Go Back

Isaia Chapter 18

• 1. ĨIYA-Ĩ, bũrũri ũrĩa wĩ ibatabata rĩa mathagu-ĩ, o ũcio wĩ mbarĩ ĩrĩa ĩngĩ ya njũĩ cia Kushi,
• 2. ũrĩa ũtũmaga arekio aguo makagere njĩra ya rũũĩ, mahaicĩte macua ithondeketwo na marura iria igeraga igũrũ rĩa maĩ! Atĩrĩrĩ, inyuĩ arekio aya mwĩ mĩtũkĩ, ta cokai mũkinye he rũrĩrĩ rũu rũanyu rũa andũ araya na ahoro mwĩrĩ, o acio matũire matebebanagia kuuma o kĩhumo-inĩ kĩao; na nĩ rũrĩrĩ rũĩ hinya rũranganagĩrĩria thĩ, na bũrũri waruo ũgayũkanĩtio nĩ njũĩ!
• 3. Atĩrĩrĩ, inyuĩ mũtũũraga mabũrũri mothe ma thĩ, o inyuĩ atũũri a thĩ yothe! Hĩndĩ ĩrĩa kĩbebero gĩkoyũo na igũrũ, kĩhandwo irĩma-inĩ-rĩ, ta nĩmũgagĩcũthĩrĩria mwĩonere ũhoro ũcio; na rĩrĩa karumbeta gakahuhwo-rĩ, ta nĩmũgagĩthikĩrĩria mwĩiguĩre ũhoro ũcio.
• 4. Nĩ gũkorũo Jehova a’heete ũhoro, akoiga atĩrĩ, Niĩ-rĩ, nĩ gwĩkirĩra ngekirĩra o ro ũguo ki, na ndĩ o kũndũ kũu gwakwa kũrĩa ndũũraga-rĩ, njũthĩrĩrie ndĩĩonere maũndũ, ndĩĩrorere ihenia rĩa riũa hĩndĩ ya ũrugarĩ mũtheri, o na kĩbii kĩa hĩndĩ ya ũrugarĩ wa magetha-inĩ.
• 5. Nĩ gũkorũo o mbere gũtanagĩa magetha, hĩndĩ ĩrĩa kĩro gĩgakorũo gĩitĩkĩte, o namo mahũa ma mũtĩ makagarũrũka magatuĩka thabibu ikiriĩ kwĩrua-rĩ, hĩndĩ ĩo nĩguo agaceha tũhonge na hiũ cia ũcehi, nacio honge iria igucũkĩte mũno aciteme acithengie.
• 6. Nacio honge icio ciothe irĩ hamwe igatigĩrũo nyamũ cia rĩera-inĩ iria irĩaga nyama irĩma-inĩ, o na nyamũ cia gũkũ thĩ; nacio nyamũ icio cia rĩera-inĩ irĩaga nyama igaikara ciũmbĩte honge-inĩ icio hĩndĩ ya ũrugarĩ, na nyamũ ciothe cia gĩthaka ciikare igũrũ rĩacio hĩndĩ ya heho.
• 7. Ihinda rĩu nĩguo Jehova Mũnene wa Ita akareherũo kĩheo nĩ andũ acio araya na ahoro mwĩrĩ, o acio matũire matebebanagia kuuma o kĩhumo-inĩ kĩao na nĩ rũrĩrĩ rũĩ hinya rũranganagĩrĩria thĩ, na bũrũri waruo ũgayũkanĩtio nĩ njũĩ; nakĩo kĩheo kĩu gĩkinyio o handũ harĩa haamũrĩirũo rĩĩtwa rĩa Jehova Mũnene wa Ita, naho nĩho kĩrĩma-inĩ gĩa Zayuni.

Home