Go Back

Isaia Chapter 50

• 1. Jehova ekuuga ũũ: Marũa marĩa nyũkwa aateirũo namo, o macio monanagia atĩ nĩndĩmũteete-rĩ, me ha? Kana nĩ mũndũ ũrĩkũ wa arĩa ndĩ na thirĩ wao ndakwendeirie? Atĩrĩrĩ, waganu wanyu nĩguo watũmire mwendĩo; o nake nyina wanyu aateirũo nĩ ũndũ wa ũrĩa mwaagararĩte watho.
• 2. Nĩ kĩ gĩatũmire hakorũo hatarĩ mũndũ hĩndĩ ĩrĩa ndokire? Ningĩ hĩndĩ ĩrĩa ndetanire-rĩ, nĩ kĩ gĩatũmire hakorũo hatarĩ mũcokia wa ũhoro? Anga hinya wa guoko gwakwa nĩ kũnyiha ũnyihĩte atĩ nĩguo kũremwo nĩ gũkũũra andũ? Kana nĩ hinya itarĩ naguo wa kũhonokania? Atĩrĩrĩ, niĩ nĩ’hũithagia iria rĩrĩa inene na ikũmana rĩakwa, o na ngatũma njũĩ ituĩke werũ; ciũngũyũ ciakuo igakĩnunga nĩ kwaga maĩ, igakua nĩ nyota.
• 3. Niĩ nĩ niĩ ’humbaga matu-mairũ nduma, nayo ngunĩko yamo ngatũma ĩtuĩke o ta tama wa ikũnia.
• 4. Mwathani Jehova a’heete rũrĩmĩ rũa andũ arĩa marutagwo maũndũ, nĩ getha ’menye ũrĩa ingĩhota gũteithia na ciugo ciakwa mũndũ ũrĩa ũnogete; anjarahũraga rũcinĩ o rũcinĩ, agekĩra matũ makwa njigua, nĩguo ndĩĩrute ũhoro ta andũ arĩa marutagwo maũndũ.
• 5. Mwathani Jehova angunũrĩte gũtũ, na niĩ ndirĩ ndamũrema, o na kana ngacoka na thutha.
• 6. Andũ arĩa ahũrani-rĩ, nĩ kũhutata ndamahutatĩire ma’hũre, o namo makai makwa ngĩmahũgũkĩria andũ arĩa maa’munyaga nderu. Ndiigana kũhitha ũthiũ wakwa atĩ nĩguo ndigaconorithio kana ndige gũtuĩrũo mata.
• 7. Nĩ gũkorũo Mwathani Jehova nĩwe ũkandeithia, na tondũ ũcio ndĩconorithĩtio; ningĩ nĩ tondũ ũcio ndũmĩte ũthiũ wakwa ũikarage ũũmĩte o ta ihiga rĩa nyaigĩ, ngakĩmenya atĩ ndigaconorithio.
• 8. Ningĩ We ũrĩa ũnduaga mũthingu e hakuhĩ; nũ ũgagĩtetania na niĩ? Nĩtũrũgamei ithuerĩ hamwe. Ningĩ ũrĩa ũkũnjirithia nĩwe ũrĩkũ? Ta nĩagĩokoke anguhĩhĩrie.
• 9. Atĩrĩrĩ, Mwathani Jehova nĩwe ũkandeithia; nũ ũgakĩndua mwĩhia cira-inĩ? Othe nĩ gũkũra magakũra ta nguo; mathire biũ ta nguo ĩrĩĩkĩte nĩ memenyi.
• 10. Nũ wanyu wĩtigĩrĩte Jehova na akaigua mũgambo wa ndungata yake? Ũcio-rĩ, o na angĩkorũo athiagĩra nduma-inĩ atarĩ na ũtheri, wega wake no aikare ehokete rĩĩtwa rĩa Jehova, na aikarage egiritanĩtie na Ngai wake.
• 11. Atĩrĩrĩ, inyuĩ arĩa mwakagia mwaki, o inyuĩ arĩa mũũkanagĩrĩra mũgwete icinga cia mwaki, gerai mwaki-inĩ ũcio mũrĩrĩmbũkĩtie inyuene, o gatagatĩ-inĩ ka icinga icio cianyu! Ũrĩa mũkũheo nĩ guoko gwake no ũyũ, atĩrĩ, atĩ mwĩkomie thĩ mwĩ na haaro.

Home