Go Back

Isaia Chapter 33

• 1. ATĨRĨRĨ, wee wananganaga, nawe wee mwene ndwanangĩtwo, o na ningĩ ũkagarũkana na ũrĩa-ng’ũũrũ, nawe wee mwene ndũgarũkĩtwo na ũrĩa-ng’ũũrũ, kaĩ wĩ na haaro-ĩ! Hĩndĩ ĩrĩa ũgakorũo ũtigĩte kwanangana-rĩ, nĩguo nawe ũkagwata kwanangwo, na ningĩ hĩndĩ ĩrĩa ũgakorũo ũtigĩte kũgarũkana na ũrĩa-ng’ũũrũ-rĩ, nĩguo nawe ũkagwata kũgarũkwo na ũrĩa-ng’ũũrũ.
• 2. Atĩrĩrĩ, wee Jehova, tũiguĩre tha. Wee nĩwe tũikaraga tũcũthĩrĩirie; twagũthaitha ũtuĩke guoko gwa kũgitĩra andũ aku marũcinĩ mothe, o na ũtuĩke mũtũhonokia mahinda marĩa twĩ na thĩna.
• 3. Tondũ wa inegene rĩa ngũĩ-rĩ, andũ nĩ kũũra morĩte, na tondũ wa ũrĩa warahũkĩte, ndũrĩrĩ nĩ kũharagania iharaganĩtie.
• 4. Indo cianyu iria mũgakorũo mũtahĩtwo nĩĩgacokererio itahwo o ta ũrĩa igunyũ ciũngũrũragia; na rĩrĩ, o ta ũrĩa ngigĩ irũũgaga, ũguo noguo andũ makarũũgĩrĩra indo icio cianyu.
• 5. Jehova nĩwe mũtũũgĩrie, nĩ gũkorũo atũũraga igũrũ, narĩo Zayuni nĩarĩiyũrĩtie ũtuanĩri cira na kĩhooto, o na ũthingu.
• 6. Namo matukũ-inĩ maku-rĩ, maũndũ nĩmagaikara marũmĩte wega, na kũgĩe ũhoro mũingĩ wa kũhonokanio, na ũũgĩ, na ũmenyi maũndũ; naguo ũhoro wa gwĩtigĩra Jehova ũikare o ta arĩ mũthithũ wakuo wĩ bata.
• 7. Atĩrĩrĩ, njamba ciakuo iraanĩrĩra irĩ nja, o nao andũ arĩa maarekirio makaare ũhoro wa thayũ nĩ kũrĩra mararĩra na kĩgi.
• 8. Ningĩ njĩra cia gĩtwari nĩitirikĩtwo, na agendi makaaga gũcoka kuonwo; ĩĩ, ti-itherũ, nĩathũkĩtie kĩrĩkanĩro kĩrĩa kĩarĩkanĩirũo, namo matũũra nĩamamenete, na ndarĩ mũndũ arũmbũyagia ũhoro wake.
• 9. Thĩ nĩ kuonwo ĩkuonwo ta ĩgwatĩtwo nĩ kĩeha na ĩkaaga hinya wa gũciara maciaro mayo; nakuo kũu Lebanoni gũgaikara ta gũconorithĩtio, nayo mĩtĩ yakuo ĩkahoha. Sharoni nakuo-rĩ, gũtariĩ o ta werũ mũtheri; naho ha ũhoro wa Bashani na Karimeli-rĩ, mĩtĩ yakuo nĩ mĩribaribĩku mathangũ mayo.
• 10. Rĩu nĩ kwarahũka ngwarahũka; ũguo nĩguo Jehova ekuuga. Rĩu nĩ hĩndĩ ngwĩambararia na igũrũ, ningĩ rĩu nĩ hĩndĩ ngũtũũgĩrio o gũtũũgĩrio.
• 11. Inyuĩ mũkagĩa ihu rĩa nyeki nyũmũ, mũcoke mũciare itira cia ngano; mĩhũmũ yanyu nĩyo mwaki ũrĩa ukamũrĩa inyuene, ũmũnine biũ.
• 12. Nacio ndũrĩrĩ igaikara o ta cokaa hĩndĩ ĩrĩa ũcinĩtwo na mwaki, o na ta mĩigua ĩtemetwo, ĩgacinwo na mwaki.
• 13. Atĩrĩrĩ, inyuĩ arĩa mũrĩ kũraya, ta thikĩrĩriai mũigue ũrĩa njĩkĩte o na inyuĩ arĩa mũrĩ gũkuhĩ-rĩ, ta umbũranĩrai ũhoro wa hinya wakwa.
• 14. Ehia arĩa marĩ Zayuni nĩ gwĩtigĩra maretigĩra, o nao andũ arĩa matarũmbũyagia Ngai makagwatwo nĩ kĩinaino, makoiga atĩrĩ, Nũ witũ ũngĩtũũrania na mwaki ũyũ ũrĩanaga ũkaninana biũ? Ningĩ-rĩ, nũ witũ ũngĩtũũrania na mwaki ũyũ ũtarĩ hĩndĩ ũhoraga?
• 15. Nĩ mũndũ ũthiaga na mĩthiĩre ya ũthingu, na akaaria ndeto cierekereire, o we ũrĩa ũtangĩamũkĩra uumithio uumanĩte na kũhinyanĩrĩria, na ũrĩa ũgiragĩrĩria moko make kwamũkĩra ihaki, na gũtũ gwake akagiria kũigue ndeto cia ũũragani, namo maitho make akamahinga matikarore maũndũ moru.
• 16. Ũcio nĩwe ũgatũũra handũ hatũũgĩru, nacio ndwaro-inĩ cia mahiga-rĩ, nĩkuo akona ha kwĩhonokeria; nĩakaheagwo irio ciake, namo maĩ make matikaaga.
• 17. Atĩrĩrĩ, maitho maku-rĩ, nĩmakeyonera mũthamaki arĩ na riri wake wothe, na mone bũrũri waramĩte ũkaneneha mũno.
• 18. Ngoro yaku nĩĩgeciragia ũhoro wa gũtebebania kũrĩa kũrarĩ ho, yuge atĩrĩ, Rĩu-rĩ, mũndũ ũrĩa ũrataraga indo akĩrĩ ha? Ĩ mũndũ ũrĩa ũrathimaga mĩhothi o nake-rĩ, akĩrĩ ha? Nake mũndũ ũrĩa ũrataraga mĩthiringo ya nyũmba iria ndaya na igũrũ-rĩ, akĩrĩ ha rĩu?
• 19. Ndũgacoka kuona andũ a rũng’athio acio mathiomaga thiomi irĩ hinya ũtangĩcimenya, na magatondoira na mwarĩrie ũrĩa ũtangĩhota kũigua.
• 20. Ta rora Zayuni, itũũra riitũ rĩa ciathĩ iria ciathanĩtwo. Maitho maku nĩmakona atĩ Jerusalemu rĩtuĩkĩte kũndũ kũrĩa mũndũ angĩhota gũikara ahoreire, o na rĩgatuĩka ta hema ĩrĩa ĩtangĩcoka gũthamio, kana nyambo ciayo imunyũo o na atĩa, o na kana mũhĩndo o na ũmwe wayo ũtuĩke.
• 21. No rĩrĩ, kũu nĩkuo Jehova agakorũo arĩ hamwe na ithuĩ e na ũkaru wake, atuĩkĩte ta arĩ we kũndũ gwitũ kwa njũĩ njariĩ na tũrũũĩ, o njũĩ iria itangĩgerio merĩ cia mbaara, kana igerio marikabu iria nene cia iria-inĩ.
• 22. Nĩ gũkorũo Jehova nĩwe mũtũcirĩri, na nĩwe mũtwathi; Jehova nĩwe mũthamaki witũ, na nĩwe ũgatũhonokia.
• 23. Hĩ! Mĩhĩndo yaku nĩĩraregerio-ĩ! Andũ nĩ kũremwo maremetwo nĩ kũrũmia mũtĩ ũrĩa mũraya wa marikabu yao o gĩtina-inĩ kĩaguo, na makaremwo nĩ gũtambũrũkia matama ma kũmĩtwara. Hĩndĩ ĩo nĩguo indo nyingĩ cia ndaho ciagayanirũo, o na andũ arĩa mathuaga no magetahĩra indo.
• 24. Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru; nao andũ arĩa matũũraga kuo nĩmakoherũo ũũru wao.

Home