Go Back

Isaia Chapter 56

• 1. Jehova ekuuga atĩrĩ, Tũũrai mũmenyereire matuĩro ma cira wa kĩhooto, na mwĩkage maũndũ ma ũthingu, nĩ ũndũ ũhoro wakwa wa kũhonokanio ũkiriĩ gũũka, o naguo ũhoro wakwa wa ũthingu ũkiriĩ kũguũranĩrio.
• 2. Gũkena-rĩ, nĩ mũndũ ũrĩa wĩkaga maũndũ macio, o na mũrũ wa mũndũ ũrĩa ũikaraga amarũmĩtie mũno, o we ũrĩa ũikaraga amenyereire mũthenya wa thabatũ agatiga kũũthũkia, o na akarigĩrĩria guoko gwake gwĩka ũũru.
• 3. Ningĩ mũndũ wa kũngĩ ũrĩa wĩgiritanĩtie na Jehova ndakanarekwo aarie, oige atĩrĩ, Ti-itherũ Jehova nĩekũnyamũra andigithanie na andũ ake; o na kana mũndũ ũrĩa mũhakũre arekwo oige ũũ: Atĩrĩrĩ, niĩ ndariĩ o ta mũtĩ mũũmũ.
• 4. Nĩ gũkorũo ha ũhoro wa andũ acio ahakũre mamenyagĩrĩra thabatũ ciakwa, na magethurĩra maũndũ marĩa ndĩĩkenagĩra nĩmo, na makarũmia kĩrĩkanĩro gĩakwa-rĩ, Jehova ekuuga ũũ:
• 5. Nĩngamahe handũ thĩinĩ wa nyũmba yakwa, harĩa harigicĩirio nĩ thingo ciayo, o na ndũme magĩe igweta rĩega gũkĩra rĩa kũgĩa na ihĩĩ ciao o na airĩtu; ĩĩ, ti-itherũ nĩngamahe rĩĩtwa rĩrĩa megũtũũra metagwo tene na tene, rĩrĩa rĩtagacoka kũriganĩra.
• 6. O nao andũ a kũngĩ, arĩa megiritanĩtie na Jehova mamũtungatagĩre, na makenda rĩĩtwa rĩa Jehova nĩguo matuĩke ndungata ciake, mũndũ o wothe wao ũrĩa ũtũire amenyagĩrĩra mũthenya wa thabatũ agatiga kũũthũkia, na agaikara arũmĩtie kĩrĩkanĩro gĩakwa-rĩ,
• 7. acio o nao nĩngamatwara kĩrĩma-inĩ gĩakwa kĩamũre, na ndũme magĩe na gĩkeno mũno thĩinĩ wa nyũmba yakwa ya kũhoerũo; mahaki mao ma gũcinwo o na magongona marĩa mangĩ mao nĩmagetĩkĩrĩka marĩ kĩgongona-inĩ gĩakwa igũrũ, nĩ gũkorũo nyũmba yakwa nĩĩgetagwo nyũmba ya kũhoyagĩrũo nĩ ndũrĩrĩ ciothe.
• 8. Ningĩ Mwathani Jehova, o we ũrĩa ũcokagĩrĩria andũ a Isiraeli arĩa matũire maikĩtio na kĩano, ekuuga ũũ: Atĩrĩrĩ, hamwe na acio-rĩ, nĩngacokereria andũ angĩ mathiĩ harĩ we meonganĩrĩrie na andũ acio ake kĩũmbe, o arĩa macokereirio.
• 9. Atĩrĩrĩ, inyuĩ nyamũ ciothe cia gĩthaka, ũkai mũninane; ningĩ inyuĩ nyamũ ciothe cia mũtitũ-inĩ, o na inyuĩ ũkai.
• 10. Arangĩri ake nĩ atumumu, nao othe matirĩ ũndũ moĩ; acio othe matariĩ ta ngui itaaragia, ikaremwo nĩ kũgamba; matũire marotaga makomete thĩ, nao othe no kwenda mendaga gũcũnga makome.
• 11. Atĩrĩrĩ, ngui icio no gũkoroka ikorokete, na itingĩhũna o na atĩa; nacio nĩcio arĩithi arĩa matarĩ akuũku o na hanini; othe nĩ kũgarũrũka magarũrũkĩte magethiĩra na njĩra ciao o ene, nao othe mũndũ o mũndũ ecaragĩria o maũndũ ma kwĩguna we mwene moiki.
• 12. Ningĩ acio nĩo moigaga atĩrĩ, Ũnganai ndĩmũrehere ndibei, na ithuĩ tũcoke tũtereme njohi ĩrĩa ndũrũ twĩhũnĩrĩrie mũno; ningĩ rũciũ rũkahaana o ta ũmũthĩ, o ro mũthenya mũnene mũno ũtangĩheanĩka ũrĩa ũhoro waguo ũtariĩ.

Home