Go Back

Isaia Chapter 32

• 1. ATĨRĨRĨ, nĩgũkagĩa mũthamaki wa gũthamaka na ũthingu, na kũgĩe anene a gwathana na kĩhooto,
• 2. ningĩ hagĩe mũndũ wa gũtuĩka ta handũ ha kwĩhitha rũhuho, o na ta handũ ha kwĩũa mbura ya kĩhuhũkanio, na atuĩke o ta njũĩ cia maĩ irĩ kũndũ kũũmũ, o na ta kĩĩruru kĩa rũaro rũa ihiga inene rĩrĩ werũ mũhĩnju.
• 3. Namo maitho ma arĩa monaga matigacoka gũtuĩka ta mairang’a, kana matũ ma arĩa maiguaga magĩe njiika.
• 4. Ningĩ ngoro ya mũndũ ũrĩa ũhĩkaga gwĩka maũndũ make atecirĩtie wega-rĩ, nĩĩkamenya maũndũ ma ũũgĩ, o naruo rũrĩmĩ rũa arĩa matondoiraga nĩrũgaitĩka kwaria o wega.
• 5. Mũndũ mũkarĩ ndagacoka gwĩtwo muuma-andũ, o na kana mũndũ ũrĩa ũrĩ na ruo na ciake akĩheana erũo atĩ nĩ mũtana.
• 6. Nĩ gũkorũo ũrĩa mũkarĩ agaikara akĩaragia maũndũ moimanĩte na ũkarĩ, na ngoro yake ĩthuguudage waganu, na ĩtũmage athahie Ngai, na acambagie Jehova, nacio ngoro cia andũ arĩa ahũtu ĩtũme itigwo ũtheri, o na kĩndũ kĩrĩa andũ arĩa anyotu mangĩnyua kĩage.
• 7. Mũthiĩre wa mũndũ ũrĩa wĩ ruo na ciake nĩ wa ũũru mũtheri, amu athugundaga o maũndũ ma waganu nĩguo aninithie andũ arĩa ahoreri na ndeto cia maheni, o na hĩndĩ ĩrĩa ngĩa ĩkwaria ũhoro-wa-ma.
• 8. No rĩrĩ, mũndũ muuma-andũ eciragia o maũndũ ma ũtugi; namo maũndũ macio ma gũtugana nĩmo egũtũũra ekaga.
• 9. ATĨRĨRĨ, inyuĩ andũ-a-nja aya mũtarĩ ũndũ o na ũrĩkũ mũthĩnĩkagĩra, ta ũkĩrai mũigue mũgambo wakwa; o na inyuĩ airĩtu aya mũtarĩ ũndũ mwĩtigagĩra-rĩ, ta tegai matũ mũigue ũrĩa nguuga.
• 10. Tondũ rĩrĩ, inyuĩ atumia aya mũtarĩ ũndũ mwĩtigagĩra, mwaka na matukũ matarĩ maingĩ maathira-rĩ, nĩmũkanyarirĩka; nĩ gũkorũo kĩmera kĩa mĩthabibu nĩgĩkora, na magetha maage.
• 11. Atĩrĩrĩ, inyuĩ andũ-a-nja aya mũtarĩ ũndũ o na ũrĩkũ mũthĩnĩkagĩra, ta inainai, na mũnyarirĩke inyuĩ mũtarĩ ũndũ mwĩtigagĩra. Wĩaũrei nguo mũtigwo njaga, mũcoke mwĩohe matama ma makũnia njohero.
• 12. Hĩndĩ ĩo andũ nĩmakehũra ithũri makĩrĩrĩra mĩgũnda yao ĩrĩa mĩega, o na mĩthabibu ĩrĩa ĩraciaraga mũno.
• 13. Kũu bũrũri wa andũ akwa nĩgũkamera mĩigua na cong’e; ũguo noguo kũndũ guothe gũgatuĩka kũrĩa kwĩ nyũmba ikenagĩrũo itũũra-inĩ rĩrĩa rĩrĩ ironja rĩa ndũrũhĩ.
• 14. Nĩ gũkorũo nyũmba ya athamaki nĩĩgathamwo, na itũũra rĩrĩa rĩiyũrĩte andũ rĩtigwo o ro ũguo rĩtarĩ andũ, o na kũndũ kũrĩa gũtũũgĩru gwĩtagwo Ofeli, o na mũthiringo wa nyũmba ndaya na igũrũ wa arangĩri, gũtũũre kwĩ ngurunga cia nyamũ tene na tene, o na gũtuĩke gwa gũtũhagwo nĩ njagĩ cia werũ, o na kũrĩithagio ndũru cia mbũri;
• 15. o nginya hĩndĩ ĩrĩa tũgaikũrũkĩrio roho uumĩte igũrũ, naguo werũ ũtarĩ kĩndũ ũtuĩke ta mũgũnda ũciaraga maciaro maingĩ, na mũgũnda ũrĩa ũciaraga irio mũno ũikare ta kĩrĩti.
• 16. Hĩndĩ ĩo cira ũgatũũra ũtuagĩrũo na kĩhooto werũ-inĩ, na ũthingu ũrũmio kũu mũgũnda ũcio ũciaraga maciaro maingĩ.
• 17. Na rĩrĩ, ũndũ ũrĩa ũkoimana na ũthingu ũcio nĩ thayũ mũtheri, o namo maũndũ marĩa makoneka moimanĩte naguo nĩ atĩ andũ matũũre mahoreire gũtarĩ ũgwati tene na tene.
• 18. Ti-itherũ andũ akwa marĩtũũraga ciikaro-inĩ cia thayũ, matũũre matarĩ ũgwati, na mahurũkage kũndũ gũtarĩ muugio.
• 19. No rĩrĩ, kĩrĩti gĩkoinwo na mũrurumo, na itũũra rĩhomio o kũhomio biũ.
• 20. Gũkena-rĩ, nĩ inyuĩ, tondũ mũkahandaga ngiki-inĩ cia maĩ kũndũ guothe, na mũgeragĩrie ndegwa na ndigiri cianyu kuo.

Home