Go Back

Isaia Chapter 36

• 1. NA RĨRĨ, mwaka wa ikũmi na ĩna ĩrĩa Hezekia, mũthamaki, aakorirũo athamakĩte-rĩ, Senakeribu, mũthamaki wa Ashuri, nĩaambatire akahũrane na matũũra mothe marĩa maairigĩtwo ma Juda, akĩmatunyana.
• 2. Nake mũthamaki wa Ashuri akĩrekia Rabishake, oime Lakishi akinye Jerusalemu he Hezekia, arĩ na mbũtũ nene ya ita. Nake Rabishake agĩkĩrũgama mũtaro-inĩ wa karia karĩa ka rũgongo igũrũ, o karĩa karĩ njĩra-inĩ ya gĩtwari ĩrĩa ĩgereire gĩthaka kĩa mũthambia nguo.
• 3. Na rĩrĩ, hĩndĩ ĩo Eliakimu wa Hilikia, ũrĩa warĩ mũrori wa maũndũ mothe ma nyũmba ya mũthamaki, magĩthiĩ harĩ we me na Shebina, mwandĩki-marũa, na Joa wa Asafu, mwandĩki wa maũndũ ma ihinda rĩu.
• 4. Nake Rabishake akĩmera atĩrĩ, Thiĩi mwĩre Hezekia ũũ: Atĩrĩrĩ, mũthamaki ũrĩa mũnene, o we mũthamaki wa Ashuri, aakũũria atĩrĩ, Mwĩhoko ũyũ ũtũire wĩhokete nĩ ũrĩkũ hihi?
• 5. Niĩ nguuga ũũ: Ũtaarani ũrĩa ũtaaragwo, o na hinya ũrĩa uugaga wĩ naguo wa kũrũa mbaara, no ciugo cia tũhũ. Rĩu-rĩ, mũndũ ũrĩa wĩhokete nĩ getha ũneme-rĩ, nĩ ũrĩkũ?
• 6. Atĩrĩrĩ, wee wĩhokete atĩ nĩũgwĩtirimia na kamũrangi kau kagondoku, nako nĩko Misiri, na rĩrĩ, mũndũ angĩĩtirimia nako kaamũtheca rũhĩ karũtũrĩkie; ũguo nĩguo Firauni, mũthamaki wa Misiri, atariĩ harĩ andũ othe arĩa mamwĩhokaga.
• 7. No mũngĩnjĩra ũũ: Ithuĩ twĩhokete Jehova Ngai witũ-rĩ, githĩ ũcio tiwe Hezekia aatharirie matĩri make ma kũndũ gũtũũgĩru, o na igongona ciake, na agĩcoka akĩĩra Juda na Jerusalemu ũũ: Mũrĩhoyagĩra Ngai mbere ya kĩgongona gĩkĩ?
• 8. Na tondũ ũcio ta kĩgĩe na karĩko na mwathi wakwa, mũthamaki wa Ashuri; na niĩ ngĩkũhe mbarathi ngiri igĩrĩ, ũngĩgĩkorũo wee mwene haku wakĩhota kwĩonera acihaici.
• 9. Rĩu ũngĩkĩmaaga-rĩ, wakĩhota atĩa gũtũma ũmwe wa anene arĩa anyinyi mũno a athigari aitũ, ithuĩ ndungata cia mwathi wakwa, ahutate ore? Na ũtũire wĩhokaga Misiri nĩguo ũteithio na ngari cia ita, o na andũ arĩa mathiaga mahaicĩte mbarathi?
• 10. Kaĩ mũgwĩciria atĩ nyambatĩte ’hũrane na kũndũ gũkũ ndĩkũnine Jehova atarĩ ũhoro-inĩ ũcio? Jehova nĩwe wanjĩrire atĩrĩ, Ambata ũthiĩ ũkahũre bũrũri ũcio, ũũnine biũ.
• 11. Hĩndĩ ĩo Eliakimu, na Shebina, na Joa, magĩkĩĩra Rabishake ũũ: Twagũthaitha, aria na ithuĩ ndungata ciaku na rũthiomi rũa Suriata, nĩ ũndũ nĩtũkũrũigua; no tiga gũtwarĩria na rũthiomi rũa Ayahudi, andũ aya maikarĩte rũthingo-inĩ igũrũ makĩiguaga.
• 12. No Rabishake agĩcokia atĩrĩ, Kaĩ mũgwĩciria atĩ mwathi wakwa aakĩndekirie harĩ mwathi wanyu, o na harĩ inyuĩ, nĩguo ndĩmũhe ũhoro ũyũ, na ndandekie harĩ andũ aya maikarĩte rũthingo-inĩ igũrũ, o aya makarĩa mai mao o ene, na manyuage mathugumo mao me rũmwe na inyuĩ?
• 13. Hĩndĩ ĩo Rabishake akĩrũgama, akĩanĩrĩra na mũgambo mũnene, akĩaria na rũthiomi rũa Ayahudi, akiuga atĩrĩ, Inyuĩ ta iguai ũhoro wa mũthamaki ũrĩa mũnene mũno, o we mũthamaki wa Ashuri.
• 14. Mũthamaki ũcio oigĩte ũũ: Menyai mũreke Hezekia amũhenie, nĩ ũndũ ndehota kũmũhonokia
• 15. o na ningĩ menyai mũreke Hezekia atũme mwĩhoke Jehova, akiuga ũũ: Ti-itherũ Jehova nĩegũtũhonokia, narĩo itũũra rĩrĩ rĩtineanwo moko-inĩ ma mũthamaki wa Ashuri.
• 16. Tigai kũigua ũhoro ũrĩa mũkũheo nĩ Hezekia; nĩ gũkorũo mũthamaki wa Ashuri oiga atĩrĩ, Ta rekei tware ũhoro na inyuĩ kũgĩe thayũ, na muume kũu mũrĩ, mũũke harĩ niĩ, na mũndũ o mũndũ atũũre arĩaga thabibu cia mũthabibu wake, o na ngũyũ cia mũkũyũ wake, na ningĩ inyuothe o mũndũ anyuage maĩ ma irima rĩake kĩũmbe,
• 17. o nginya rĩrĩa ngoka kũmũiyĩra ndĩmũtware bũrũri ũtariĩ o ta bũrũri ũyũ wanyu, naguo nĩ bũrũri wĩ ngano, o na ndibei, na wĩ irio, o na mĩgũnda ya mĩthabibu.
• 18. Wĩmenyererei Hezekia ndakamũringĩrĩrie akiuga atĩrĩ, Jehova nĩegũtũhonokia. Rĩu-rĩ, he ngai o na ĩmwe, thĩinĩ wa ngai cia ndũrĩrĩ, ĩrĩ yahonokia bũrũri wayo o na rĩ, ĩkĩũruta moko-inĩ ma mũthamaki wa Ashuri?
• 19. Hĩ! Ngai cia Hamathu-rĩ, ikĩrĩ ha rĩu? Ĩ cia Aripadi, na cia Sefarivaimu? Ngai icio-rĩ, nĩciahonokirie Samaria ndikarĩĩgwatĩre?
• 20. Nĩ ngai irĩkũ thĩinĩ wa ngai ciothe cia mabũrũri mothe irĩ ciahonokia bũrũri wacio, ndikawĩgwatĩre, atĩ nĩkĩo mũgwĩciria atĩ Jehova aahonokia Jerusalemu, ndikarĩĩgwatĩre?
• 21. No rĩrĩ, no gũkira maakirire ki, na matiigana kũmũtumũka, nĩ gũkorũo mũthamaki aathanĩte ũũ: Mũtikamũcokerie ũndũ.
• 22. Hĩndĩ ĩo Eliakimu wa Hilikia, mũrori wa maũndũ mothe ma nyũmba ya mũthamaki, na Shebina, mwandĩki-marũa, na Joa wa Asafu, mwandĩki wa maũndũ ma ihinda rĩu, magĩthiĩ magĩkinya kwĩ Hezekia, matembũrangĩte nguo ciao, makĩmũhe ũhoro ũcio Rabishake oigĩte.

Home