Go Back

Isaia Chapter 65

• 1. Atĩrĩrĩ, Jehova ekuuga ũũ: Niĩ njikaraga ndĩĩhaarĩirie ’heane kĩrĩra harĩ andũ arĩa mata’hoyaga ũhoro wakĩo, na ndĩĩguũrĩrie andũ arĩa matanjaragia, naruo rũrĩrĩ rũtarĩ rũa’hoya rũkĩgwetaga rĩĩtwa rĩakwa ngarũĩra atĩrĩ, Njũthĩrĩriai mũnyone.
• 2. Ndindaga nyambararĩirie moko makwa andũ aremu, arĩa matathiaga na mĩthiĩre mĩega, na a mwĩatho,
• 3. o andũ arĩa matũire ma’thirĩkagĩria o ũthiũ-inĩ wakwa hĩndĩ ciothe, na makarutĩra magongona mĩgũnda, na magacinĩra mahuti marĩa manungaga wega matubarĩ-inĩ igũrũ.
• 4. Nao matindaga o kũu mbĩrĩra-inĩ na makaraara ngurunga-inĩ; ningĩ marĩaga nyama cia ngũrũe, naguo thathi wa nyamũ iria irĩ mũgiro wĩ nyũngũ-inĩ ciao.
• 5. Ningĩ moigaga atĩrĩ, Wĩrũgamie handũ haku mwanya, ndũga’thengerere, nĩ ũndũ niĩ ndĩ mũtheru gũgũkĩra. Andũ acio-rĩ, matariĩ ta ndogo ĩrĩ iniũrũ-inĩ rĩakwa ya mwaki ũtindaga ũkĩgamba ci-i-i.
• 6. Atĩrĩrĩ, mbere yakwa ũhoro wandĩkĩtwo atĩrĩ, Ndingĩtũũra ngirĩte ki, no nĩngarĩhanĩria; ĩĩ, ti-itherũ, ngarĩhanĩria o ithũri-inĩ ciao,
• 7. ndĩhanĩrie mawaganu manyu inyuene o na ma maithe manyu mothe hamwe, nĩ ũndũ nĩmacinĩire ũbumba irĩma-inĩ igũrũ, na makanumĩra ithũngũri-inĩ igũrũ. Tondũ ũcio nĩngerĩhĩria o ithũri-inĩ ciao ciĩko ciao iria maaneka; ũguo nĩguo Jehova oiga.
• 8. Atĩrĩrĩ, Jehova ekuuga ũũ: O ta ũrĩa ndibei ya mũthondekano yonekaga kĩmanjika-inĩ kĩa mĩthabibu, na mũndũ akoiga, Tiga gũkĩũnũha nĩ ũndũ thĩinĩ wakĩo he na kĩrathimo-rĩ, ũguo noguo ngeka nĩ ũndũ wa ndungata ciakwa, nĩ getha ndĩgacininũkĩrĩrie ciothe.
• 9. Na thĩinĩ wa Jakubu-rĩ, nĩho ngaruta mbeũ, o nake mũgai wa irĩma ciakwa ndĩmũrute he Juda; nao andũ akwa arĩa ndĩĩthurĩire nĩo magacigaya, nacio ndungata ciakwa itũũre kuo.
• 10. Sharoni nĩkuo gũkagĩa ciugũ cia ndũru cia mbũri, o nakĩo gĩtuamba gĩa Akori gĩtuĩke kũndũ gwa gũkomagwo nĩ ndũru cia ng’ombe, nĩ ũndũ wa andũ akwa arĩa maatũire manjaragia.
• 11. No rĩrĩ, inyuĩ arĩa mũtiganĩte na Jehova, na mũkariganĩrũo nĩ kĩrĩma gĩakwa kĩrĩa kĩamũre, na mũgathondekera ngai ya mathara metha, o ĩrĩa ĩĩtagwo Mũrehi-Mũnyaka, nayo ĩrĩa iĩtagwo Mũrehi-Mũtino mũkamĩitĩra ndibei ndukanie ya kũmĩhoreria-rĩ,
• 12. niĩ nĩngũmwathĩrĩria mũtino wa kũũragwo na rũhiũ rũa njora, na inyuothe mwĩgũithie thĩ, mũninwo; nĩ gũkorũo hĩndĩ ĩrĩa ndetanire mũtiigana kũnjĩtĩka, o na hĩndĩ ĩrĩa ndaaririe mũtiigana gũ’thikĩrĩria; no nĩ gwĩka mwekaga maũndũ marĩa ndonaga me moru, na mũgĩĩthurĩra maũndũ marĩa matangenagia.
• 13. Tondũ ũcio Mwathani Jehova ekuuga ũũ: Atĩrĩrĩ, ndungata ciakwa nĩikarĩaga irio, no inyuĩ nĩ kũhũta mũkahũta; atĩrĩrĩ, ndungata ciakwa nĩikanyuaga gĩa kũnyua, no inyuĩ nĩ kũnyota mũkanyota; atĩrĩrĩ, ndungata ciakwa nĩ gũkena igakenaga, no inyuĩ nĩ gũconorũo mũgaconorũo;
• 14. o na ningĩ atĩrĩ, ndungata ciakwa nĩ kũina ikainaga nyĩmbo icanjamũkĩte ngoro, no inyuĩ nĩ gũkaya mũgakaya nĩ kĩeha kĩa ngoro, na mũrĩre na kĩgi nĩ ũndũ wa ũrĩa mũkuĩte ngoro.
• 15. Namo marĩĩtwa manyu mũkamatigĩra andũ akwa arĩa ndathurire, mamagwetage rĩrĩa mekwenda kwĩhĩtithia mũndũ ũndũ, moigage ũũ: Mwathani Jehova arokũũraga o ta ũrĩa oragire ng’ania! No ndungata ciake agaciĩtaga marĩĩtwa mangĩ,
• 16. nĩ getha mũndũ ũrĩa ũkwĩrathima gũkũ thĩ, erathimage akĩgwetaga rĩĩtwa rĩa Ngai ũrĩa wa ma, o nake ũrĩa ũkwĩhĩta gũkũ thĩ, ehitage akĩgwetaga rĩĩtwa rĩa Ngai o ũcio wa ma; nĩ gũkorũo mathĩna marĩa ma tene nĩ mariganĩru, na ningĩ nĩ mahithe maitho makwa.
• 17. Nĩ ũndũ atĩrĩ, nĩ kũũmba ngũũmba igũrũ rĩerũ, o na thĩ njerũ, namo maũndũ marĩa ma tene matikaririkanwo, o na kana marũmbũiyo.
• 18. No rĩrĩ, inyuĩ tũũrai mũcanjamũkĩte, na mũkenagĩre indo iria ngũũmba tene na tene; nĩ ũndũ nĩmũkona ngĩũmba Jerusalemu rĩtuĩke rĩa gũkenagĩrũo wega, o nao andũ arĩo matuĩke a gũkenania.
• 19. Niĩ o na niĩ nĩngaigua wega nĩ ũndũ wa Jerusalemu, o na ngenagĩre andũ akwa; nakĩo kĩrĩro gĩtigacoka kũiguwo thĩinĩ warĩo o na rĩ, o na kana mũgambo wa mũndũ ũgũita maithori.
• 20. Kũu gũtigacoka kũgĩa rũkenge rũgũkua rũĩ rũa matukũ manyinyi o na rĩ, o na kana mũthuri ũtahingĩtie matukũ make, nĩ gũkorũo kaana gagakua ge ka mĩaka igana, na mũndũ mwĩhia, o na angĩgakinyia mĩaka igana, akonwo ta arĩ kũrumwo arumĩtwo.
• 21. Nao nĩmagaaka nyũmba, na macitũũre, na mahande mĩgũnda ya mĩthabibu, o na marĩage maciaro mayo.
• 22. Matigaaka nyũmba, na icokage gũtũũrũo nĩ andũ angĩ, o na kana mahande irio, icokage kũrĩo nĩ andũ angĩ; nĩ gũkorũo o ta ũrĩa matukũ ma mũtĩ maigana, ũguo noguo matukũ ma andũ akwa makaigana, nao andũ akwa arĩa athure nĩmarĩkenagĩra wĩra wa moko mao ihinda iraya.
• 23. Matikaruta wĩra wa tũhũ, o na kana maciare ciana igũcoka gũkua; nĩ ũndũ acio nĩo rũciaro rũrathime nĩ Jehova, o nacio ciana ciao igatũũrania hamwe nao.
• 24. Na nĩgũgakinya atĩrĩ, atĩ o na mbere matananjĩta-rĩ, nĩngamacokeria ũhoro; ningĩ o makĩaragia-rĩ, nĩngakorũo njiguĩte ũrĩa ũmabatiĩ.
• 25. Hĩndĩ ĩo-rĩ, njũi na kagondu ikarĩaga nyeki hamwe, naguo mũrũthi ũrĩage rũwa rũa ngano o ta ndegwa; na tĩri nĩguo ũgatuĩka irio cia nyamũ-ya-thĩ. Gũtikageranwo ngero, o na kana kũninanwo, kũu guothe kĩrĩma-inĩ gĩakwa kĩrĩa kĩamũre; ũguo nĩguo Jehova ekuuga.

Home