Go Back

Isaia Chapter 60

• 1. Atĩrĩrĩ, wee Jerusalemu, ũkĩra ũikare ũcangararĩte, nĩ ũndũ ũtheri wa gũgũtherera nĩ mũũku, naguo riri wa Jehova ũkaratha ta riũa ũkwarĩre.
• 2. Tondũ rĩrĩ, nduma nĩĩkaiyũra thĩ, nayo nduma ndumanu ĩhumbĩre ndũrĩrĩ; no wee-rĩ, Jehova nĩ kwara agakwarĩra, o naguo riri wake wonagwo ũkwarĩire.
• 3. Nacio ndũrĩrĩ nĩigokokaga harĩ ũtheri waku, o nao athamaki mokokage makinye kũrĩa ũcangararĩte ta riũa rĩkĩratha.
• 4. Atĩrĩrĩ, inamũra maitho maku wĩhũgũre na mĩena yothe wĩonere ũrĩa andũ mecokanĩrĩirie, magoka harĩ wee; ariũ aku makoima kũndũ kũraya mũno, o nao airĩtu aku moke makuuĩtwo na ngoi.
• 5. Hĩndĩ ĩo nĩũkona wega, warĩrio ũtheri, o nayo ngoro yaku nĩĩgacanjamũka o na ĩigue wega nĩ ũrĩa ĩmakũkĩte, tondũ indo ciothe iria ikuuagwo ikagerio igũrũ rĩa iria rĩrĩa inene, o ta ũrĩa ciingĩhĩte, nĩikerekerio harĩ wee, o naguo ũtonga wa ndũrĩrĩ ũrehwo harĩ wee.
• 6. Ngamĩra nyingĩ cia rũgendo nĩikaiyũra gwaku, o nacio njaũ cia ngamĩra cia Midiani, o na Efa, nacio ciothe ikorũo ciumĩte Sheba. Nacio thahabu na ubani nĩcio ikarehe, o na iheanage ũhoro wa ũrĩa Jehova akumagio.
• 7. Ndũru ciothe cia mbũri cia Kedari igacokanĩrĩrio hamwe irehwo harĩ wee, o nacio ndũrũme cia Nebaiothu wĩrutage mabata maku nacio; o na ningĩ ciahaicio kĩgongona-inĩ gĩakwa-rĩ, nĩigetĩkĩrĩka na gĩkeno, o nayo nyũmba yakwa ĩrĩa thaka ĩrĩ riri nĩngamĩthakaria makĩria.
• 8. Atĩrĩrĩ, andũ aya mombũkĩte na igũrũ ta matu, o na kana ta ndutura ikũinũka itonye tũnyũmba twacio nĩ a?
• 9. Ti-itherũ andũ arĩa matũire ithama-inĩ nĩ niĩ magetagĩrĩra, o nacio marikabu cia Tarishishi nĩcio ikaamba kũrehe ciana ciaku ciumĩte kũndũ kũraya, irĩ na betha o na thahabu ciacio hamwe nacio, nĩ ũndũ wa rĩĩtwa rĩa Jehova Ngai waku, o na ũndũ wa Ũrĩa Mũtheru wa Isiraeli, tondũ nĩwe ũgũthakarĩte.
• 10. Nao andũ a kũngĩ nĩo magacokereria thingo ciaku, o nao athamaki ao magũtungatagĩre; nĩ ũndũ ndakũhũrire ndĩ mũrakaru, no nĩ ũndũ wa ũrĩa wetĩkĩrĩkire nĩ niĩ-rĩ, nĩ tha ndakũiguĩrĩire.
• 11. Ihingo ciaku irĩtũũraga ihingũrĩtwo; itirĩhingagwo mũthenya o na kana ũtukũ, nĩ getha andũ makũrehagĩre ũtonga wa ndũrĩrĩ, o nao athamaki a cio marũmanĩrĩire mũtongoro.
• 12. Nĩ gũkorũo rũrĩrĩ o ruothe, o na ũthamaki o wothe, ũrĩa ũkarega gũgũtungatĩra, nĩ kũninwo ũkaninwo. Ĩĩ, ti-itherũ, ndũrĩrĩ icio ikaanangwo o kwanangwo ithire biũ.
• 13. Riri wa Lebanoni nĩũgagũkora ũgĩe naguo, naguo nĩ wa mĩtarakwa, na mĩthengera, o na mĩhuhu yothe hamwe, nĩguo ĩgemagie handũ hakwa harĩa haamũre, naho handũ harĩa hakinyagwo na magũrũ makwa nĩngahathakaria.
• 14. Ciana cia andũ arĩa maakũnyariraga igoka harĩ wee ikũinamĩrĩire, nao arĩa othe maakũmenaga meturumithie makinya-inĩ ma magũrũ maku; nao macoke gũgwĩtaga Itũũra rĩa Jehova, na Zayuni, Itũũra rĩa Ũrĩa Mũtheru wa Isiraeli.
• 15. O na harĩa watirikirũo, na ũgĩthũũrũo, o nginya hakĩaga mũndũ ũngĩgũtuĩkanĩria gatagatĩ-rĩ, nĩngũtũma ũtũũre ũgathagĩrĩrio tene na tene, o na ũtuĩke itũũra rĩa gũkenagĩrũo nĩ njiaro nyingĩ.
• 16. Ũtonga wa ndũrĩrĩ ũkawĩnyitĩra o ta arĩ iria ũkuonga, o na ta ũkũmumunya nyondo cia athamaki, nawe nĩũ kamenya atĩ niĩ Jehova nĩ niĩ mũkũhonokia, o na mũgũkũũri, o we Ũrĩa-wĩ-Hinya-Mũno wa Jakubu.
• 17. Ithenya rĩa gĩcango-rĩ, nĩ thahabu ngakũrehere, o narĩo ithenya rĩa kĩgera ngũrehere betha, narĩo ithenya rĩa mũtĩ ngũrehere gĩcango, narĩo ithenya rĩa ihiga ngũrehere kĩgera. Ũhoreri nĩguo ngatua ta arĩ guo anene a gũgwathaga, o naguo ũthingu ũtuĩke ta ũrĩ agwathi.
• 18. Maũndũ ma ũhinya matigacoka kũiguwo bũrũri waku o na rĩ, o na kana mĩhaka-inĩ ya bũrũri waku kũgĩe na kũndũ gũkiru ihooru, kana kũũnũhĩtwo; no rĩrĩ, thingo ciaku ũgacitua Ũhonokio, na ihingo ciaku ũcitue Rũgooco.
• 19. Riũa-rĩ, tirĩo rĩrĩkwaragĩra mũthenya, o na kana mweri ũgũtheragĩre ũtukũ; no rĩrĩ, Jehova nĩwe ũgũtũũra agũtheragĩra tene na tene, o nake Ngai waku atuĩke wa gũtũma ũgĩe riri.
• 20. Riũa rĩu rĩaku rĩtigacoka gũthũa o na rĩ, o na kana mweri waku wĩhithe, nĩ gũkorũo Jehova nĩwe ũgatuĩka ũtheri wa gũgũtheragĩra tene na tene, o namo matukũ marĩa ũikarĩte na mũcayo nĩmakaninwo.
• 21. O nao andũ aku othe nĩmagakoragwo marĩ athingu, nao nĩmakagaya thĩ yanyu ĩtuĩke yao tene na tene, na matuĩke ta marĩ thuuna ĩrĩa ’handĩte, makĩrĩ wĩra wa moko makwa niĩ mwene, nĩ getha ngoocagwo.
• 22. Nyũmba ĩrĩa nyinyi nĩĩkongerereka ĩtuĩke andũ ngiri, o nayo ĩrĩa ĩtarĩ andũ aingĩ ĩtuĩke rũrĩrĩ rũĩ hinya mũno. Niĩ Jehova nĩ niĩ ngeka ũndũ ũcio narua ihinda rĩaguo rĩakinya.

Home