Go Back

Isaia Chapter 44

1. No rĩrĩ, o na gwatuĩka nĩ ũguo-rĩ, ta igua, wee Jakubu, ndungata yakwa, o nawe Isiraeli ũrĩa ’thurĩte.
2. Jehova, o we ũrĩa wakũũmbire o na agĩtũma wĩthũnge ũrĩ o kũu nda ya nyũkwa, o we ũrĩa ũrĩgũteithagia, ekuuga ũũ: Atĩrĩrĩ, menya wĩtigĩre, wee Jakubu, ndungata yakwa, o nawe Jeshuruni, ũrĩa ’thurĩte.
3. Nĩ gũkorũo kũndũ kũrĩa kũnyotu nĩngagũitĩrĩria maĩ, o nakuo kũndũ kũrĩa kũũmũ thĩ nĩngagwĩkĩra njũĩ; naruo rũciaro rũaku nĩngarũitĩrĩria roho wakwa, o na ndathime ciana ciaku iria ũgaciara.
4. Nacio ikaingĩha o ta nyeki ĩkunũkĩte, kana ta mĩtĩ ya mũthemba ũrĩa ũkũraga hũgũrũrũ-inĩ cia njũĩ.
5. Na nĩhakagĩa mũndũ ũkuuga atĩrĩ, Niĩ ndĩ wa Jehova, nake ũngĩ eĩtanie na Jakubu, o nake ũngĩ eandĩke na guoko gwake atĩ nĩ wa Jehova, na etue rĩĩtwa rĩĩtanĩtio na Isiraeli.
6. Atĩrĩrĩ, Jehova, Mũthamaki wa Isiraeli, o na mũmũkũũri, o we Jehova Mũnene wa Ita, ekuuga ũũ: Niĩ nĩ niĩ wa mbere, na nĩ niĩ wa kũrigĩrĩria, na tiga niĩ gũtirĩ Ngai ũngĩ.
7. Nũ ũhaana ta niĩ? Ta nĩarekwo eyumĩrie; ta nĩarekwo onanie ũhoro auumbũre e mbere yakwa. Maũndũ marĩa magoka thutha-inĩ-rĩ, nũ waheanire ũhoro wamo o tene wa tene? Nĩarekwo oimbũre ũhoro wa maũndũ marĩa makiriĩ gũũka, o na marĩa magoka thutha-inĩ.
8. Tigai gwĩtigĩra, o na kana mũigue guoya. Githĩ ndiakĩmuumbũrĩire maũndũ kuuma o tene, o na ngĩmonania? Inyuĩ nĩ inyuĩ aira akwa. Anga nĩkũrĩ Ngai ũngĩ tiga niĩ? Ti-itherũ gũtirĩ Rũaro rũngĩ rũa Ihiga. Niĩ ndirĩ ũngĩ njũĩ.
9. Andũ othe arĩa mathondekaga mĩhianano ya gwacũhio-rĩ, matirĩ kĩene, o nacio indo ciao iria meriragĩria mũno, itirĩ kĩguni; o na ningĩ andũ arĩa marũmbũyagia ũhoro wayo-rĩ, matirĩ kuona monaga, o na kana makamenya ũndũ o na ũrĩkũ; ũguo nĩguo maconorithagio.
10. Nũ ũrĩ wethondekera ngai, o na kana ageturĩra mũhianano wa gũtwekio ũrĩa ũtarĩ kĩguni?
11. Atĩrĩrĩ, andũ othe arĩa macithingataga nĩmagaconorithio; o na ningĩ aruti wĩra ũcio-rĩ, githĩ to andũ? Rekei macokererio othe hamwe, maikare marũgamĩte; nĩmagetigĩra, na magaconoka othe hamwe.
12. Mũturi-rĩ, nĩathondekaga ithanwa, akarĩrutĩra wĩra akĩrĩcina na makara, akarĩtura na nyondo, o akĩrĩrutagĩra wĩra na guoko gwake kwa hinya; thutha wa ũguo mũndũ ũcio akahũta, akoorũo nĩ hinya, nake akaaga kũnyua maĩ, akaringĩka.
13. Mũtharamara o nake nĩ kũiga aigaga rũrigi rũa kũrũngaria mũhari, agacoka kũũkurura na karamu, naguo mũhianano ũcio egũthondeka-rĩ, akaũnyorokia wega na randa; o na ningĩ akaũthima gĩthiũrũrĩ, agacoka kũwacũhia wega nĩguo ũringane na mũhianĩre wa ũrĩa mũndũ atariĩ, o na ũringane na ũrĩa mũndũ athakarĩte, nĩguo ũtũũre nyũmba yaguo.
14. Na ningĩ-rĩ, etemagĩra mĩtarakwa, na agethurira mũkarakaba, na mũgandi, na akareka mũtĩ ũcio ũkũrakũre thĩinĩ wa mĩtĩ ya kĩrĩti; ningĩ akehandĩra mũthengera, nayo mbura ĩkaũkũria.
15. Thutha wa ũguo mũtĩ ũcio ũkaigana wa kuunwo ngũ, nake mũndũ ũcio agagĩkuua gĩcunjĩ kĩaguo agote, agaakia mwaki nakĩo, agathondeka mũgate; ningĩ agacoka gwĩthondekera ngai ya mũhianano, akamĩinamĩrĩra akamĩhoyaga. Ĩĩ, ti-itherũ agakĩũtua mũhianano mwacũhie akaũturagĩria ndu.
16. Gĩcunjĩ kĩmwe kĩaguo agaakia mwaki nakĩo, o nakĩo gĩcunjĩ kĩngĩ kĩaguo agakaranga nyama nakĩo akamĩrĩa; ĩĩ, ti-itherũ akahĩhia irio cia hĩhio, akahũna, ningĩ agota mwaki, agacoka kuuga atĩrĩ, Rĩu ndĩ kũigua ũrugarĩ nĩ kuona mwaki.
17. Nakĩo gĩcunjĩ kĩrĩa kĩngĩ gĩatigara, agagĩtua ngai yake, o mũhianano wake mwacũhie wa kũĩnamĩrĩrũo; gĩcunjĩ kĩu-rĩ, agagĩturagĩria ndu, o na agakĩinamĩrĩra akĩhoe, akiugaga atĩrĩ, ’Honokia, tondũ wee nĩwe ngai yakwa!
18. Matirĩ ũndũ moĩ o na kana mageciria; nĩ gũkorũo nĩamahingĩte maitho, makaaga kuona, o na akamahinga ngoro, makaaga kũmenya maũndũ.
19. Na rĩrĩ, gũtirĩ mũndũ ũkũririkana, o na kana akagĩa ũũgĩ, o na kana akamenya maũndũ, nĩguo oige atĩrĩ, Gĩcunjĩ kĩmwe kĩa mũtĩ ũyũ ndĩgĩcinĩte mwaki-inĩ, ngaruga mũgate na makara maguo, o na ngakaranga nyama, ngamĩrĩa; na rĩu-rĩ, gĩcunguruma kĩrĩa gĩatigara-rĩ, kaĩ ngũkĩhota atĩa gũgĩtua kĩndũ gĩa kũhoyũo kĩĩ magigi? Kaĩ ingĩkĩhota atĩa gũturĩria gĩcunguruma kĩa mũtĩ ndu?
20. Mũndũ ũcio-rĩ, nĩ ta gwĩtũũria egwĩtũũria muoyo na ũndũ wa kũrĩa mũhu, amu ngoro ĩrĩa ĩhenekete nĩyo ĩmũgarũrĩte, aremwo nĩ kwĩhonokia ngoro yake, o na kana kuuga atĩrĩ, Githĩ ti maheni ndĩ namo guoko-inĩ gwakwa kwa ũrĩo?
21. Atĩrĩrĩ, Jakubu, ta ririkana maũndũ macio; o nawe, Isiraeli-rĩ, ta maririkane, nĩ gũkorũo wee nĩwe ndungata yakwa; niĩ-rĩ, nĩ niĩ ndakũũmbire, na nĩwe ndungata yakwa. Wee Isiraeli-rĩ, ndikariganĩrũo nĩwe.
22. Mahĩtia maku nĩndĩmahuurĩte magathira biũ, o ta ũrĩa itu rĩa mbura rĩthimbaga, rĩgacoka kũũra, o namo mehia maku ngamanina, mathire o ta kĩbii. Coka harĩ niĩ, tondũ nĩngũkũũrĩte.
23. Atĩrĩrĩ, inyuĩ matu-mairũ, inai, nĩ gũkorũo Jehova nĩwe wĩkĩte ũndũ ũcio; o na inyuĩ ituri ciothe cia kũndũ kũrĩa kũriku thĩ-rĩ, anĩrĩrai. Inyuĩ irĩma o na inyuĩ-rĩ, itĩkai kũina, o nawe kĩrĩti hamwe na mĩtĩ yothe ĩrĩa ĩrĩ kũu thĩinĩ waku-rĩ, inai o na inyuĩ; tondũ Jehova nĩakũũrĩte Jakubu, o na ningĩ nĩ gũtũũra egũtũũra ekĩrĩirũo thĩinĩ wa Isiraeli.
24. Jehova o we ũrĩa wagũkũũrire, o na agĩtũma wĩthũnge ũrĩ o kũu nda ya nyũkwa, ekuuga ũũ: Atĩrĩrĩ, niĩ nĩ niĩ Jehova, mũũmbi wa indo ciothe, o na mũtambũrũkia matu-mairũ ndĩ o nyiki; o na ningĩ nĩ niĩ ndaaraganirie thĩ yothe ndĩ o nyiki; nũ ũkoragwo e hamwe na niĩ?
25. Nĩ niĩ ’hootaga ũragũri wa arĩa mahenanagia, o na ngagũrũkia aragũri; o na ningĩ nĩ niĩ njokagia andũ arĩa ogĩ na thutha, o naguo ũũgĩ wao ngaũtua ũkĩgu mũtheri;
26. nĩ niĩ njĩkagĩra ũhoro wa ndungata yakwa hinya, o na ngahingia kĩrĩra kĩa arekio akwa; naho ha ũhoro wa Jerusalemu ngoiga atĩrĩ, Itũũra rĩu nĩrĩgũtũũrũo; o naho ha ũhoro wa matũũra ma Juda ngoiga atĩrĩ, Nĩmegwakwo, o nakuo kũndũ gwakuo kũrĩa kwanangĩku, nĩngacoka gũgwaka.
27. O na ningĩ nĩ niĩ njĩraga kũrĩa kũrĩ maĩ mariku atĩrĩ, Hũai, o nacio njũĩ cianyu nĩngacihũithia;
28. o naho ha ũhoro wa mũthamaki ũrĩa wĩtagwo Kurusu, nĩ niĩ njugaga atĩrĩ, Nĩwe mũrĩithi wa mbũri ciakwa, na nĩwe ũrĩĩkaga maũndũ mothe marĩa nyendaga mekwo, o nginya akoiga ũhoro-inĩ wa Jerusalemu atĩrĩ, Nĩrĩgaakwo; o nayo hekarũ yarĩo akamĩĩra atĩrĩ, Gĩtina gĩaku nĩgĩkahandwo.

Home