Go Back

Isaia Chapter 27

• 1. Mũthenya ũcio-rĩ, Jehova nĩakaherithia kĩgugua kĩrĩa kĩa nyamũ-ya-thĩ kĩrĩa kĩrĩ ihenya mũno na rũhiũ rũake rũa njora rũrĩa rũritũ mũno, o rũu rũnene rũĩ hinya, o na aherithie kĩgugua kĩrĩa kĩngĩ kĩa nyamũ-ya-thĩ kĩrĩa kĩrĩ mĩthiore, na orage ndamathia ĩrĩa ĩrĩ iria-inĩ.
• 2. Mũthenya ũcio-rĩ, nĩgũkagĩa mũgũnda wa mĩthabibu ya gũthondekwo ndibei njega; ta kĩũinĩrei.
• 3. Niĩ Jehova nĩ niĩ ndĩũmenyagĩrĩra, na nĩngauunithagĩria maĩ mahinda mothe, na nĩ getha mũndũ o na ũrĩkũ ndakanaũthũkie-rĩ, ndĩrĩũmenyagĩrĩra ũtukũ na mũthenya.
• 4. Niĩ-rĩ, nĩ’thirĩtwo nĩ mang’ũrĩka. Naarĩ korũo nĩ cong’e na mĩigua ikũnjũkĩrĩra tũhũrane mbaara nacio! Ndaciguthũkĩra ndĩcicine ciothe hamwe,
• 5. tiga o ciĩgiritanĩtie na hinya wakwa, nĩ getha tũgĩe na thayũ nacio; ĩĩ, ti-itherũ, nĩ kaba irongorie ũhoro wa atĩ tũgĩe thayũ nacio.
• 6. Matukũ marĩa magoka-rĩ, Jakubu nĩakagĩa na mĩri, na Isiraeli aikare ta arutĩte kĩro agathundũra, nakuo gũkũ thĩ guothe makũiyũrie maciaro.
• 7. Anga Jehova nĩ kũhũra ahũrĩte Isiraeli o ta ũrĩa aahũrire arĩa maamũhũrĩte? Kana hihi oragĩtwo o ta ũrĩa kworaganirũo rĩrĩa aaitĩkire kũũragana?
• 8. Aamũrindũrire aarĩkia kũmũrũithia, agĩtũma ethiĩre ta amũhuhũkĩtie na rũhuho rũake rũĩ hinya ruumĩte mwena wa irathĩro.
• 9. Tondũ ũcio waganu wa Jakubu nĩũkahorohanĩrio ũthire; namo maya nĩmo maũndũ marĩa makoimana na ũhoro ũcio wake wa kwehererio mehia, namo nĩ atĩ mahiga mothe ma igongona matuĩke ta ma mũũnyũ mwerũ ũrĩa ũmemendetwo, nĩ getha mĩtĩ ya Maashera, o na mĩhianano ya kũhoya riũa ndĩkanacoke kũrũgamio.
• 10. Nĩ gũkorũo itũũra rĩrĩa rĩirigĩtwo nĩrĩĩng’ang’ĩtie, nakuo kũndũ gwa gũtũũrũo gũgatigwo o ro ũguo ta kĩĩgĩgĩ, na gũgathamwo gũgatigwo ũtheri ta werũ; kũu nĩkuo njaũ ikarĩithagio, na nokuo igakomaga, na irĩage mahuti ma gĩthaka marĩa makamera kuo.
• 11. Na rĩrĩ, hĩndĩ ĩrĩa honge ciakuo ikoma-rĩ, nĩ kuunangwo ikoinangwo, nao andũ-a-nja mathiĩ macigwatie mwaki, nĩ gũkorũo andũ akuo nĩmaagĩte ũmenyi wa maũndũ; tondũ ũcio we ũrĩa wamombire ndakamaiguĩra tha, kana Mũmombi amatuge.
• 12. Na nĩgũgakinya atĩrĩ, mũthenya ũcio, atĩ Jehova nĩakahũrahũra maciaro make marĩa agethete, amarute kũndũ guothe kwarũma o kũrĩa kwĩ maĩ maingĩ ma Rũũĩ rũa Farati, o nginya karũũĩ ka Misiri; na inyuĩ o inyuĩ ciana cia Isiraeli-rĩ, nĩmũgacokererio hamwe o ũmwe ũmwe.
• 13. Na nĩgũgakinya atĩrĩ, mũthenya ũcio, atĩ coro mũnene nĩũkahuhwo, nao andũ macoke kwao arĩa matigarĩtie hanini morĩre kũu bũrũri wa Ashuri, o na arĩa maateetwo bũrũri wa Misiri; nao nĩmakainamagĩrĩra Jehova mamũhoere o kũu Jerusalemu kĩrĩma-inĩ kĩrĩa gĩtheru.

Home