Go Back

Isaia Chapter 61

• 1. Atĩrĩrĩ, Roho wa Mwathani Jehova arĩ igũrũ rĩakwa; nĩ ũndũ Jehova nĩaanjitĩrĩirie maguta ’hunjagĩrie arĩa athĩni ũhoro-ũrĩa-mwega. Nĩandũmĩte ngohohanie arĩa athuthĩku ngoro, na ngahunjanagĩrie atĩ andũ arĩa mohetwo nĩmohorũo, o nao arĩa mohetwo korokoro-inĩ ndĩmere atĩ nĩmahingũrĩirũo;
• 2. o na ’hunjanagĩrie ũhoro wa mwaka ũrĩa Jehova akonania ũtugi wake, o na wa mũthenya ũrĩa wĩ hakuhĩ ũrĩa Ngai witũ akagerana ngero cia kwĩrĩhĩria; ningĩ ’horagĩrie arĩa othe me na kĩeha,
• 3. nao acio me na kĩeha ndĩmatuĩre gĩathĩ gĩa kũũngana kũu Zayuni, nĩguo amekĩre iremba mũtwe ithenya rĩa mũhu, o na amanine kĩeha na ũndũ wa kũmaitĩrĩria maguta ma gĩkeno, o na amehererie ngoro nditũ na ũndũ wa kũmahumba nguo njega ya rũgooco; nĩ getha metagwo mĩtĩ ya ũthingu, ĩrĩa ĩhandĩtwo nĩ Jehova, nĩ getha agoocagwo.
• 4. Nao nĩmagaaka kũndũ kũrĩa gũtũire gũkirĩte ihooru kuuma o tene, na macokererie kũndũ kũrĩa gũtũire kwanangĩkĩte kuuma agu na agu, na macokererie matũũra marĩa matũire makirĩte ihooru handũ ha njiaro nyingĩ.
• 5. Nacio ndũrĩrĩ nĩikaarahũka irĩithie ndũru cianyu cia mbũri, nao andũ a kũngĩ matuĩke amũcimbĩri, o na amũceheri mĩthabibu yanyu.
• 6. No rĩrĩ, inyuĩ mũgetagwo athĩnjĩri-Ngai a Jehova, nao andũ mamwĩtage atungatĩri Ngai witũ. Inyuĩ-rĩ, nĩ kũrĩa mũkarĩaga ũtonga wa ndũrĩrĩ, na mũikarage mũgaacĩire nĩ ũndũ wa kũrigia na maũndũ macio mao me riri.
• 7. Na inyuĩ tondũ wa ũrĩa mwanaconorithio, mũkarĩhĩrio maita merĩ, ningĩ ithenya rĩa thoni icio cianyu nĩmũgakenera igai rĩanyu. Tondũ ũcio, rĩrĩa magakorũo marĩ o kũu bũrũri wao-rĩ, makaheo igai rĩao maita merĩ, na magĩe na gĩkeno gĩtagathira tene na tene.
• 8. Nĩ ũndũ niĩ Jehova nyendaga ũhoro wa gũtuanĩra cira na kĩhooto, ngathũũra ũtunyani wa uungumania; na niĩ nĩngamarĩha irĩhi rĩao na ma, na ndĩkanĩre nao kĩrĩkanĩro gĩa tene na tene.
• 9. Nayo mbeũ yao nĩĩkagĩa igweta ndũrĩrĩ-inĩ, o na njiaro ciao ciĩkĩrĩrũo nĩ andũ. Mũndũ o wothe ũrĩa ũkamona-rĩ, nĩagetĩkĩra atĩ nĩo a rũciaro rũrĩa rũrathimĩtwo nĩ Jehova.
• 10. Gũkena-rĩ, ndĩrĩkenagĩra Jehova mũno, o nayo ngoro yakwa ĩkenũkĩre Ngai wakwa mũno; nĩ ũndũ a’humbĩte ũhonokio ta arĩ nguo, o na aka’humba ũthingu o ta ũrĩ kĩremba kĩrĩa mũhikania eĩkagĩra egemie nakĩo, o na ta mathaga marĩa mũhiki egemagia namo.
• 11. Nĩ gũkorũo o ta ũrĩa thĩ ĩmeragia thuuna, o na ta ũrĩa mũgũnda ũkunũraga indo iria ihandĩtwo kuo-rĩ, ũguo noguo Mwathani Jehova agatũma ũthingu o na kũgoocwo ciumĩre, cioneke nĩ ndũrĩrĩ ciothe.

Home