Go Back

Isaia Chapter 62

• 1. Atĩrĩrĩ, ha ũhoro wa kũrũĩrĩra Zayuni-rĩ, ndigatumia kanua, o na kana ndigithĩrie gũtetera Jerusalemu, o nginya hĩndĩ ĩrĩa ũhoro wakuo wa ũthingu ũkoimbũka ware o ta ũtheri, o naguo ũhoro wakuo wa kũhonokania woneke o ta tawa ũrĩa wakanaga mũno.
• 2. Nacio ndũrĩrĩ nĩikona ũthingu waku, o nao athamaki othe mone riri waku; wee nawe ũcoke gwĩtwo rĩĩtwa rĩngĩ rĩerũ, o rĩrĩa rĩkagwetwo na kanua ka Jehova.
• 3. Ningĩ ũgatuĩka ta tanji ya ũthaka ũnyitĩtwo na guoko kwa Jehova, na ũhaane ta thũmbĩ ya ũthamaki ĩnyitĩtwo na guoko kwa Ngai waku.
• 4. Wee nawe-rĩ, ndũgacoka gwĩtwo Mũtirike, o na kana bũrũri waku wĩtwo Mũkiru Ihooru; no rĩrĩ, ũrĩĩtagwo Hefiziba, o naguo bũrũri waku wĩtagwo Beula; nĩ gũkorũo Jehova nĩakenagio nĩwe, o naguo bũrũri waku ũgatuĩka o ta mũhiki ũrĩa ũhikĩtio.
• 5. Nĩ gũkorũo o ta ũrĩa mwanake ahikagia mũirĩtu, ũguo noguo aanake aku magakũhikia, ningĩ o ta ũrĩa mũhikania ekenagĩra nĩ mũhiki wake-rĩ, o ũguo noguo Ngai waku arĩĩkenagĩra nĩwe.
• 6. Nĩnjigĩte aikaria a thingo ciaku, wee Jerusalemu, nao matirĩ hingo magakira, ũtukũ kana mũthenya; inyuĩ arĩa mũkayagĩra Jehova mũkĩmũririkanagia maũndũ-rĩ, menyai mũhurũke,
• 7. o nake menyai mũreke ahurũke, o nginya rĩrĩa agakorũo arĩkĩtie kũrũmia maũndũ ma Jerusalemu, akarĩtua itũũra rĩrĩ igweta harĩ ndũrĩrĩ ciothe.
• 8. Jehova nĩarĩkĩtie kwĩhĩta aambararĩtie guoko gwake kwa ũrĩo, o guoko kũu gwake kwa hinya, akoiga atĩrĩ, Ti-itherũ ndigacoka kũhe thũ ciaku irio ciaku atĩ nĩguo ituĩke ciacio cia kwĩrĩĩra, nao ageni matigacoka kũnyua ndibei yaku ĩrĩa mũrutĩire wĩra;
• 9. no rĩrĩ, andũ arĩa megetheire irio o ene nĩo magacoka gũcirĩa o makĩgathaga Jehova, nao andũ arĩa macokereirie thabibu nĩo marĩnyuaga ndibei yacio maikaire ciikaro-inĩ cia handũ hakwa harĩa haamũre.
• 10. Atĩrĩrĩ, hungurai, hungurai mĩrango, muumagare; thondekerai andũ arĩa marĩgeraga kuo njĩra; araganiai, araganiai kĩng’aratua kĩa njĩra, mũũnganie mahiga mũmeherie kuo. Oyai kĩbebero na igũrũ, nĩguo kĩonwo nĩ andũ a ndũrĩrĩ;
• 11. amu Jehova nĩahunjĩtie ũhoro ũyũ o nginya ituri ciothe cia thĩ, Atĩrĩrĩ, ĩrai mwarĩ wa Zayuni ũũ, Ũrĩa ũgũkũhonokia akiriĩ gũũka, naguo ũtungati wake e naguo, o na irĩhanĩria rĩake rĩrĩ o mbere yake.
• 12. Acio marĩĩtagwo Andũ-arĩa-Aamũre, o Arĩa-Akũũre-nĩ-Jehova ningĩ wee ũrĩĩtagwo ũũ: Itũũra-rĩrĩa-Rĩrongorie, o na Itũũra-rĩrĩa-Rĩtagacoka-Gũthamwo.

Home