Go Back

Isaia Chapter 46

• 1. Atĩrĩrĩ, Beli nĩĩhocereire, nayo Nebo ĩkainamĩrĩra. Hĩ! Mĩhianano ya ngai icio nĩ gũkuuo ĩkuuĩtwo nĩ nyamũ o na ũhiũ; indo icio mwakuuaga mũgĩciceeragia-rĩ, nĩititikithĩtio nyamũ, nacio igathiĩ icikuuĩte, ikĩrĩ mũrigo mũritũ wa gũcinogia.
• 2. Ngai icio cia andũ akuo-rĩ, nĩirainamĩrĩra, na ikenda kũgũa ciothe hamwe; itihotete kũhonokia mĩhianano ĩo ĩkuuĩtwo, no rĩrĩ, cio nyene nĩitahĩtwo igatwarũo ũkombo-inĩ.
• 3. Atĩrĩrĩ inyuĩ andũ a nyũmba ya Jakubu, o na matigari mothe ma nyũmba ya Isiraeli, o inyuĩ muonagwo ta mũrĩ mũrigo nditikĩte gwata hĩndĩ ĩrĩa mwoimire nda cia manyina manyu, o na ngatũũra ndĩmũkuuĩte kuuma o hĩndĩ ĩrĩa mwaciarirũo, ta ’thikĩrĩriai;
• 4. o na mũmenye atĩ o nginya ihinda rĩa ũkũrũ, o na rĩrĩa mũgakorũo mwĩ na mbuĩ, niĩ nĩ niĩ ũrĩa ũgũtũũra amũkuuaga; niĩ nĩ niĩ ndamũũmbire, na nĩ niĩ ngũtũũra ndĩmũkuuaga; ĩĩ, ti-itherũ niĩ nĩ niĩ ngũtũũra ndĩmũkuuaga, o na ’honokanie.
• 5. Atĩrĩrĩ, mũgũkĩ’haanania na ũ, mũninganie nake; ningĩ mũkũngerekania na ũ, nĩ getha tũhianane nake?
• 6. Andũ arĩa marutaga thahabu mondo-inĩ ciao o ro ũguo mategũthima, na magathima betha na ratiri-rĩ, maandĩkaga mũturi amaturĩre thahabu, nake akamĩthondeka ĩtuĩke mũhianano wa ngai yao; magagĩcoka kũmĩgũĩra thĩ, makamĩturagĩria ndu; ĩĩ, ti-itherũ makamĩhoya.
• 7. Naguo mũhianano ũcio wao-rĩ, makaũigĩrĩra ciande ciao, makaũkuua, makaũiga handũ haguo, naguo ũgaikara ũrũgamĩte o ro ũguo. Handũ hau haguo-rĩ, ndũgacoka gũthenga uume ho; o na mũndũ angĩũkaĩra-rĩ, ndũngĩhota gũcokia ũhoro, o na kana ũmũhonokie thĩna-inĩ ũrĩa e naguo.
• 8. Atĩrĩrĩ, inyuĩ aremi aya, ririkanai ũndũ ũyũ, na mwĩonanie atĩ mũrĩ arũme ki, o na mwĩririkarie ũndũ ũyũ.
• 9. Ta ririkanai maũndũ marĩa mekirũo tene, nĩ gũkorũo niĩ nĩ niĩ Mũrungu, na gũtirĩ ũngĩ o na ũrĩkũ; nĩ niĩ Ngai, na gũtirĩ ũngĩ ũhaana ta niĩ,
• 10. o niĩ nyumbũranagĩra maũndũ marĩa makoneka ma kũrigĩrĩria kuuma o hĩndĩ ĩrĩa maũndũ maambĩrĩirio, na ngoimbũra maũndũ marĩa matarĩ marekwo kuuma o hĩndĩ ya agu na agu, ngiuga atĩrĩ, Kĩrĩra gĩakwa nĩgĩgaikara kĩrũmĩte wega, namo maũndũ mothe marĩa nyendaga gwĩka-rĩ, nomo ngeka.
• 11. Naguo ũndũ ũmwe wamo nĩ atĩ nĩngeta nyamũ ĩrĩ mathagu, ngoroku, yume mwena wa irathĩro, naguo ũguo nĩ ta kuuga atĩ nĩngeta mũndũ oime bũrũri wĩ kũraya, nĩguo eke maũndũ marĩa njirĩire gwĩka. Niĩ-rĩ, nĩnjugĩte ũguo, na nĩngaũhingia. Ti-itherũ niĩ nĩ niĩ njirĩire gwĩka ũguo, na ndirĩ hingo itakawĩka.
• 12. Ta ’thikĩrĩriai, inyuĩ andũ a ngoro nyũmũ, o inyuĩ mwĩ haraya mũno na ũhoro wa ũthingu,
• 13. atĩrĩrĩ, ũthingu wakwa nĩ kũrehe ngũũreharehe, ũhiũhe gũkinya; ndũkagondererio, o naguo ũhonokio wakwa ndũgaikaranga mũno. Ũhoro ũcio wa kũhonokanio-rĩ, ngawathĩrĩria Zayuni, o naguo riri wakwa wa ũrĩa njikagĩrĩrũo-rĩ, ngawathĩrĩria Isiraeli.

Home