrĩa nyeki njororo ĩĩhandaga ĩrorete igũrũ; naguo hinya wa guoko kwa Jehova nĩũkamenyeka nĩ ndungata ciake, nake agwatwo nĩ mathũgũta harĩ thũ ciake.
15. Nĩ ũndũ atĩrĩ, Jehova agoka ahaana ta mwaki, o nacio ngari ciake cia ita ihaane o ta kĩhuhũkanio kĩrĩa kĩnene kĩa rũhuho, nĩguo erĩhĩrie na marakara make e mũng’ũrĩku mũno, na ikũmana rĩake rĩtuĩke o ta rũrĩrĩmbĩ rũa mwaki.
16. Nĩ gũkorũo Jehova akerũĩrĩra harĩ andũ othe a gũkũ thĩ na mwaki, o na rũhiũ rũake rũa njora; nao andũ arĩa makoragithio nĩ Jehova nĩmagakorũo marĩ aingĩ.
17. Na rĩrĩ, andũ arĩa meamũraga magetheria nĩguo marũmanĩrĩre mũtongoro makinye igongona-inĩ rĩrĩa rĩkũrutĩrũo mũgũnda-inĩ, o acio marĩaga nyama cia ngũrũe, o na indo ingĩ irĩ mũgiro, o na mbĩa, ha ũhoro wao Jehova ekuuga ũũ: Magathira o gũthira othe hamwe.
18. Nĩ ũndũ nĩnjũĩ mawĩra mao marĩa marutaga, o na meciria mao; na rĩrĩ, ihinda nĩrĩgũũka rĩrĩa ngacokanĩrĩria ndũrĩrĩ ciothe hamwe o na andũ a mĩario yothe, nao nĩmagoka meyonere ũrĩa riri wakwa ũtariĩ.
19. Na niĩ nĩngaiga kĩmenyithia gatagatĩ-inĩ kao, nao andũ arĩa makahonoka thĩinĩ wao ndĩmaharaganĩrie ndũrĩrĩ-inĩ, nao makinye Tarishishi, na Pulu, na Ludu, harĩ andũ arĩa magetaga ũta; na makinye he Tubali na Javani, o na harĩ andũ arĩa matũire ithama-inĩ cia kũndũ kũraya, kũrĩa ngumo yakwa ĩtarĩ yaiguwo, o na kana riri wakwa ũkĩonwo kuo; nao nĩmakoimbũranĩra ndũrĩrĩ-inĩ ũhoro wa ũrĩa riri ũcio wakwa ũtariĩ.
20. Nao nĩmakarehe ariũ a ithe wanyu othe moime ndũrĩrĩ-inĩ ciothe, matuĩke ta marĩ igongona rĩa kũrutĩrũo Jehova; nao magoka mahaicĩte mbarathi, o na ngari cia ita, na moke makuuĩtwo na itanda cia gũcuhio, o na nyũmbũ, o na ngamĩra iria ithiaga na ihenya, makinyio kĩrĩma-inĩ gĩakwa kĩrĩa kĩamũre o kũu Jerusalemu; ũguo nĩguo Jehova ekuuga. Nao makarehwo o ta ũrĩa ciana cia Isiraeli itwaraga kĩndũ gĩacio gĩa kũruta igongona gĩkuuĩtwo na kĩndũ gĩtheru gĩgatwarũo nyũmba ya Jehova.
21. O naho harĩ andũ acio-rĩ, nĩho ngeamũrĩra andũ matuĩke athĩnjĩri-Ngai, o na matuĩke Alawii; ũguo nĩguo Jehova ekuuga.
22. Nĩ gũkorũo o ta ũrĩa igũrũ rĩu rĩerũ o na thĩ ĩo njerũ, o icio ngomba, irĩtũũraga irĩ o mbere yakwa-rĩ, ũguo noguo rũciaro rũanyu o na rĩĩtwa rĩanya irĩtũũraga; ũguo nĩguo Jehova ekuuga.
23. Na nĩgũgakinya atĩrĩ, atĩ kuuma o karũgamo ka mweri ũmwe o nginya karũgamo ka mweri ũrĩa ũngĩ, o na ningĩ kuuma thabatũ ĩmwe o nginya thabatũ ĩrĩa ĩngĩ-rĩ, andũ othe nĩmagokaga kũhoya mainamĩrĩire mbere yakwa; ũguo nĩguo Jehova ekuuga.
24. Nao nĩmagacokaga kuumagara makerorere ciimba cia andũ arĩa maagararĩte watho wakwa; nĩ ũndũ igunyũ ciao itigakua, o na kana mwaki ũrĩa wa kũmacina ũhore; nao nĩmagatuĩka o ta kĩndũ gĩthũũrĩtwo mũno nĩ andũ othe.

Home