Go Back

Isaia Chapter 2

• 1. ŨYŨ nĩguo ũhoro ũrĩa Isaia, mũrũ wa Amozu, onire ũkoniĩ Juda na Jerusalemu.
• 2. Nĩgũgakinya atĩrĩ, atĩ matukũ ma kũrigĩrĩria, kĩrĩma kĩrĩa nyũmba ya Jehova yakĩtwo nĩgĩgatũũgĩrio na igũrũ, gĩkĩrũke tũcũmbĩrĩ twa irĩma iria ingĩ, na gĩtũũgĩrio gĩkĩrũke ithũngũri iria ingĩ; nacio ndũrĩrĩ ciothe nĩkuo ikomokagĩra.
• 3. Na irĩndĩ nyingĩ nĩigathiĩ kuo ikiugaga ũũ: Ũkai twambate kĩrĩma-inĩ kĩa Jehova, tũthiĩ nyũmba ya Ngai wa Jakubu, atũrute mĩthiĩre yake, na ithuĩ tũthiage na njĩra ciake; nĩ gũkorũo Zayuni nĩgũkoima ũtaarani, o naguo ũhoro wa Jehova ũhunje uumĩte Jerusalemu.
• 4. Nake nĩagatuithanagia ndũrĩrĩ macira, na arũithie irĩndĩ nyingĩ; nacio icoke gũtura hiũ ciacio cia njora ituĩke hiũ cia mĩraũ, o namo matimũ ma cio matuĩke hiũ cia gũceha mĩtĩ. Hĩndĩ ĩo gũtirĩ rũrĩrĩ rũgacoka gũcomorera rũrĩrĩ rũrĩa rũngĩ rũhiũ rũa njora, o na kana ndũrĩrĩ icoke kwĩĩgithia mbaara rĩngĩ o na rĩ.
• 5. Atĩrĩrĩ, inyuĩ andũ a nyũmba ya Jakubu, ũkai tũthiage tũmũrĩkĩirũo nĩ ũtheri wa Jehova.
• 6. Nĩ gũkorũo Wee nĩwatiganire na andũ aku, o acio a nyũmba ya Jakubu, nĩ ũndũ marũmĩtie mũno mĩtugo ya mwena wa irathĩro, na magatũũra maragũragĩra andũ ta Afilisiti, ningĩ nĩmatumaga ndũgũ na ciana cia andũ a kũngĩ.
• 7. Bũrũri wao nĩũiyũrĩtwo nĩ betha na thahabu, na mĩthithũ yao ndĩrĩ hingo ĩngĩthira; ningĩ bũrũri wao ũkaiyũrũo nĩ mbarathi, na ngari ciao cia ita itingĩtarĩka.
• 8. O na ningĩ bũrũri wao ũiyũrĩtwo nĩ mĩhianano ya kũhoyũo, nao nĩmaturagia ndu makahoya indo iria marutĩire wĩra na moko mao o ene, o icio ciũmbĩtwo na ciara ciao.
• 9. Nake mũndũ ũrĩa ũtarĩ igweta nĩ kũinamanio ainamanĩtio, na ũrĩa wĩ igweta akanyihio, nĩ ũndũ wee ndũngĩmohera.
• 10. Tonya rũaro-inĩ rũa ihiga, wĩhithe rũkũngũ-inĩ, weherere kĩguoyohanio kĩa Jehova, o na riri wa ũrĩa ekĩrĩirũo.
• 11. Mũndũ wa maitho ma rũng’athio nĩakanyihio, naguo mwĩono wa andũ nĩ kũinamanio ũkainamanio; na Jehova wiki nowe ũgatũũgĩrio mũthenya ũcio.
• 12. Amu-rĩ, Jehova Mũnene wa Ita nĩakagĩa na mũthenya wake wa gũũkĩrĩra mwĩtĩo wothe, na mwĩĩkĩrĩro, o na mwĩtũũgĩrio, namo nĩmakanyihio mothe;
• 13. na okĩrĩre mĩtarakwa yothe ya Lebanoni ĩrĩa ĩraihĩte na igũrũ ĩkaneneha mũno, o na mĩgandi yothe ya Bashani;
• 14. o na okĩrĩre irĩma ciothe iria ndaya na igũrũ, o na ithũngũri ciothe iria ndũũgĩru;
• 15. o na okĩrĩre mĩthiringo yothe ya nyũmba ndaya mũno na igũrũ, o na thingo ciothe iria ciakĩtwo cia kũiriga mũciĩ;
• 16. o na okĩrĩre marikabu ciothe cia Tarishishi, o na indo ciacio ciothe cia kĩĩrorerũa.
• 17. Naguo mwĩtũũgĩrio wa andũ a gũkũ thĩ nĩũkainamanio, o na mwĩono wao nĩũkanyihio o naguo; Jehova wiki nowe ũgatũũgĩrio mũthenya ũcio.
• 18. Nayo mĩhianano ya kũhoyũo nĩĩgathenga, ĩthire biũ.
• 19. Nao andũ nĩ gũtonya magatonya ngurunga-inĩ cia ndwaro cia mahiga, o na mĩthongorima-inĩ ya thĩ, meherere kĩguoyohanio kĩa Jehova, o na meherere riri wake wa ũrĩa ekĩrĩirũo, hĩndĩ ĩrĩa akaarahũka athingithie thĩ na hinya.
• 20. Mũthenya ũcio-rĩ, mũndũ agaikagĩria huko o na huhu mĩhianano yake ya betha, o na mĩhianano yake ya thahabu, ĩrĩa aathondekeirũo nĩ andũ amĩhoyage,
• 21. acoke agĩtonye ngurunga-inĩ cia ndwaro cia mahiga, o na mĩatũka-inĩ ya mahiga marĩa maatũkangĩte, nĩ getha eherere kĩguoyohanio kĩu kĩa Jehova, o na eherere riri wake wa ũrĩa ekĩrĩirũo, hĩndĩ ĩo akaarahũka athingithie thĩ na hinya.
• 22. Tiganai na andũ a gũkũ thĩ, tondũ mĩhũmũ yao ya muoyo no ya marima-inĩ mao ma maniũrũ: nĩ ũndũ-rĩ, monagwo ta marĩ bata na njĩra ĩrĩkũ hihi?

Home