Go Back

Isaia Chapter 21

• 1. ŨHORO mũritũ ũkoniĩ werũ ũrĩa wĩ hũgũrũrũ-inĩ cia iria nĩguo ũyũ: Atĩrĩrĩ, o ta ũrĩa ihuhũkanio iria nene cia rũhuho rũa ngoma-cia-aka ituĩkanagĩria kũndũ na ihenya kũu Mwena wa Gũthini, ũguo nĩguo ũhoro ũyũ ũgoka uumĩte werũ-inĩ, bũrũri wĩ itua-nda.
• 2. Atĩrĩrĩ, nĩ kuonio nyonetio kĩoneki gĩkĩ gĩĩ kĩeha mũno; mũrĩa-ng’ũũrũ no ararĩa ng’ũũrũ, na mũtahani no aratahana. Tondũ ũcio, wee Elamu, ta ũkĩra wambate; wee Media o nawe-rĩ, ta tharĩkanĩra. Ũguo nĩguo ngatũma macakaya mao mothe mathire.
• 3. Tondũ ũcio ngũigua ta njiyũrĩtwo nĩ ruo rũnene njohero-inĩ, ngagwatwo nĩ ruo ta rũa mũndũ-wa-nja akĩrũmwo; ndĩgĩtuurĩtwo o nginya ngaremwo nĩ kũigua na matũ, na ngagwatwo nĩ kĩmako o nginya ngaremwo nĩ kuona na maitho.
• 4. Ngoro yakwa nĩ gũtuuma ĩratuumatuuma, na nĩ guoya mũnene ũnduĩte nda; rĩrĩa gwatua gũtuka, o ihinda rĩu ndĩĩriragĩria mũno-rĩ, nĩrĩgarũrũkĩte rĩgatuĩka rĩa gũtũma nyinaine.
• 5. Nĩ gũtandĩka maratandĩka metha yao, magacoka makaara mĩgeka ya gũikarĩrũo, nĩguo marĩe na manyue. Ta ũkĩrai, inyuĩ anene, mũhake ngo maguta,
• 6. amu Mwathani a’heete ũhoro atĩrĩ, Ta thiĩ ũige mũrangĩri wa gũcũthangĩrĩria, amenyithanie ũrĩa arona.
• 7. Na rĩrĩ, ona gĩtungati kĩa andũ megũthiĩ mahaicĩte mbarathi magĩthiĩ erĩ erĩ, o na andũ magĩũka me na ndigiri kana ngamĩra-rĩ, agĩthikĩrĩrie na kĩyo ategete matũ.
• 8. Nake akĩanũka ta mũrũthi, akiuga ũũ: Atĩrĩrĩ, Mwathani, ndũgamaga hĩndĩ ciothe mũthenya mũgima handũ harĩa haakĩtwo hatũũgĩru ha gũcũthangĩrĩria, na ngaikara ũrangĩri-inĩ wakwa ũtukũ o ũtukũ;
• 9. na atĩrĩrĩ, he gĩtungati kĩroka kĩa andũ mahaicĩte mbarathi, magĩũka erĩ erĩ. Agĩgĩcokia ũhoro, akiuga atĩrĩ, Babuloni nĩ rĩgũu, ĩĩ, ti-itherũ nĩ rĩgũu, na mĩhianano yothe mĩacũhie ya ngai ciarĩo ĩkoinangwo ĩkagũithio thĩ.
• 10. Atĩrĩrĩ, andũ aitũ, inyuĩ mũikaraga ta mũhũrĩirũo kĩhuhĩro-inĩ kĩa ngano, na mũgacokanĩrĩrio ta ngano ĩrĩa ĩrĩ kĩhuhĩro-inĩ, ũndũ ũrĩa njiguĩte uumĩte he Jehova Mũnene wa Ita, o we Ngai wa Isiraeli, nĩguo ũcio ndamuumbũrĩra.
• 11. ŨHORO mũritũ ũkoniĩ Duma nĩguo ũyũ: He mũndũ ũranyanĩrĩra akanjĩta arĩ Seiru, akanjũria atĩrĩ, Mũrangĩri ũyũ, ũtukũ ũkinyĩte ha? Tiwe, mũrangĩri ũyũ, ũtukũ ũkinyĩte ha?
• 12. Nake mũrangĩri akoiga atĩrĩ, Gũkiriĩ gũkĩa; no rĩrĩ, nĩkũrĩcoka gũtuka. Mũngĩkorũo mũrĩ na ũndũ mũkũũria-rĩ, ũũriei, mũgĩcoke mũũke mũthenya ũngĩ.
• 13. ŨYŨ naguo nĩ ũhoro mũritũ ũkoniĩ bũrũri wa Arabia: Atĩrĩrĩ, inyuĩ ikundi cia agendi a Dedani, nĩ kũraara mũkaraara ihinga-inĩ o kũu bũrũri wa Arabia.
• 14. Atĩrĩrĩ, ũrĩa mũnyotu nĩatwarĩrũo maĩ, na inyuĩ mũtũũraga bũrũri wa Tema-rĩ, ta gĩtũngiei andũ acio marora irio
• 15. Amu nĩ hiũ cia njora marorĩra, o hiũ cia njora iria icomoretwo, na makorĩra mota marĩa matungĩtwo, o na mathĩna ma ita.
• 16. Nĩ gũkorũo Mwathani nĩa’heete ũhoro, akanjĩra atĩrĩ, mũira wa mwaka ũmwe ũthire, o ta ũrĩa mĩaka ya mũndũ akĩandĩkwo wĩra ĩrĩkanagĩrũo-rĩ, riri wothe wa Kedaru ũgakorũo ũhwererekeire, ũgathira biũ,
• 17. namo matigari ma thiritũ ya andũ arĩa maikagia mĩguĩ, o njamba iria irĩ hinya cia ciana cia Kedaru, nĩigakorũo inyihĩte, nĩ ũndũ Jehova, Ngai wa Isiraeli, nĩwe warĩtie ũhoro ucio.

Home