Go Back

Isaia Chapter 48

• 1. Atĩrĩrĩ, ta thikĩrĩriai ũhoro ũyũ, inyuĩ nyũmba ya Jakubu, o inyuĩ mwĩtanagio na Isiraeli, ta mũthethũkĩte mũkoima gĩthima-inĩ kĩa Juda, o inyuĩ mwĩhĩtaga mũkĩgwetaga rĩĩtwa rĩa Jehova, na mũgathathaiya Ngai wa Isiraeli, no mũtimũthathaiyagia mũrongoretie ũhoro-wa-ma, o na kana mũkarongoria ũhoro wa ũthingu.
• 2. Nĩ gũkorũo andũ acio meĩtaga a itũũra rĩrĩa rĩtheru, na makegiritania na Ngai wa Isiraeli; narĩo rĩĩtwa rĩrĩa etagwo nĩ Jehova Mũnene wa Ita.
• 3. Maũndũ marĩa ma tene-rĩ, nĩndĩmoimbũrĩte kuuma o ihinda rĩa mĩndĩ na mĩndĩ. Ĩĩ, ti-itherũ maaririo moimĩte kanua gakwa, na ngĩmonania wega; ngĩgĩcoka ngĩguthũka ngĩmahingia o narua na mbũkĩrĩra, namo magĩgĩĩkĩka.
• 4. Na rĩrĩ, tondũ nĩndamenyaga atĩ wĩ mũremi mũno, nayo ngingo yaku ĩkahaana ta rũga rũũmũ ta kĩgera, naguo thiithi waku ũgatuĩka ta gĩcango-rĩ,
• 5. nĩkĩo ndakuumbũrĩire maũndũ macio kuuma o tene; na rĩrĩ, o mbere maũndũ macio matanekĩka, nĩguo ndakuonirie ũhoro wamo, nĩ getha ndũkanoige atĩrĩ, Mũhianano wakwa wa kũhoyũo nĩguo wekire maũndũ macio, o na mũhianano wakwa wa gwacũhio, na ũrĩa wa gũtwekio, nĩyo yaathanire ũhoro wamo.
• 6. Kũigua nĩũiguĩte maũndũ macio; ta kĩone maya mothe! Inyuĩ-rĩ, githĩ mũtigakĩmoimbũranĩra atĩ nĩguo matariĩ? Nĩ kuonia ndĩrakuonia maũndũ mangĩ merũ gwata rĩu, o maũndũ mahithe marĩa ũtamenyete.
• 7. Maũndũ macio mathugundĩtwo rĩu, na ti ma ndũire, ningĩ tiga o mũthenya ũyũ wa ũmũthĩ-rĩ, ndũrĩ waigua ũhoro wamo, nĩ getha ndũkanoige ũũ: Atĩrĩrĩ, maũndũ macio nĩndũire ndĩmamenyete.
• 8. Ĩĩ, ti-itherũ ndũrĩ wamaigua, o na ti-itherũ ndũrĩ wamenya ũhoro wamo; ti-itherũ kuuma tene o tene-rĩ, gũtũ gwaku gũtũire gwĩ kũhingaru; nĩ gũkorũo nĩndoĩ atĩ nĩwekaga maũndũ maingĩ ma ũrĩa-ng’ũũrũ, o na atĩ gwata o hĩndĩ ĩrĩa woimire nda ya nyũkwa wĩtagwo mwagarari watho.
• 9. Tondũ wa rĩĩtwa rĩakwa-rĩ, nĩndĩĩrĩtie marakara makwa, na tondũ wa ũrĩa ndũire ngoocagwo, ngegirĩrĩria marakara nĩ ũndũ waku, nĩ getha ndigakũng’ũrie biũ.
• 10. Atĩrĩrĩ, ngũtheretie o gũgũtheria, no ti ta ũrĩa betha ĩtheragio; wee-rĩ, ngũgeretie icua-inĩ rĩa kĩnyarirano.
• 11. Tondũ wa ũhoro wakwa niĩ mwene, ĩĩ, ti-itherũ tondũ wa ũhoro wakwa niĩ mwene-rĩ, ũndũ ũcio nĩngawĩka; nĩ ũndũ-rĩ, kaĩ rĩĩtwa rĩakwa rĩngĩthahio nĩ ũndũ kĩ? O na ningĩ-rĩ, riri wakwa ndingĩũhe mũndũ ũngĩ o na ũrĩkũ.
• 12. Atĩrĩrĩ, wee Jakubu, ta ’thikĩrĩria, o nawe Isiraeli, o we ũrĩa njĩtĩte-rĩ, ta ’thikĩrĩria. Niĩ nĩ niĩ Ngai; nĩ niĩ wa mbere, o na ningĩ nĩ niĩ wa kũrigĩrĩria.
• 13. Ĩĩ, ti-itherũ moko makwa nĩmo maarire gĩtina gĩa thĩ, nakuo guoko gwakwa kwa ũrĩo nĩkuo gwatambũrũkirie matu marĩa mairũ; hĩndĩ ĩrĩa ngũmeta-rĩ, nĩ kũrũgama marũgamanagĩra o hamwe.
• 14. Atĩrĩrĩ, wĩcokanĩrĩriei inyuothe hamwe, mũigue; nĩ mĩhianano ĩrĩkũ ya andũ acio ĩrĩ yoimbũranĩra maũndũ macio? We ũrĩa wendetwo nĩ Jehova-rĩ, nĩwe ũgeka kũu Babuloni o ta ũrĩa eyendeire, o nakuo guoko gwake nĩkuo gũkomĩra Akalidei.
• 15. Niĩ o niĩ-rĩ, kwaria nĩnjarĩtie; ĩĩ, ti-itherũ gwĩta nĩndĩmwĩtĩte na ngamũrehe, na ngatũma agaacĩre mĩthiĩre-inĩ yake.
• 16. Nguhĩhĩriai mũigue ũhoro ũyũ; kuuma o kĩambĩrĩria-inĩ-rĩ, ndirĩ ndaaria ũhoro na hitho; kuuma o hĩndĩ ĩrĩa maũndũ macio maambire kuoneka-rĩ, nĩ niĩ ndakoragwo ho. Na rĩu Jehova Ngai nĩ kũrekia andeketie, we mwene o na Roho wake.
• 17. Jehova Mũgũkũũri, o we Ũrĩa Mũtheru wa Isiraeli-rĩ, ekuuga ũũ: Niĩ nĩ niĩ Jehova Ngai waku ũrĩa ũkũrutaga maũndũ ma gũkũguna, o we ũrĩa ũgũtongoragia na njĩra ĩrĩa wagĩrĩirũo nĩ kũgera.
• 18. Hĩ! Na arĩ korũo nĩwaiguite maathani makwa! Kũngĩakorirũo nĩ ũguo-rĩ, thayũ ũrĩa ũngĩagĩire naguo ũngĩahaanire o ta rũũĩ rũgũtherera, o naguo ũthingu waku ũngĩahaanĩre o ta ndihũ cia maĩ ma iria;
• 19. o naruo rũciaro rũaku-rĩ, rũngĩahaanire o ta mũthanga wa iria-inĩ, o namo maciaro ma nda yaku mahaane o ta hĩndĩ ciaguo, narĩo rĩĩtwa rĩao rĩtingĩang’ũririo, o na kana rĩninwo, rĩehere mbere yakwa.
• 20. Umai Babuloni. Ũrai mweherere Akalidei. Umbũranĩrai o na mũheane ũhoro ũyũ ta arĩ rũĩmbo mũkũina rũa kũiguwo o nginya ituri-inĩ cia thĩ, muuge ũũ: Atĩrĩrĩ, Jehova nĩakũũrĩte ndungata yake Jakubu.
• 21. Nao matianyotaga hĩndĩ ĩrĩa aamatongoragĩria werũ-inĩ; nĩaatũmire maĩ matherere moimĩte rũaro-inĩ rũa ihiga nĩ ũndũ wao, o na ningĩ agĩatũra rũaro rũa ihiga, namo maĩ makĩhororoka.
• 22. Na rĩrĩ, Jehova ekuuga ũũ: Andũ arĩa aaganu-rĩ, matirĩ thayũ makagĩa naguo o na rĩ.

Home