Go Back

Isaia Chapter 49

• 1. Atĩrĩrĩ, inyuĩ andũ arĩa mũtũũraga ithama-inĩ, ta ’thikĩrĩriai; o na inyuĩ andũ a kũraya-rĩ, ta tegai matũ. Jehova nĩ kũnjĩta aanjĩtire ndĩ o nda, ningĩ hĩndĩ ĩrĩa ndarĩ o nda ya maitũ thĩinĩ-rĩ, nĩyo aagwetire rĩĩtwa rĩakwa.
• 2. Kanua gakwa-rĩ, nĩ gũtũma aatũmire gatuĩke ta rũhiũ rũũgĩ, o nakĩo kĩĩruru-inĩ gĩa guoko gwake nĩho aa’hithire; agĩtũma nduĩke o ta kĩano kĩa mũguĩ kĩrĩa kĩnyoroketio, akĩnjikaria hakuhĩ nake thiaka-inĩ wake;
• 3. agĩgĩcoka akĩnjĩra atĩrĩ, Wee nĩwe ndungata yakwa Isiraeli, nĩ thĩinĩ waku ndĩĩgoocagwo.
• 4. No niĩ ngiuga atĩrĩ, Ndutĩte wĩra wa tũhũ; ndutĩte hinya wakwa wothe nĩ ũndũ wa maũndũ matarĩ kĩguni, o na ma tũhũ. No rĩrĩ, o na gwatuĩka nĩ ũguo-rĩ, ti-itherũ ũhoro wakwa wa gũtuĩrũo cira na kĩhooto ũkoima harĩ Jehova, o narĩo irĩhi rĩakwa riume harĩ Ngai wakwa.
• 5. No rĩu, Jehova, o we ũrĩa wanyũmbire ndĩ o nda, nĩ getha nduĩke ndungata ya kũhũndũra Jakubu ndĩmũcokie harĩ we, o na ya gũcokereria Isiraeli harĩ we, (nĩ gũkorũo niĩ ndĩ mũtĩĩku ngĩonwo nĩ Jehova, o nake Ngai wakwa nĩwe ũtuĩkĩte hinya wakwa-rĩ,)
• 6. ũcio ekuuga ũũ: Ti-itherũ ũndũ ũyũ nĩ mũhũthũ, atĩ wee ũtuĩke ndungata yakwa nĩguo ũtũme andũ a mũhĩrĩga wa Jakubu maarahũrũo, o na atĩ ũcokererie matigari ma andũ a Isiraeli. Ũrĩa ngũkuongerera-rĩ, nĩ atĩ ũtuĩke ũtheri wa gũtherera andũ a ndũrĩrĩ, nĩguo ũtuĩke wa gũkinyia ũhoro wakwa wa kũhonokania ituri-inĩ cia thĩ ciothe.
• 7. Jehova, mũkũũri wa Isiraeli, o we ũtuagwo Ũrĩa Mũtheru wake, nĩ kwaria ekwarĩria ũrĩa ũmenetwo nĩ andũ, o na agathũũrũo nĩ rũrĩrĩ rũao, o na agatuwo ta ngombo ya arĩa maathanaga, akoiga ũũ: Athamaki nĩmakona maũndũ macio, na nĩmagokĩra marũgame; nao anene nĩmakamona, na nĩmakainamĩrĩra mahoe, nĩ ũndũ wa ũrĩa Jehova atũire arĩ mwĩhokeku, o we Ũrĩa Mũtheru wa Isiraeli, na nĩwe ũgũthurĩte.
• 8. Jehova ekuuga ũũ: Ihinda rĩa gwĩtĩkĩrĩka-rĩ, nĩndagũcokeirie ũhoro, o naguo mũthenya wa kũhonokanio-rĩ, nĩndagũteithirie; na nĩndĩrĩkũmenyagĩrĩra, o na ningĩ nĩngũkũheana ũtuĩke wa kũrĩkanĩra kĩrĩkanĩro na andũ anyu, nĩguo warahũrage andũ a bũrũri, o na ũtũme megwatĩre kũndũ kũrĩa gwatigirũo gũkirĩte ihooru, nĩguo gũtuĩke igai rĩao.
• 9. Ningĩ wĩrage andũ arĩa mohetwo atĩrĩ, Wĩthiĩrei; o nao arĩa maikarĩte nduma-inĩ, ũmere atĩrĩ, Wĩyonaniei. Marĩthiaga makĩrĩithagio o na njĩra, na monage gĩa kũrĩa baraganya-inĩ wa kũndũ gũtũũgĩru.
• 10. Matikahũta, o na kana manyote, o na matikanyarirũo nĩ ũrugarĩ, o na kana macinwo nĩ riũa; nĩ gũkorũo we ũrĩa ũmaiguagĩra tha nĩakamonia njĩra, o na amatongorie amahire ithima-inĩ cia maĩ.
• 11. Nĩngatũma irĩma-inĩ ciakwa ciothe kũgĩe njĩra, o nacio njĩra ciakwa cia gĩtwari ciambatĩrio na igũrũ.
• 12. Atĩrĩrĩ, andũ amwe magoka moimĩte kũndũ kũraya mũno, nao angĩ moke moimĩte mwena wa gathigathini, na angĩ mwena wa ithũĩro, o na angĩ bũrũri wa Sinimu.
• 13. Atĩrĩrĩ, inyuĩ matu-mairũ, ta inai o mũcanjamũkĩte; o nawe thĩ-rĩ, ta kenũrũrũka; o na inyuĩ irĩma o na inyuĩ-rĩ, ta itĩkanai na rũĩmbo. Tondũ Jehova nĩahoreretie andũ ake, o nao andũ ake arĩa anyarire nĩekũmaiguĩra tha.
• 14. No rĩrĩ, Zayuni nĩoigire atĩrĩ, Jehova nĩandirikĩte, o nake Mwathani akariganĩrũo nĩ niĩ.
• 15. Rĩu-rĩ, mũndũ-wa-nja aakĩriganĩrũo nĩ kaana gake karĩa ongithagia, na aage kũiguĩra mwana wa nda yake tha? Ĩĩ, ti-itherũ hihi acio maariganĩrũo nĩ ciana ciao; no rĩrĩ, niĩ ndingĩriganĩrũo nĩwe o na atĩa.
• 16. Atĩrĩrĩ, ngururĩte mũhianĩre waku hĩ-inĩ cia moko makwa, ningĩ thingo ciaku itirĩ hingo cieheraga maitho-inĩ makwa hĩndĩ ciothe.
• 17. Ihĩĩ ciaku nĩ gũũka iroka iteng’erete, nao arĩa maakũninithirie magĩkwananga-rĩ, nĩ kuuma makoima harĩ wee more.
• 18. Inamũra maitho maku na ndwere ciothe ũcũthangĩrĩrie. Aya othe marecokanĩrĩria hamwe moke harĩ wee. O ta ũrĩa ndũũraga muoyo-rĩ, ti-itherũ andũ aya othe nĩ ta kwĩhumba ũkamehumba o ta marĩ nguo cia kwĩgemia nacio, na ũmeohe o ta ũrĩa mũhiki eĩkaga akĩĩgemia na mathaga make; ũguo nĩguo Jehova ekuuga.
• 19. Nĩ gũkorũo ha ũhoro wa kũndũ gwaku kũrĩa kwanangĩkĩte na gũgakira ihooru, o na ũhoro wa bũrũri waku ũrĩa ũũnũhĩtwo-rĩ, ti-itherũ bũrũri ũcio nĩũgakorũo ũnyihĩire andũ arĩa maũtũũraga, nao andũ arĩa mararĩaga bũrũri waku ta makũmeretie, magakorũo maingatĩtwo makora haraya nawe.
• 20. Na rĩrĩ, ciana ciaku iria waciarire wĩ mũrindũre-rĩ, nĩikoigĩra matũ-inĩ maku, mũndũ o mũndũ, atĩrĩ, Bũrũri ũyũ nĩũ’nyihĩire mũno; ’he handũ haiganu ha gũtũũra.
• 21. Hĩndĩ ĩo ũgakĩĩĩra na ngoro yaku atĩrĩ, Hĩ, nũ wakĩnjiarĩire ciana ici, kuona atĩ nĩnguĩrĩirũo nĩ ciana ciakwa ngatigwo ta ndĩ thata, na ngarindũrũo, na ngatuĩka mũcangi kũndũ guothe? Ningĩ ciana ici nacio nũ wacirerire? Atĩrĩrĩ, githĩ ndiagĩtigirũo ndĩ o nyiki? Ici nacio-rĩ, nĩ cia na kũ hihi?
• 22. Jehova Ngai ekuuga ũũ: Atĩrĩrĩ, ndũrĩrĩ-rĩ, nĩngaciambararĩria guoko gwakwa na igũrũ, njoke ’hande kĩbebero gĩakwa kĩonwo nĩ andũ a mabũrũri mangĩ; nao nĩmakarehe ariũ aku mamakuuĩte ithũri-inĩ ciao, o nao airĩtu aku mamakuuage na ciande ciao.
• 23. Athamaki-rĩ, nĩo magatuĩka ta mathoguo a gũkũrera, o nao atumia ao matuĩke ta marĩ aa nyũkwa a gũkũrera. Magakũinamĩrĩra maturumithĩtie mothiũ thĩ, o naruo rũkũngũ rũrĩa rũrĩ magũrũ maku marũcũne, nawe nĩũkamenya atĩ niĩ nĩ niĩ Jehova, na atĩ arĩa manjetagĩrĩra matigaconoka.
• 24. Atĩrĩrĩ, anga mũndũ angĩkorũo arĩ njamba ĩrĩ hinya aatunyũo indo iria atahĩte, o na kana andũ arĩa manyitĩtwo makohwo he kĩhooto mohorũo?
• 25. No rĩrĩ, Jehova ekuuga ũũ: Atĩrĩrĩ, o nacio njamba iria irĩ hinya nĩigatunyũo andũ a cio arĩa ciohete, o nao arĩa maatahirũo nĩ arĩa me itua-nda nĩmakahonokio; nĩ gũkorũo niĩ nĩ niĩ ngahũrana na mũndũ ũrĩa ũhũranaga nawe, na nĩngahonokia ciana ciaku.
• 26. Nao arĩa makũhinyagĩrĩria nĩngatũma marĩe nyama cia mĩĩrĩ yao o ene, na marĩwo nĩ thakame yao o ene o ta mũndũ ũrĩĩtwo nĩ ndibei ĩrĩ mũrĩo; nao andũ othe me mwĩrĩ nĩmakamenya atĩ niĩ Jehova nĩ niĩ mũkũhonokia, na mũgũkũũri, o niĩ Ũrĩa-wĩ-Hinya-Mũno wa Jakubu.

Home