Go Back

Isaia Chapter 20

• 1. ATĨRĨRĨ, mwaka ũrĩa mũnene wa ita ya Aashuri aakinyire Ashidodi, rĩrĩa Sarigoni, mũthamaki wa Ashuri, aamũrekirie kuo, nake agĩtharĩka itũũra rĩu rĩa Ashidodi, akĩrĩĩgwatĩra-rĩ,
• 2. hĩndĩ ĩo nĩguo Jehova aaririe na kanua ka Isaia, mũrũ wa Amozu, akiuga ũũ: Ta thiĩ wĩohore nguo ĩo ya ikũnia ũmĩrute njohero, na ũrute iratũ ciaku magũrũ. Agĩgĩĩka o ta ũguo, agĩthiĩ njaga e magũrũ matheri.
• 3. Nake Jehova akiuga atĩrĩ, O ta ũguo ndungata yakwa Isaia ĩthiĩte njaga, ĩĩ magũrũ matheri, nĩ getha ũndũ ũcio ũtuĩke rũũri hĩndĩ ya mĩaka ĩtatũ, o na ũndũ wa kũgegania ũkoniĩ Misiri o na Kushi-rĩ,
• 4. ũguo noguo mũthamaki wa Ashuri akagwata andũ a Misiri mĩgwate, o na andũ a Kushi arĩa makarindũrũo moime bũrũri wao, arĩa anyinyi o na arĩa akũrũ, mathiĩ njaga me magũrũ matheri, na matarĩ kĩndũ mehumbĩire itina nakĩo; ũguo nĩguo Misiri gũgaconorithio.
• 5. Nao andũ nĩmakamaka na maconoke, mathahĩrio kĩĩrĩgĩrĩro kĩao kĩa ũrĩa mehokete Kushi, o na ũndũ wa Misiri, bũrũri ũcio megoocaga nĩ ũndũ waguo.
• 6. Naguo mũthenya ũcio andũ arĩa matũũraga bũrũri ũyũ wĩ hũgũrũrũ-inĩ cia iria makoiga ũũ: Onei, ũguo nĩguo kĩĩrĩgĩrĩro giitũ gĩtuĩkĩte gĩa kũrĩa tũtũire twĩhokete atĩ nĩkuo tũkorĩra tũteithio, tũhonokio he mũthamaki wa Ashuri! Na ithuĩ-rĩ, tũgakĩhonoka atĩa?

Home