Go Back

Isaia Chapter 23

• 1. ŨHORO mũritũ ũkoniĩ Turo nĩguo ũyũ: Atĩrĩrĩ, inyuĩ marikabu cia Tarishishi, ta ugai mbu, nĩ gũkorũo Turo nĩrĩanangĩtwo o kwanangwo biũ, rĩgakĩaga nyũmba o na ĩmwe ĩtigĩtwo ĩrũngiĩ, kana rĩkagĩa ha gũtonyerũo thĩinĩ. Ũhoro ũcio nĩmaamenyithĩtio marĩ o bũrũri wa Kitimu.
• 2. Atĩrĩrĩ, ta wĩkirĩrei ki, inyuĩ mũtũũraga hũgũrũrũ-inĩ cia iria rĩrĩa inene, o inyuĩ mũrehagĩrũo indo nyingĩ nĩ onjorithia a Zidoni arĩa mageraga iria-inĩ.
• 3. Tondũ-rĩ, irio iria ciahandĩtwo Shihoru, na magetha ma Nili, o marĩa mageragio igũrũ rĩa maĩ maingĩ, nĩmo mararĩ uumithio warĩo; na nĩrĩo rĩatuĩkĩte kĩng’ang’a kĩa ndũrĩrĩ.
• 4. Atĩrĩrĩ, wee Zidoni, ta conoka, nĩ gũkorũo iria nĩrirurumĩte, nakĩo kĩhingo kĩa hinya kĩa iria rĩu gĩkaruta mũgambo gĩkoiga atĩrĩ, Ndirĩ ndĩragwatwo nĩ ruo rũa kũrũmwo, kana ngohoka, o na kana ngongithia aanake, kana ngarera airĩtu.
• 5. Hĩndĩ ĩrĩa ũhoro warĩo ũkaheanwo Misiri-rĩ, ngoro cia andũ akuo nĩikaigua ruo rũnene nĩ ũndũ wa ũhoro ũcio wa Turo.
• 6. Atĩrĩrĩ, ringai mũkinye Tarishishi, inyuĩ mũtũũraga hũgũrũrũ-inĩ cia iria rĩrĩa inene, mũkiugaga mbu.
• 7. Anga rĩrĩ nĩrĩo itũũra rĩanyu rĩrĩa rĩĩ gĩkeno, o rĩrĩa rĩĩ ngumo ya kuuma tene o tene mũno, o namo magũrũ ma andũ arĩo magathiaga kũndũ kũraya mũno magatũũre marĩ ageni kuo?
• 8. Nũ wacirĩire ũhoro wa atĩ Turo rĩũkĩrĩrũo, o itũũra rĩu rĩraheanaga tanji cia ũthamaki, nao endia indo arĩo magakorũo marĩ o anene atheri, na onjorithia arĩo no arĩa atĩĩku a gũkũ thĩ?
• 9. Jehova Mũnene wa Ita nĩwe wacirĩire ũndũ ũcio, nĩ getha athahie mwĩtĩo, na amenithie riri wa andũ othe arĩa atĩĩku a gũkũ thĩ.
• 10. Atĩrĩrĩ, wee mwarĩ wa Tarishishi, ta thiĩ ũtuĩkanie bũrũri waku o ta ũrĩa rũũĩ rũa Nili rũĩkaga rũoina; rĩu ndwĩhotoreirũo o na atĩa.
• 11. Jehova nĩatambũrũkĩtie guoko gwake agakũigĩrĩra iria igũrũ, agathũngũthia mabũrũri mothe marĩa mathamakagwo nĩ athamaki. Jehova nĩwe wathanĩte rĩathani rĩu rĩkoniĩ onjorithia, nĩguo aninithie ihingo ciao iria nũmu;
• 12. agĩkiuga atĩrĩ, Wee mũirĩtu ũyũ, mwarĩ wa Zidoni, o wee ũtũire ũhinyagĩrĩrio, ndũgacoka gũkena o na rĩ. Arahũka ũringe iria, ũkinye Kitimu, no rĩrĩ, o na kũu ndũkona ũhurũko o na atĩa.
• 13. Ta rora bũrũri wa Akalidei, atĩ andũ aguo nĩmaagĩtwo biũ; Mũashuri nĩwe ũũtuĩte kũndũ kwa nyamũ cia werũ. Nĩ gwaka maakire mĩthiringo yao ya nyũmba ndaya na igũrũ, makĩng’aũrania nyũmba ciakuo cia athamaki; ĩĩ, tiitherũ, nĩaatũmire bũrũri ũcio wanangĩke biũ.
• 14. Atĩrĩrĩ, inyuĩ marikabu cia Tarishishi, ugai mbu, nĩ gũkorũo kĩhingo kĩanyu kĩrĩa kĩrũmu nĩkĩanangĩtwo biũ.
• 15. Na nĩgũgakinya atĩrĩ, mũthenya ũcio, atĩ Turo nĩrĩkariganĩra rĩnine mĩaka mĩrongo mũgwanja, o ta ũrĩa matukũ ma mũthamaki ũmwe maigana. Na rĩrĩ, mĩaka ĩo mĩrongo mũgwanja yathira-rĩ, Turo nĩrĩgacoka kũhaana mũmaraya ũrĩa ũganagwo na rũĩmbo ũũ:
• 16. Atĩrĩrĩ, wee mũmaraya ũyũ ũtũire ũriganĩire, oya kĩnanda gĩa kĩnubi, ũcange itũũra rĩothe; kĩinie mũgambo mwega, ũine nyĩmbo nyingĩ, nĩ getha ũcoke kũririkanwo.
• 17. Na nĩgũgakinya atĩrĩ, atĩ mĩaka ĩo mĩrongo mũgwanja yathira-rĩ, Jehova nĩagacokerera Turo, narĩo rĩcoke wĩra-inĩ warĩo ũcio ũrehage uumithio, o ta mũmaraya ũcio, ta rĩkũhũra ũmaraya na mothamaki mothe ma gũkũ thĩ.
• 18. No rĩrĩ, wonjorithia warĩo o na uumithio ũrĩa rĩkona-rĩ, makaamũrĩrũo Jehova matuĩtwo matheru; matikaigwo mũthithũ kana mahayũo, nĩ gũkorũo wonjorithia warĩo ũgatuĩka wa arĩa matũire marongoragia Jehova, nĩ getha monage irio cia kũmaigana, na mehumbe nguo irĩ rĩrĩ.

Home