Go Back

Isaia Chapter 29

• 1. ATĨRĨRĨ Arieli, o wee Arieli, itũũra rĩrĩa Daudi aambire hema ciake! Rekei mwaka ũngĩ wĩongerere harĩ ũyũ tũrĩ, o ciathĩ cianyu ikĩgomanagwo,
• 2. na thutha wa ũguo ’nyarire Arieli, na kũgĩe kĩeha na kĩrĩro; no ndĩrĩikaraga ndĩrĩtuĩte o Arieli o na hĩndĩ ĩo.
• 3. Ngaamba hema ciakwa na mĩena yaku yothe ngũtharĩkĩre, ningĩ ngũrigicĩrie na irũndo cia tĩri cia mũtharĩko; ti-itherũ nĩngakũrũndĩra ihumbu cia tĩri ngũtharĩkĩre.
• 4. Nawe nĩũgatungumanio na thĩ, ũcoke kwaria na mĩheehũ wĩ thĩ tĩri-inĩ, ũkĩng’ung’uagĩra o hau ũrĩ thĩ, ningĩ mũgambo waku ũtuĩke ta wa mũndũ wĩ na roho ũkũragũra, ũrĩa ũiguagwo ta ũkuuma tĩri-inĩ; ũguo noguo mũgambo waku ũkaiguwo ũkĩaria wĩ mũceke uumĩte thĩ.
• 5. No rĩrĩ, kĩrĩndĩ gĩa thũ ciaku gĩgatuĩka o ta rũkũngũ rũhinyu, na kĩrĩndĩ kĩa arĩa me itua-nda gĩtuĩke o ta mũũngũ ũrĩa ũũmbũragwo wĩ gĩtarũrũ-inĩ. Ti-itherũ ũndũ ũcio ũkoneka na mbũkĩrĩra,
• 6. tondũ Jehova Mũnene wa Ita agakorerera itũũra rĩu na marurumĩ, na gĩthingithia gĩa thĩ, na mũrurumo mũnene, na rũhuho rũnene mũno rũa ngoma-cia-aka, na kĩhuhũkanio kĩnene kĩa rũhuho, o na rũrĩrĩmbĩ rũa mwaki ũkũninana.
• 7. Nakĩo kĩrĩndĩ kĩa ndũrĩrĩ ciothe kĩrĩa gĩkahũrana na Arieli, o arĩa othe arĩa makahũrana na itũũra rĩu na kĩhingo kĩarĩo, me hamwe na arĩa magakorũo makĩrĩnyarira-rĩ, makabuĩria o ta kĩroto, o na ta kĩoneki gĩa ũtukũ.
• 8. Na nĩgũgatuĩka o ta ũrĩa kuonekaga rĩrĩa mũndũ mũhũtu ekũrota akeona ta ekũrĩa irio, na okĩra agakorũo arĩ o mũhũtu; o na gũtuĩke o ta ũrĩa kuonekaga rĩrĩa mũndũ mũnyotu ekũrota akeona ta ekũnyua maĩ, na okĩra agakorũo arĩ o mũringĩku, na ngoro yake ĩkerirĩria gĩa kũnyua; ũguo noguo gũkoneka kĩrĩndĩ-inĩ kĩu kĩa ndũrĩrĩ ciothe kĩrĩa gĩgatharĩkĩra kĩrĩma gĩa Zayuni.
• 9. Ta ikarai mũgegete, na mũkamaka; ta wĩtuei atumumu, na mũikare mũtarĩ ũndũ mũkuona. Andũ akuo nĩ kũrĩwo marĩĩtwo, no rĩrĩ, ti ndibei ĩmarĩĩte; nĩmaratũgũga, no ti kũnyua njohi ndũrũ.
• 10. Nĩ ũndũ Jehova nĩamũgonetie na ũndũ wa kũmũikũrũkĩria roho wa gũtũma mũkome toro mũnene mũno, na akamũhinga maitho, namo nĩmo anabii anyu, nĩngĩ akamũhumba mĩtwe, nayo nĩyo oni anyu a maũndũ.
• 11. Naguo ũguũranĩria wa maũndũ na kĩoneki ũtuĩkĩte o ta marũa mahingĩtwo magacinĩrĩrũo rũũri, o marĩa andũ matwaragĩra mũndũ ũrĩa ũũĩ gũthoma, makamwĩra atĩrĩ, Ta tũthomere marũa maya, nake akoiga atĩrĩ, Aca, ndingĩhota, nĩ ũndũ nĩmahingĩtwo magacinĩrĩrũo rũũri;
• 12. ningĩ magacoka magatwarĩrũo mũndũ ũtoĩ gũthoma, akerũo atĩrĩ, Ta thoma marũa maya, nake akoiga atĩrĩ, Niĩ ndiũĩ gũthoma.
• 13. Nake Mwathani agakiuga atĩrĩ, Kuona atĩ andũ aya mathengagĩrĩra harĩ niĩ makandĩa na tũnua o na mĩromo yao, no ngoro ciao magacitwara haraya na niĩ, o na ũhoro wao wa kwĩĩndigĩra no wathani wa andũ ũrĩa merutĩte,
• 14. ũrĩa ngeka nĩ atĩrĩ, nĩ gwĩka ngeka ũndũ wa kũgegania thĩinĩ wa andũ aya, naguo ũtuĩke wa kũgegania o kũgegania biũ, o na wa kũmakania mũno; naguo ũũgĩ wa andũ ao arĩa ogĩ nĩũgathira biũ, o naguo ũmenyo wa andũ ao arĩa meciragia wega maũndũ nĩũkahithwo.
• 15. Hĩ! Kaĩ andũ arĩa mekagĩra kĩyo kũhitha Jehova maũndũ ma ndundu ciao marĩ na haaro-ĩ, o acio marutagĩra mawĩra mao nduma-inĩ, makoiga atĩrĩ, Nũ ũgũgĩtuona? Na nũ ũngĩgĩtũmenya?
• 16. Nĩ kũinamania mũinamanagia maũndũ. Githĩ mũũmbi aakĩigananio na rĩũmba, o nginya kĩndũ kĩrĩa kĩombirũo kĩĩre mũkĩũmbi ũũ: Ũcio ndaigana kũnyũmba; o na kana hihi kĩndũ kĩrĩa gĩthondeketwo kĩĩre mũgĩthondeki atĩrĩ, Ũcio ndarĩ ũũgĩ wa kũmenya maũndũ?
• 17. Githĩ ti kahinda kanini gatigarĩte Lebanoni kũgarũrũo gũtuĩke mũgũnda ũciaraga maciaro maingĩ, naguo mũgũnda ũrĩa ũciaraga maciaro maingĩ ũtuwo ta kĩrĩti?
• 18. Mũthenya ũcio-rĩ, andũ arĩa morĩte matũ nĩmakaigua mohoro ma ibuku, o namo maitho ma atumumu matige kuona na mairia o na nduma.
• 19. Andũ arĩa ahoreri-rĩ, makeyongagĩrĩra ũhoro wa gũkenera Jehova, o nao andũ a gũkũ thĩ arĩa athĩni makenagĩre Ũrĩa Mũtheru wa Isiraeli.
• 20. Nĩ gũkorũo mũndũ ũrĩa wĩ itua-nda nĩatuĩtwo kĩndũ hatarĩ, o nake ũrĩa mũtendi agathenga, o nao andũ othe arĩa maikaraga mehaarĩirie mageke maũndũ ma waganu makarindũrũo,
• 21. o acio matũmaga mũndũ atuwo mwĩhia nĩ kũmũhotomeria ciugo ciake, na makahĩtithia ũrĩa ũikaraga kĩhingo-inĩ agĩtuanĩra cira, o na makaagithia mũndũ mũthingu kĩhooto.
• 22. Tondũ ũcio, ha ũhoro wa nyũmba ya Jakubu-rĩ, Jehova ũrĩa wakũũrire Iburahimu ekuuga ũũ: Atĩrĩrĩ, rĩu Jakubu ndagacoka gũconorithio, o na kana gĩthiithi gĩake gĩikare gĩtukĩte.
• 23. No rĩrĩ, hĩndĩ ĩrĩa akona ciana ciake iria ndombire na moko makwa ii hamwe nake-rĩ, othe nĩ gũtua magatua atĩ rĩĩtwa rĩakwa nĩ rĩtheru. Ĩĩ, ti-itherũ nĩ gũtua magatua atĩ Ũrĩa Mũtheru wa Jakubu nĩwe mũtheru, na maikarage metigĩrĩte Ngai wa Isiraeli.
• 24. O nao arĩa mahĩtagia na ngoro ciao nĩmagakinyĩrĩrũo nĩ ũmenyi maũndũ, nao arĩa matũire mang’ong’oraga nĩmakeruta maũndũ marĩa marutanagwo.

Home