Go Back

Isaia Chapter 52

• 1. Hindũka ũũkĩre, wee Zayuni, wĩĩkĩre hinya; wĩhumbe nguo ciaku iria thaka, wee Jerusalemu, itũũra rĩrĩa rĩamũre; nĩ gũkorũo gwata rĩu gũtigacoka gũtonya thĩinĩ waku mũndũ ũtarĩ mũruu, kana ũrĩa wĩ thahu.
• 2. Wĩribaribe uume rũkũngũ-inĩ; arahũka, wĩikarĩre thĩ, wee Jerusalemu; wĩohore mĩhĩndo ĩkuume ngingo, wee mwarĩ wa Zayuni, o wee ũtũire wĩ muohe.
• 3. Nĩ gũkorũo Jehova ekuuga ũũ: Mwendirio o ro ũguo mũtarĩ kĩndũ mũrutĩirũo, na mũgacoka gũkũũrũo o ro ũguo mũtekũrutĩrũo mbia.
• 4. Nĩ ũndũ Mwathani Jehova ekuuga ũũ: Tene andũ akwa maaikũrũkire magĩthiĩ Misiri, magĩtũũra kuo marĩ ageni; ningĩ Aashuri nĩmaamahinyĩrĩirie hatarĩ gĩtũmi.
• 5. Tondũ ũcio Jehova ekuuga atĩrĩ, Rĩu ndĩragĩĩka atĩa haha, kuona atĩ andũ akwa matahĩirũo tũhũ? Andũ arĩa mamaathaga nĩ kũrũhia mararũhia nĩ ũndũ wao, narĩo rĩĩtwa rĩakwa rĩtindaga rĩgĩcambio hĩndĩ ciothe; ũguo nĩguo Jehova ekuuga.
• 6. Tondũ ũcio andũ akwa nĩmakamenya rĩĩtwa rĩakwa, na mũthenya ũcio mamenye atĩ niĩ nĩ niĩ ũrĩa waragia ũhoro; ĩĩ-ni, nĩ niĩ ũyũ ndĩ haha.
• 7. Kũu irĩma-inĩ igũrũ-rĩ, kaĩ magũrũ ma mũndũ ũrĩa ũrarehe ũhoro mwega nĩmaagĩrĩire-ĩ, o ũcio ũrahunjanĩria ũhoro wa thayũ, na akarehe ũhoro mwega wa maũndũ maagĩrĩru, o na akahunjanĩria ũhoro wa kũhonokanio, o we ũrĩa ũrera Zayuni atĩrĩ, Ngai waku nĩwe ũrathamaka!
• 8. Ta igua mũgambo wa arangĩri aku! Nĩmaũhaicĩtie na igũrũ, na mekũina me hamwe; nĩ ũndũ nĩmekuonana nake ũthiũ na ũthiũ hĩndĩ ĩrĩa Jehova egũcoka Zayuni.
• 9. Atĩrĩrĩ, inyuĩ kũndũ kwanangĩku kwa Jerusalemu, itĩkanai na gũkena mũine hamwe; nĩ gũkorũo Jehova nĩahoreretie andũ ake na agakũũra Jerusalemu.
• 10. Jehova nĩaguũrĩirie ndũrĩrĩ ciothe guoko gwake gũtheru, ikuone na maitho ma cio; nacio ituri ciothe cia thĩ nĩirĩona ũhonokanio wa Ngai witũ.
• 11. Eherai, eherai, muume kũu; menyai mũhutie kĩndũ gĩĩ thahu. Umai kũu thĩinĩ, mwĩtherie, inyuĩ mũrakuua indo cia Jehova.
• 12. Nĩ gũkorũo mũtikoima kuo na ihenya, kana mũthiĩ ta mũkũũra; nĩ tondũ Jehova nĩwe ũkamũgĩa mbere, nake Ngai wa Isiraeli arigie thutha wanyu.
• 13. Atĩrĩrĩ, ndungata yakwa nĩĩgeka maũndũ na ũũgĩ; nĩ gũtũũgĩrio ĩgatũũgĩrio, na ĩnenehio, nayo ĩtũũre ĩnenehete mũno.
• 14. O ta ũrĩa andũ aingĩ maagegirio nĩ ũhoro wake, (tondũ gĩthiithi kĩayo nĩgĩathũkĩtio mũno, gĩgakĩra kĩa andũ arĩa angĩ othe, o naguo mũhianĩre wayo ũgathũkio gũkĩra wa ciana cia Adamu ciothe,)
• 15. noguo akamakia ndũrĩrĩ nyingĩ. Athamaki nao nĩmakamũtumĩria tũnua twao nĩ gũkorũo maũndũ marĩa materĩtwo nĩmo makona, o namo maũndũ marĩa mataaiguĩte nĩmagecũrania ũhoro wamo.

Home