Go Back

Isaia Chapter 38

• 1. Na rĩrĩ, matukũ-inĩ o ro macio, Hezekia akĩrũara, agĩkuhĩhĩra gũkua. Nake Isaia miũnabii, mũrũ wa Amozu, agĩthiĩ agĩkinya harĩ we, akĩmwĩra atĩrĩ, Jehova oigĩte ũũ: Wĩgaĩre nyũmba yaku, nĩ ũndũ nĩũgũkua; ndũtũũra muoyo.
• 2. Nake Hezekia agĩkĩhũgũra ũthiũ, akĩũroria rũthingo-inĩ, akĩhoya Jehova,
• 3. akiuga atĩrĩ, Wee, Jehova, ndagũthaitha ũririkane ũrĩa ndũire ’thiaga mbere yaku nũmĩtie ũhoro-wa-ma, o na ngakũrũmĩrĩra na ngoro yakwa yothe, o na ngeka maũndũ marĩa monagwo marĩ mega nĩwe. Nake Hezekia akĩrĩra mũno.
• 4. Hĩndĩ ĩo ndũmĩrĩri ya Jehova ĩgĩgĩkinyĩrĩra Isaia, akĩĩrũo atĩrĩ,
• 5. Thiĩ ũkere Hezekia atĩrĩ, Jehova, Ngai wa thoguo Daudi, oiga ũũ: Nĩndaigua ihoya rĩaku, na nĩnyonete maithori maku. Na atĩrĩrĩ, nĩngũkuongerera matukũ maku mĩaka ikũmi na ĩtano.
• 6. Nawe, wee mwene, hamwe na itũũra rĩrĩ, nĩngũmũhonokia mũtikegwatĩrũo nĩ mũthamaki wa Ashuri; narĩo itũũra rĩrĩ, nĩngũrĩgitĩra.
• 7. Na rĩrĩ, gĩkĩ nĩkĩo gĩgũtuĩka kĩmenyithia harĩ wee kiumĩte he Jehova, atĩ Jehova nĩegwĩka ũndũ ũcio oigĩte:
• 8. Atĩrĩrĩ, nĩngũtũma kĩĩruru kĩrĩa kĩĩ hau matĩĩna-inĩ ma imenyithanĩrio-inĩ rĩa thaa rĩa Ahazu gĩcoke na thutha matĩĩna ikũmi macio kĩrĩkĩtie kũhĩtũka. Nakĩo kĩĩruru kĩu gĩkĩhũndũka na thutha matĩĩna ikũmi o macio kĩarĩkĩtie kũhĩtũka hau imenyithanĩrio-inĩ rĩa thaa.
• 9. Ũyũ nĩguo ũhoro ũrĩa Hezekia, mũthamaki wa Juda, aandĩkire aahona hĩndĩ ĩo aarĩ mũrũaru:
• 10. Niĩ nĩ kuuga ndoigire ũũ: O hĩndĩ ĩrĩa matukũ makwa maaigananĩria-rĩ, nĩguo ngũthiĩ ndonye ihingo-inĩ cia Kwa-Ngoma: Ndĩ mũtunye matigari ma mĩaka yakwa.
• 11. Ngĩkiuga atĩrĩ, Ndikona Jehova, o we wĩtagwo Jahu, ndĩ gũkũ thĩ kũrĩa andũ matũũraga me muoyo: Ndigagĩcoka kuona mũndũ wa gũkũ thĩ o na rĩ, ndĩ hamwe na acio marĩkĩtie gũkua.
• 12. Ũtũũro wakwa nĩ mũthamie; nĩ gũkuuwo ũkuuĩtwo ngehererio, o ta ũrĩa hema ya mũrĩithi ĩthamagio. Muoyo wakwa nĩ gũkũnja ndaũkũnja ta ũrĩ tama wa mũndũ ũrĩa ũũtumaga na mũtambo, na rĩu nĩ gũtinia ekũũtinia anjeherie mũtambo-inĩ ũcio wake: Kwarĩkia gũkĩa-rĩ, nĩ kũ’nina ũka’nina mũthenya o ro ũcio gũtanatuka.
• 13. Ndaikarire ndĩĩkirĩire o ro ũguo o nginya rũcinĩ; o ta ũrĩa mũrũthi wĩkaga-rĩ, noguo ekuunanga mahĩndĩ makwa mothe: Kwarĩkia gũkĩa-rĩ, nĩ kũ’nina ũka’nina mũthenya o ro ũcio gũtanatuka.
• 14. O ta ũrĩa thũngũrũrũ ĩgambaga, kana mũrũaru-rĩ, ũguo noguo niĩ na niĩ ndĩraaragia na mũgambo mũceke: Nĩ gũcakaya ndĩracakayaga ta ndutura; maitho makwa nĩmaranoga nĩ gũcũthĩrĩria igũrũ. Ĩiya, Jehova, ndĩ mũhinyĩririe-ĩ! Ndagũthaitha ũtuĩke mũndũgamĩrĩri.
• 15. Hĩ! Ngũkiuga atĩa? We mwene nĩanjarĩirie, nake we mwene agacoka kũhinga ũndũ ũcio anjĩrĩire: Ngũtũũra ndĩĩkirĩire mĩaka yakwa yothe nĩ ũndũ wa ũrũrũ ũrĩa wĩ ngoro yakwa.
• 16. Atĩrĩrĩ, Jehova, maũndũ ta macio nomo mũndũ wa gũkũ thĩ atũũraga onaga e muoyo; Roho wakwa naguo ũtũũraga wonaga o maũndũ macio kĩũmbe. Tondũ ũcio ’honia, ũndũũrie muoyo.
• 17. Atĩrĩrĩ, ũrũrũ wa ngoro ũcio ndĩrarĩ naguo mũnene-rĩ, warĩ wa gũtũma njoke kũgĩa na thayũ: No tondũ wa ũrĩa wendete roho wakwa-rĩ, nĩũũhonoketie ndũkarike irima rĩa woru; Nĩ gũkorũo mehia makwa mothe nĩũmaikĩtie na thutha waku.
• 18. Nĩ ũndũ Kwa-Ngoma gũtingĩkũgatha, o nakĩo gĩkuũ gĩtingĩhota gũkũ gooca: Andũ arĩa maikũrũkaga magatonya irima-inĩ rĩu matingĩhota kwĩrĩgĩrĩra ũhoro waku wa ma.
• 19. Mũndũ ũrĩa ũrĩ muoyo, o we ũrĩa ũrĩ muoyo-rĩ, ũcio nĩwe ũrĩkũgathaga o ta ũrĩa niĩ ndĩreka ũmũthĩ: Ningĩ ithe wa ciana nĩwe ũrĩcimenyithagia ũhoro waku wa ma.
• 20. Jehova nĩethagathagĩte a’honokie: Tondũ ũcio tũrĩinagĩra nyĩmbo ciakwa na inanda cia mũgeto Kũu nyũmba ya Jehova thĩinĩ matukũ mothe marĩa tũgũtũũra muoyo.
• 21. Na rĩrĩ, Isaia agĩgĩkorũo nĩoigĩte ũũ: Andũ nĩmoe gĩkũmba kĩa ngũyũ makĩigĩrĩre ihũha-inĩ rĩake kĩrĩhumbe, na nĩekũhona.
• 22. O nake Hezekia nĩorĩtie atĩrĩ, Kĩmenyithia nĩ kĩrĩkũ gĩa atĩ nĩngaambata nginye nyũmba ya Jehova?

Home