Go Back

Isaia Chapter 42

• 1. Atĩrĩrĩ, ĩno nĩyo ndungata yakwa ĩrĩa ndiirĩrĩire; nĩyo ĩrĩa ndĩĩthurĩire, na nĩyo ĩkenagia ngoro yakwa: nĩndĩmĩikũrũkĩirie roho wakwa ũkamĩhuba, na nĩyo ĩkarehithĩrie ndũrĩrĩ cira wa kĩhooto.
• 2. Ndĩkaanĩrĩra, o na kana ĩhaicie kayũ kayo na igũrũ, o na kana ĩtũme mũgambo wayo ũiguwo njĩra-inĩ.
• 3. Kamũrangi kagondoku ndĩgakoina, o na kana rũtambĩ rũa ũguta rũgĩtoga ĩrũhorie. Nĩ gũtua ĩgatuanagĩra cira na ma.
• 4. Ndĩkahwererekera, o na kana yũme tha, o nginya hĩndĩ ĩrĩa ĩgakorũo ĩtũmĩte gũkũ thĩ kũgĩe cira wa kĩhooto; andũ arĩa matũũraga ithama-inĩ magaikaraga metereire watho wayo.
• 5. Ũguo nĩguo Jehova, Mũrungu witũ, ekuuga, o we ũrĩa wombire matu marĩa mairũ, o na akĩmatambũrũkia, na ningĩ nĩwe waaraganirie thĩ kũndũ guothe o na indo iria ciumaga kuo; ningĩ nĩwe ũrĩa ũheaga andũ arĩa matũire thĩ mĩhũmũ ya muoyo, nao andũ arĩa mathiangaga kuo akamahe roho.
• 6. Niĩ Jehova-rĩ, nĩ niĩ ngwĩtĩte o ta ũrĩa nyonaga kwerekereire, na nĩngakũnyita guoko, na ngũmenyagĩrĩre, na ngũheane nĩ getha ũtuĩke wa kũrĩkanĩra kĩrĩkanĩro na andũ, o na ũtuĩke ũtheri wa gũtherera andũ a ndũrĩrĩ;
• 7. o na ningĩ nĩ getha ũhingũrage maitho marĩa matumumu, nao andũ arĩa mohetwo ũmarutage kĩoho-inĩ, o nao arĩa maikarĩte nduma-inĩ-rĩ, ũmarutage korokoro-inĩ.
• 8. Niĩ nĩ niĩ Jehova; rĩu nĩrĩo rĩĩtwa rĩakwa; naguo riri wakwa wa ũrĩa njĩkĩrĩirũo-rĩ, ndingĩĩtĩkĩra kũhe ũngĩ, o na kana njĩtĩkĩre mĩhianano ya gwacũhio ĩheo rũgooco rũakwa.
• 9. Atĩrĩrĩ, maũndũ marĩa maarathagwo tene nĩmonekete makahingio, na rĩu nĩ maũndũ merũ nguumbũranĩra; na nĩngũmũhe ũhoro wamo o mbere matanaitĩka gũũka.
• 10. Atĩrĩrĩ, inyuĩ mũikũrũkaga mũgere iria-inĩ, o na indo ciothe iria irĩ kuo thĩinĩ, o nacio ithama, o na andũ arĩa macitũũraga-rĩ, inĩrai Jehova rũĩmbo rũerũ, o na mũmũgooce kuuma o gĩturi-inĩ gĩa thĩ.
• 11. Werũ o na matũũra makuo nĩihaicie mĩgambo yacio na igũrũ, o na tũtũũra tũrĩa andũ a Kedari matũũraga; andũ arĩa matũũraga Sela nĩmaine, na maanĩrĩre marĩ irĩma igũrũ.
• 12. Nĩmekĩrĩre Jehova na moimbũranĩre ithama-inĩ ũhoro wake makĩmũgoocaga.
• 13. Jehova akoimagara athiĩ o ta njamba ĩrĩ hinya; nake nĩakaarahũra andũ magĩe na kĩyo o ta mũndũ wa ita; kuugĩrĩria nĩakoigĩrĩria, o nakuo kwanĩrĩra aanĩrĩre mũno, na nĩageka maũndũ ma hinya mũno agĩũkĩrĩra thũ ciake.
• 14. Nĩ ihinda iraya ndũire ndĩĩkirĩire ki, ngaikara o ro ũguo, na ngegirĩrĩria gwĩka ũndũ o na ũrĩkũ. Rĩu nĩ gũkaya ngũkaya o ta mũndũ-wa-nja wĩ na ruo rũa kũrũmwo, o na ngacaya na mũtehũko.
• 15. Irĩma o na ithũngũri-rĩ, nĩngatũma ciikare o cianangĩkĩte, natuo tũmĩtĩ twacio tuothe tũrĩa tũigũ ndĩtũũmie; njũĩ iria irĩ kuo-rĩ, nĩngacihũithia ituĩke o thĩ nyũmũ, o natuo tũrĩa ndĩtũhũithie,
• 16. nao atumumu ndĩmagerie njĩra ĩrĩa matoĩ, o na ndĩmatongorerie tũcĩra tũrĩa matahũthiire kũgera, nayo nduma ĩrĩa ĩmatumanĩire, ndĩmĩgarũre ĩtuĩke ũtheri o kũu mbere yao, na ndĩmarũngarĩrie kũndũ kũrĩa kuogomu. Maũndũ macio nĩmo ngameka, na nditigithĩrie.
• 17. Andũ arĩa maikaraga mehokete mĩhianano ya gwacũhio nĩmakahũndũrũo, macokio na thutha; ĩĩ, itherũ, acio meraga mĩhianano ya gũtwekio atĩrĩ, Inyuĩ nĩ inyuĩ ngai ciitũ-rĩ, nĩmagaconorithio mũno.
• 18. Inyuĩ mũtaiguaga, ta iguai, o na inyuĩ atumumu-rĩ, ta cũthĩrĩriai nĩ getha muone.
• 19. Nũ mũtumumu, tiga o ndungata yakwa? O na kana nũ gĩtaigua ta mũrekio wakwa ũrĩa ndarekia? Nũ mũtumumu ta ũcio ngũũrĩte, na nũ mũtumumu ta ndungata ya Jehova?
• 20. Wee nĩwonaga maũndũ maingĩ, no ndũmarũmbũyagia. Matũ make nĩmakunũrĩtwo, no ndaiguaga.
• 21. Jehova nĩonire arĩ wega arũmie kĩrĩra kĩa watho nĩ getha gĩtũũre gĩikĩrĩirũo, nĩ ũndũ wa ũrĩa arĩ mũthingu.
• 22. No rĩrĩ, andũ aya nĩ atunye indo, o na magatahwo; othe manyitĩirũo na mĩtego marima-inĩ, na makahithwo nyũmba cia korokoro thĩinĩ. Matariĩ ta marĩ nyamũ cia kũgwĩmwo, na matirĩ na wa kũmahonokia; na magaikara marĩ atahe, na gũtirĩ wa kuuga ũũ: Nĩmacokio kwao.
• 23. Nũ thĩinĩ wanyu ũgũtegera ũhoro ũyũ gũtũ? Nũ ũgũthikĩrĩria aigue ũhoro wa hĩndĩ ĩrĩa ĩgoka?
• 24. Atĩrĩrĩ, ũrĩa wanenganĩrire Jakubu atahwo-rĩ, nũ? O nake Isiraeli-rĩ, nũ wamũnenganĩrire harĩ atunyani? Githĩ ti Jehova? O we ũrĩa ithuĩ twehirie, na andũ makĩrega gũthiĩ na njĩra ciake, kana gwathĩkĩra watho wake.
• 25. Tondũ ũcio nĩaamũitĩrĩirie mang’ũrĩka make, amũrakarĩire, na akĩmũkorerera na mĩtharĩko ya mbaara; agĩgĩkorererũo nĩ mang’ũrĩka macio ta marĩ mwaki ũgwakana na ndwere ciothe, no ndaamenyire gĩtũmi; ũgĩkĩmũcina, no ndaigana kũrũmbũiya ũndũ ũcio na ngoro yake.

Home