Go Back

Isaia Chapter 47

• 1. Atĩrĩrĩ, wee mũirĩtu ũyũ mwarĩ wa Babuloni, ta harũrũka, ũikare rũkũngũ-inĩ! Wee, mwarĩ wa Akalidei, ta ikara thĩ o ro ũguo ũtaikarĩire gĩtĩ kĩa ũnene! Nĩ gũkorũo ndũgacoka gwĩtwo mwĩbarĩrĩri ũtarĩ ũndũ ũngĩtangĩkĩra.
• 2. Oya mahiga ma gĩthĩi, ũthĩe mũtu; wĩguũrie tama waku wa mũtwe, na wĩaũre nguo yaku ĩrĩa ndaya; heta nguo cia magũrũ, nĩguo ũringe njũĩ ũtobokete maĩ-inĩ thĩinĩ.
• 3. Nĩũkaaũrũo nguo, ũtigwo njaga; ti-itherũ nĩũkonwo ta ũconorithĩtio. Niĩ nĩ niĩ ngerĩhĩria, na ndigetĩkĩra kwara ũhoro wa thayũ na mũndũ o na ũmwe.
• 4. Rĩĩtwa rĩa mũtũkũũri nĩ Jehova Mũnene wa Ita, o we Ũrĩa Mũtheru wa Isiraeli.
• 5. Atĩrĩrĩ, wee, mwarĩ wa Akalidei, ikara ũkirĩte ki, ũthiĩ ũkinye kũndũ kwĩ nduma, nĩ gũkorũo ndũgacoka gwĩtwo Mũtumia Mwathi wa mabũrũri maingĩ o na rĩ.
• 6. Nĩ kũrakara ndarakarĩire andũ akwa, ngĩtũma andũ acio ndegwatĩire matuĩke akwa magwatwo nĩ kĩrumi, ngĩmaneana moko-inĩ maku; nawe-rĩ, ndũigana kũmaiguĩra tha, naguo mũtĩ waku wa ngingo niwaũigĩrĩire andũ arĩa akũrũ na hinya o mũno mũno.
• 7. Nawe ũkiuga atĩrĩ, Ngũtũũra ndĩ Mũtumia Mwathani tene na tene; tondũ ũcio ndũigana kũrũmbũiya maũndũ macio na ngoro yaku, o na kana ũkĩririkana gwĩciria wega ũrĩa ũhoro wamo wa kũrigĩrĩria ũgaikara.
• 8. Na rĩu, wee ũtũire wĩkenagia, o na ũgaikara ũtarĩ ũndũ o na ũmwe ũgũtangĩkĩra, na ningĩ wĩĩraga na ngoro yaku ũũ: Atĩrĩrĩ, niĩ no niĩ ndĩ bata, na hatirĩ ũngĩ o na ũrĩkũ thengia o niĩ nyiki; niĩ-rĩ, ndigaikara ta ndĩ mũka wa ndigwa, o na kana ngamenya ũhoro wa gũkuĩrũo nĩ ciana; wee-rĩ, ta igua ũhoro ũyũ.
• 9. Maũndũ macio merĩ magagũkora o kahinda kanini, mũthenya o ro ũmwe, namo nĩ gũkuĩrũo nĩ ciana, o na gũikara wĩ mũka wa ndigwa. Na rĩrĩ, o na harĩa wĩ na ũrogi mũingĩ, o naguo ũgo waku ũkaũingĩhia mũno-rĩ, maũndũ macio nĩmagagũkora na kĩguũ.
• 10. Nĩ gũkorũo ũtũire wĩhokete waganu waku, na ũkeĩraga atĩrĩ, Gũtirĩ mũndũ ũkũnyona; no rĩrĩ, ũũgĩ waku, o na ũhoro waku wa kũmenya maũndũ, nĩmo makũhĩtithĩtie njĩra, o na harĩa wĩĩraga na ngoro yaku atĩrĩ, Niĩ no niĩ ndĩ bata, na hatirĩ ũngĩ o na ũrĩkũ thengia o niĩ nyiki.
• 11. Tondũ ũcio ũũru nĩũgakũguthũkĩra ũgũkore, na ndũkamenya kĩhumo kĩaguo, o namo maũndũ ma gũkũnyarira magũkore, nawe ndũhote kũmegita; na nĩũgakorererũo narua nĩ maũndũ ma gũtũma ũkire ihooru, o marĩa ũtamamenyete.
• 12. Ta gĩikare o ro ũguo wĩhokete ũgo waku, o na ũrogi ũrĩa wĩ naguo wa mĩthemba mĩingĩ, o maũndũ macio ũtũire ũrutaga wĩra namo gwata o hĩndĩ ĩrĩa warĩ mũnyinyi, nĩ getha kũrorũo kana hihi nĩũgakĩona kĩguni kĩamo, o na kana hihi ũtuane nda.
• 13. Ũtũire wĩnogetie na irĩra ciaku nyingĩ; rĩu-rĩ, ta kĩreke ago arĩa maroraga igũrũ matu-inĩ, o nao atuĩria a ũhoro wa njata, o na andũ arĩa marathaga mohoro mweri o mweri, marũgame, na makũhonokie maũndũ-inĩ marĩa marĩgũkorerera.
• 14. Atĩrĩrĩ, andũ acio magatuĩka o ta itira iria itigĩtwo mũgũnda; nĩ gũcinwo magacinwo nĩ mwaki, na matikahota kwĩhonokia harĩ hinya wa rũrĩrĩmbĩ rũa mwaki, amu mwaki ũcio ndũkahaana ta makara marĩa mũndũ otaga, o na kana mwaki wa gũikarũo mbere yaguo.
• 15. Ũguo noguo maũndũ marĩa wĩnogetie ũkĩruta wĩra namo magatuĩka harĩ wee; andũ arĩa muonjorithanagia nao gwata o hĩndĩ ĩrĩa warĩ mũnyinyi nĩmakagwata njĩra methiĩre mũndũ o mũndũ handũ hake; na hatigatigwo mũndũ o na ũmwe wa gũkũhonokia.

Home