Go Back

Isaia Chapter 6

• 1. ATĨRĨRĨ, mwaka o ũrĩa mũthamaki Uzia aakuire-rĩ, nĩguo ndonire Jehova aikarĩire gĩtĩ gĩa ũthamaki kĩigĩtwo igũrũ kũndũ gũtũũgĩru; nacio nguo ciake ikaiyũra hekarũ nĩ ũndũ wa ũrĩa ciaraihĩte.
• 2. Na igũrũ rĩake hakarũgama Aserafi, o Serafi ũmwe akagĩa na mathagu matandatũ; merĩ mamo akehumba ũthiũ namo, na mangĩ merĩ akehumba magũrũ namo, na mangĩ merĩ akombũka namo.
• 3. Nao o ũmwe akaanĩrĩra akera ũrĩa ũngĩ atĩrĩ, Jehova Mũnene wa Ita, nĩwe mũtheru, nĩwe mũtheru, ĩĩ, ti-itherũ, nĩwe mũtheru; thĩ yothe ĩiyũrĩtwo nĩ riri wake.
• 4. Nacio itina cia hingĩro cia mĩromo ikĩenyenya nĩ ũndũ wa mũgambo wa ũcio waanagĩrĩra, nayo nyũmba ĩkĩiyũra ndogo.
• 5. Niĩ na niĩ ngĩkiuga atĩrĩ, Hĩ! Kaĩ ndĩ na haaro-ĩ! Nĩ ũndũ ndirĩ ho rĩu; nĩ gũkorũo ndĩ mũndũ wĩ mĩromo ĩtarĩ mĩtheru, o na ningĩ ndũũraga thĩinĩ wa andũ matarĩ mĩromo mĩtheru; amu maitho makwa nĩmonete Mũthamaki, o we Jehova Mũnene wa Ita.
• 6. Hĩndĩ ĩo Serafi ũmwe akĩũmbũka agĩũka harĩ niĩ, anyitĩte ikara rĩa mwaki na guoko, arĩrutĩte kĩgongona-inĩ na mĩĩhato;
• 7. agĩkĩ’hutia kanua narĩo, akiuga ũũ: Atĩrĩrĩ, rĩrĩ nĩrĩakũhutia mĩromo, naguo ũũru waku nĩweherio, o namo mehia maku maahoroherio.
• 8. Ngĩcoka ngĩigua mũgambo wa Jehova, akiuga atĩrĩ, Nũ ngũrekia, ningĩ-rĩ, nũ ũgũtũthiĩra? Hĩndĩ ĩo ngĩkiuga atĩrĩ, Niĩ ũyũ haha; ta ndekia arĩ niĩ.
• 9. Nake akiuga atĩrĩ, Thiĩ ũkere andũ aya atĩrĩ, Tũũrai o mũiguaga, na mũtikanamenye ũndũ; na mũtũũre o muonaga, na mũtikanakuũke.
• 10. Tũma ngoro cia andũ aya ikingitane, na matũ mao magĩe njiika maage kũigua, na more maitho; matikone na maitho, kana maigue na matũ, o na kana mamenye na ngoro, macoke magarũrũke, mahonio.
• 11. Hĩndĩ ĩo ngĩgĩcoka ngĩũria atĩrĩ, Mwathani, nĩ nginya hĩndĩ ĩ? Nake akĩnjokeria atĩrĩ, Nĩ nginya hĩndĩ ĩrĩa matũũra magakorũo maanangĩkĩte, makaaga andũ mamatũũrĩte, o nacio nyũmba ikorũo ĩtarĩ mũndũ, na bũrũri ũkorũo wanangĩkĩte o kwanangĩka biũ,
• 12. nake Jehova akorũo arindũrithĩtie andũ, akamatwara kũraya mũno, na maganjo makorũo maingĩhĩte bũrũri-inĩ.
• 13. Na rĩrĩ, o na kũngĩkorũo gwĩ gacunjĩ ga ikũmi gatigarĩte-rĩ, o nako nigakaninwo biũ; no rĩrĩ, o ta ũrĩa mũceneni na mũgandi ĩtigaragio itina ciayo hĩndĩ ĩrĩa yagũithio-rĩ, ũguo noguo rũciaro rũrĩa rũamũre rũgatigario gĩtina kĩaruo.

Home