Go Back

Isaia Chapter 59

• 1. Atĩrĩrĩ, guoko kwa Jehova ti kuonju, gũgatuĩka atĩ gũtingĩhota kũhonokania; o na kana gũtũ gwake gũkagĩa njiika, gũgatuĩka atĩ gũtingĩhota kũigua;
• 2. no rĩrĩ, mawaganu manyu nĩmo mamwamũranĩtie makamũtigithania na Ngai wanyu, namo mehia manyu nĩmo matũmĩte amũhithe ũthiũ wake, akarega kũmũigua.
• 3. Nĩ gũkorũo moko manyu magwatĩtio thahu nĩ thakame, o nacio ciara cianyu ikagwatio thahu nĩ ũũru ũrĩa ciĩkĩte; tũnua twanyu nĩtwarĩtie ndeto cia maheni, naruo rũrĩmĩ rũanyu rũng’ung’uaga o cia ũmaramari.
• 4. Gũtirĩ mwĩtania na ũthingu, na gũtirĩ mũciranĩrĩri ũciranagĩrĩra na ma; mehokete ũhoro wa tũhũ, na makaaria ndeto cia maheni; mahaana ta me mahu ma kĩũnũhu, na magaciara waganu.
• 5. Ningĩ maikaraga ta makomereirie matumbĩ ma nduĩra, na makaamba mĩtego ta rũrenda rũa mbũmbũĩ; nake mũndũ o wothe ũrĩa ũngĩrĩa matumbĩ macio mao no akue, narĩo rĩrĩa rĩahehenjwo rĩgatathũka nduĩra.
• 6. No rĩrĩ, rũrenda rũu rũao rũtigatuĩka nguo, o na kana mehumbe nguo na ũndũ wa wĩra wao ũrĩa marutaga, amu mawĩra macio marutaga nĩ mawĩra ma waganu, nacio ciĩko cia ũhinya ii moko-inĩ mao.
• 7. Mateng’eraga na magũrũ mao nĩguo mageke ũũru, na magatema ihenya nĩguo magaite thakame ya mũndũ ũrĩa ũtarĩ na ũũru; macũranagia meciria ma waganu, nakuo kũrĩa guothe mathiaga magatiga gwakira ihooru na gũkaanangĩka.
• 8. Ĩndĩ njĩra ya thayũ matimĩũĩ, o na mĩthiĩre-inĩ yao gũtirĩ ũhoro wa gũtuanĩra cira na kĩhooto; nĩ njĩra njogomu metemeire, na mũndũ o wothe ũrĩa ũcigeraga agakorũo atoĩ ũrĩa thayũ ũtariĩ.
• 9. Tondũ ũcio ũhoro wa gũtuanĩra cira na kĩhooto wĩ haraya na ithuĩ, o naguo ũthingu ũkaaga gũtũkinyĩra; nĩ gũcaria tũcaragia ũtheri, no rĩrĩ, nduma nĩyo ĩratũtumanĩra; o na tũgacaria tũkinye kũrĩa gwĩ gũkengu, no tũkagera kũrĩa kwĩ mairia.
• 10. Tũhambatagĩria rũthingo-inĩ ta tũrĩ atuuaumu; ĩĩ, ti-itherũ tũhambatagĩria o ta andũ matarĩ maitho; tũhĩngagwo mũthenya barigici o ta rĩrĩa kwĩ mairia; tũgagĩtũũra kũrĩa kwĩ nduma tũkahaana o ta andũ akuũ.
• 11. Ithuothe tũraramaga o ta nduba, na tũkagamba na mũgambo wa kĩeha ta ndutura; tũcaragia ũhoro wa gũtuĩrũo cira na kĩhooto, no ndũngĩoneka o na atĩa; o na tũgacaria ũhoro wa kũhonokanio, no nĩũtũraihĩrĩirie mũno.
• 12. Nĩ gũkorũo maagarara maitũ ma watho makoragwo makĩingaingĩhaga mbere yaku, namo mehia maitũ makoimbũra ũrĩa tũtariĩ; nĩ tondũ maagarara maitũ ma watho tũtũire o namo, o naho ha ũhoro wa mehia maitũ-rĩ, nĩtũmoĩ mũno;
• 13. amu tũtũire twagararaga watho na tũgakaana Jehova, na tũkahutatĩra Ngai witũ tũgatiga kũmũrũmĩrĩra, tũkaaragia o ndeto cia kũhinyanĩrĩria, o na cia rũng’athio, o na tũgathugunda ndeto cia maheni na ngoro ciitũ na tũgacimemerekia.
• 14. Naguo ũhoro wa gũtua cira na kĩhooto nĩ mũhotomie, o naguo ũthingu ũgaikara ta wĩhandĩte handũ haraya mũno; nĩ ũndũ ũhoro-wa-ma nĩ ta ũgũĩte njĩra-inĩ, naguo ũrũngĩrĩru ũkaagĩrũo mweke.
• 15. Ĩĩ, ti-itherũ ũhoro-wa-ma nĩwagĩte o kwaga, nake mũndũ ũrĩa ũthemaga ũũru agatuĩka ta etwarĩrĩire mũtego-inĩ. Nake Jehova akĩona ũndũ ũcio, ũkĩaga kũmũkenia, nĩ ũndũ gũtiatuanagĩrũo cira na kĩhooto.
• 16. Ningĩ akĩona atĩ gũtiarĩ mũndũ mwerekereru, na agĩkĩgega nĩ ũndũ wa ũrĩa gũtaarĩ mũteithũrani. Tondũ ũcio agĩgĩtambũrũkia guoko gwake we mwene, nĩguo kũmũrehere ũhonokio, o na ũthingu wake ũkĩmũtiirĩrĩra.
• 17. Agĩcoka akĩĩhumba ũthingu ta arĩ gako ga kũgitĩra gĩthũri, o na akĩĩgitĩra na ũhoro wa kũhonokania ta arĩ gĩtukũ; agĩkĩgwata ũhoro wa kũrĩhanĩria ta arĩ nguo ciake cia kwĩhumba, o na akĩĩrutanĩria na kĩyo ta ehumbĩte nguo ĩrĩa ndaya ya mbaara.
• 18. O ta ũrĩa ciĩko ciao itariĩ-rĩ, ũguo noguo akarĩhana, nao arĩa matetanagia nake nĩo magakorũo nĩ mang’ũrĩka make, nacio thũ ciake nĩ kũgera agacigera ngero erĩhĩrie. O nao andũ arĩa matũire hũgũrũrũ-inĩ cia iria nĩakamagera ngero cia kwĩrĩhĩria.
• 19. Ũguo nĩguo gũgekwo nĩ getha andũ metigagĩre rĩĩtwa rĩa Jehova kuuma o ithũĩro, na riri wake kuuma o irathĩro-inĩ rĩa riũa; nĩ ũndũ agoka o ta karũũĩ gegũtherera na ihenya mũno, karĩa kahuhũrĩtwo na mĩhũmũ ya Jehova;
• 20. na akinye Zayuni akĩrĩ mũkũũri wa andũ akuo, o na akinye kwa andũ a Jakubu arĩa merirĩte magatiga kwagarara watho; ũguo nĩguo Jehova ekuuga.
• 21. Ningĩ Jehova ekuuga atĩrĩ, Ha ũhoro wakwa-rĩ, gĩkĩ nĩkĩo kĩrĩkanĩro gĩakwa kĩrĩa ndĩkanĩire nao, atĩ roho wakwa ũrĩa ũtũire nawe, nayo ndũmĩrĩri yakwa ĩrĩa ngwĩkĩrĩte kanua uumbũranĩre, ndũrĩ hingo ũgatiga kuumbũranĩra ũhoro wacio, o na kana ciage kuumbũranĩrũo na tũnua twa andũ a rũciaro rũaku, o na kana tũnua twa andũ a rũciaro rũa rũciaro rũaku gwata rĩu nginya tene na tene; ũguo nĩguo Jehova ekuuga.

Home